25 Aug 2018, 19:57
ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް މައުމޫން އަބްދުލް ގައްޔޫމްގެ ސިއްހީ ފަރުވާއާ މެދު އިހުމާލު ނުވާ ކަމަށް މޯލްޑިވްސް ކަރެކްޝަނަލް ސާވިސް އިން ބުނެފި އެވެ.
ރައީސް މައުމޫން ދަނީ "ބިނައިން ޕެރޮކްސިމަލް ޕޮޒިޝަނަލް ވާޓިގޯ" ނަމަކަށް ކިޔާ އާލާސްކަންފުޅަކަށް ފަރުވާ ހޯއްދަވަމުންނެވެ. ދާދި ފަހުން އެމަނިކުފާނުގެ ހާލުކޮޅު ގޯސްވެ 48 ގަޑިއިރުގެ އޮބްސަވޭޝަންގައި ބާއްވަން ޖެހުނު ކަމަށް އެމަނިކުފާނުގެ ވަކީލުން ވަނީ ވިދާޅުވެފަ އެވެ. އަދި އެކަމަށް ފަރުވާ ދިނުމުގައި ކަރެކްޝަންސް އިން އިހުމާލު ވަމުންދާ ކަމުގެ ތުހުމަތު ވަކީލުން ވަނީ ކުރައްވައިފަ އެވެ،
ނަމަވެސް، ކަރެކްޝަންސް އިން މިއަދު ނެރުނު ބަޔާނުގައި ބުނީ ކުރީގެ ރައީސް މައުމޫން މާފުށީ ޖަލަށް ގެދްދެވި ފަހުން އެ މަނިކުފާނުގެ ހުރިހާކަމެއް ވަނީ އެމަނިކުފާނުގެ ޢުމުރާއި ބަލިޙާލަތާ ގުޅިގެދް ޚާއްޞަ އުޞޫލެއްގެ ދަށުން ހަމަޖައްސާފައި ކަމަށެވެ. އަދި އެމަނިކުފާނު ދިރިއުޅުއްވުމުގެ ކަންތައްތައް ހަމަޖައްސާފައި ވަނީ ދަތިކަމެއްނެތި އުޅުއްވެވޭގޮތަށް ތައްޔާރުކޮފްފައިވާ ވަކި ތަނެއްގައި ކަމަށް އެ ބަޔާނުގައި ބުނެފައިވެ އެވެ.
މީގެ އިތުރުން އެމަނިކުފާނުގެ އަނބިކަނބަލުންނަށް ކޮންމެ ދުވަހަކުވެސް ޖަލަށް ވަޑައިގެން އެހީތެރިކަން ފޯރުކޮށްދިނުމުގެ ފުރުސަތު ފަހިކޮށްފައިވާނެ ކަމަށް އެ ބަޔާނުގައި ވަނީ ބުނެފަ އެވެ.
ރައީސް މައުމޫންގެ އާލާސްކަންފުޅަށް ހާއްސަ ސަމާލުކަމެއް ދީގެން ފަރުވާ ދޭން ޖެހޭ ކަމަށް ވަކީލުން ވިދާޅުވަމުން ގެންދަވާ އިރު ކަރެކްޝަންސްގެ ބަޔާނުގައި ބުނެފައި ވަނީ، އެމަނިކުފާނުގެ ބޭހުގެ ހުރިހާ ކަންތައްތަކަކާއި ޑޮކްޓަރުން އެ ސާވިސް އިން ހަމަޖައްސައިދީފައި ވާނެ ކަމަށެވެ. އަދި ސިއްހީ ހިދުމަތް ދިނުމުގައި އިހުމާލުވެފައި ނުވާނެ ކަމަށާއި ބޭނުންވާ ކޮންމެ ވަގުތެއްގައި ޑޮކްޓަރުންނާއި ބޭހުގެ ހިދުމަތް ފޯރުކޮށްދެމުންދާ ކަަމަށް ކަރެކްޝަންސް އިން ބުންޏެވެ.
މިރޭ ރައީސް މައުމޫންގެ ވަކީލުން ބޭއްވި ނޫސްވެރިންގެ ބައްދަލުވުމުގެ ތެރެއިން-- ސަން ފޮޓޯ: އަހްމަދު އަވްޝަން އިލްޔާސް
ކަރެކްޝަންސް އިން މިހެން ބުނެފައިވާ އިރު މިރޭ ރައީސް މައުމޫންގެ ވަކީލުން ބޭއްވި ނޫސްވެރިންގެ ބައްދަލުވުމެއްގައި ވަނީ އެމަނިކުފާނުގެ ސިއްހީ ހާލުކޮޅު ތަން ނުދެނީސް އެއްތަނުން އަނެއްތަނަށް ގެންގޮސް "ޓޯޗާ" ކުރަމުންދާ ކަމުގެ ތުހުމަތު ކުރައްވައިފަ އެވެ. އަދި އެމަނިކުފާނުގެ އަނބިކަނބަލުންނާ ބައްދަލު ކުރުން ވެސް އޮންނަނީ އެހެން މީހުންނަށް ވެސް އޮންނަ އުސޫލުން ކަމަށް ވަކީލުން ވިދާޅުވި އެވެ.
ސުޕްރީމް ކޯޓުން އެކެއް ފެބްރުއަރީގައި ނެރުނު އަމުރުގައ އެމަނިކުފާނުގެ ބައިވެރިވުމެއް އޮތް ކަމަށް ތުހުމަތުކޮށް މައުމޫންގެ މައްޗަށް ޓެރަރިޒަމްގެ ދައުވާ ވަނީ ކޮށްފަ އެވެ. އެމަނިކުފާނުގެ މައްޗަށް ދައުލަތުން އުފުލި އަދުލު އިންސާފު ގާއިމްކުރުމަށް ހުރަސްއެޅުމުގެ ދައުވާ ވަނީ މީގެ ކުރިން ސާބިތުވެފަ އެވެ. އެ މައްސަލާގައި އެމަނިކުފާނުގެ މައްޗަށް ވަނީ އެއް އަހަރާއި ހަތް މަސް ދުވަހުގެ ހުކުމެއް ކޮށްފަ އެވެ.