30 Aug 2018, 09:03
މިދުވަސްވަރަކީ ހައްޖުގެ މަތިވެރި އަޅުކަން އަދާކުރުމަށް ފަހު ހައްޖާޖީން އެނބުރި ރާއްޖެ އަންނަ ދުވަސްވަރަށް ވުމާ އެކު، ހުމާއި ރޯގާ އިތުރުވެދާނެތީ އެކަމަށް ސަމާލުވުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އިލްތިމާސް ކޮށްފި އެވެ.
އެޗްޕީއޭ އިން އިއްޔެ ނެރުނު ބަޔާނެއްގައި ބުނީ ހައްޖަށް ދާ މީހުން އެނބުރި އަންނަ ދުވަސްވަރަކީ އަބަދު ވެސް ހުމާއި ރޯގާ ފެތުރޭ ދުވަސްވަރެއްކަން ފާހަގަ ކުރެވޭ ދުވަސްވަރެއް ކަމަށެވެ. މި ބަލިތަކަކީ ފަސޭހައިން ގައިން ގަޔަށް އަރާ ބަލިތަކަކަށް ވާތީ އެކަމަށް ސަމާލުވުމަށް ވަނީ އިލްތިމާސް ކޮށްފަ އެވެ.
ހައްޖުން އަންނަ މީހުންނަށް ޚާއްސަ ފްލޫ ކްލިނިކެއް އައިޖީއެމްއެޗުގައި ހުޅުވާފައިވާ އިރު، ކޮންމެ ދުވަހެއްގެ އިރުއޮއްސި ހަޔަކުން ދަންވަރު ބާރައަށް މި ކްލިިކުން ހިދުމަތް ދޭނެ ކަމަށް އެޗްޕީއޭ އިން ބުނެ އެވެ. ކާޑު، ހައްޖު ގްރޫޕްތަކުން ދީފައިވާ އައިޑެންޓިފިކޭޝަން ކާޑު ނުވަތަ ޕާސްޕޯޓް ހިފައިގެން އައުމުން ފްލޫ ކްލިނިކުން ޚިދުމަތް ލިބޭނެކަމަށް އެޗްޕީއޭއިން ވަނީ ބުނެފަ އެވެ.
ހައްޖުން އެނބުރި އަންނަތާ 14 ދުވަސް ތެރޭ ހުން އައިސް ކެއްސާނޭވާލާން އުނދަގޫވާ ނަމަ، ލަސްނުކޮށް ޑޮކްޓަރަށް ދެއްކުމަށް ވެސް އެޗްޕީއޭ އިން ވަނީ އިލްތިމާސް ކޮށްފަ އެވެ.