31 Aug 2018, 16:17
ހދ. ކުޅުދުއްފުށީ އެއާޕޯޓުގައި ތާރު އެޅުމުގެ މަސައްކަތް ފަށައިފިއެވެ.
އެމްޓީސީސީއާ ހަވާލުކޮށްގެން ކުރިއަށް ގެންދާ ކުޅުދުއްފުށީ އެއާޕޯޓުގެ ރަންވޭގައި ތާރުއެޅުމުގެ މަސައްކަތް މިއަދު ފަށާފައިވާއިރު އަންނަ މަހުގެ 10 ވަނަ ދުވަހަށް މަސައްކަތް ނިންމާލުމަށް މަސައްކަތް ކުރަމުންދާކަމަށް އެމްޓީސީސީން ބުނެއެވެ.
އެމްޓީސީސީން ބުނީ ކަނޑައެޅިފައިވާ ތާރީޚަށް އެއާޕޯޓަށް ޓެސްޓް ފްލައިޓު ޖެއްސުމަށްޓަކައި، ތާވަލާ އެއްގޮތަށް މަސައްކަތް ކުރިއަށް ގެންދަން މަސައްކަތް ކުރާ ކަމަށެވެ. މި އެއާޕޯޓުގައި ތަރައްގީކުރަނީ 1.2 ކިލޯމީޓަރުގެ ރަންވޭއެކެވެ.
ކުޅުދުއްފުށީ އެއާޕޯޓު ހެދުމަށްޓަކައި އެރަށުގެ ފަޅުން ހަ ހެކްޓަރު، އަދި އެ ރަށުގެ ކުޅިން ނުވަ ހެކްޓަރުގެ ބިން ވަނީ ހިއްކައިފައެވެ. އެ މަޝްރޫއުގެ އަގަކީ 53.9 މިލިއަން ރުފިޔާއެވެ.