25 Aug 2018, 16:40
އަންހެނުންނަށް ލިބެމުންދާ އަނިޔާތަކުގެ ވާހަކަ ސިޔާސީ ލީޑަރުން ނުދައްކަވާތީ، އެމްޑީއޭގެ ޑެޕިއުޓީ ލީޑަރު ޑރ. އައިޝަތު ރަފިއްޔާ ކަންބޮޑުވުން ފާޅުކުރައްވައިފި އެވެ.
ޒުވާނުން ބާރުވެރި ކުރުވުމަށް ގިނަ މަސައްކަތްތަކެއް ކުރައްވާ ރަފިއްޔާ ވިދާޅުވީ، ރާއްޖޭގެ އާބާދީގެ ނިސްބަތުން އަދި ވޯޓުލާ މީހުންގެ ނިސްބަތަށް ބަލާއިރު ވެސް އަންހެނުންގެ ޕަސެންޓް 50 ޕަސެންޓަށް އަރާ ކަމަށެވެ.
"އަޅުގަނޑަށް ނުވިސްނޭ އެއްވެސް ސިޔާސީ ލީޑަރަކު އަންހެނުންގެ ހައްގުތަކުގެ ވާހަކަ ކެމްޕޭނުގައި ނުދައްކަނީ ކީއްވެގެން ކަމެއް. މިއީ ވަރަށް ސީރިއަސް ކަމެއް،" ސަރުކާރު ކޯލިޝަންގައި ހިމެނޭ އެމްޑީއޭގެ ޑެޕިއުޓީ ލީޑަރު ވިދާޅުވި އެވެ.
ރަފިއްޔާގެ ވާހަކަތައް "ސަން" އަށް ބަންޑުންކޮށްލެއްވީ، އަންހެން ކުދިންގެ ގުރޫޕަކުން އަނިޔާކޮށް، ބިރުދެއްކި އަންހެން ކުއްޖާގެ މައްސަލާގައި ކަންބޮޑުވުން ފާޅުކުރައްވަމުންނެވެ.
ސިޔާސީ ބޭފުޅުންގެ އިތުރުން، އަންހެނުންނާއި ކުޑަކުދިންގެ ހައްގުތައް ހިމާޔަތްކުރަން ޖެހޭ ޖަމިއްޔާތަކުން ވެސް މި މައްސަލާގައި ވާހަކަ ނުދައްކާތީ ރަފިއްޔާ ވަނީ ކަންބޮޑުވުން ފާޅުކުރައްވައިފަ އެވެ.
ދިވެހި ތިން އަންހެން ކުދިން، އެހެން އަންހެން ކުއްޖަކަށް އަނިޔާކޮށް، ހުތުރު ބަހުން ވާހަކަ ދައްކައި، އިންޒާރުދޭ ވީޑިއޯ ސޯޝަލް މީޑިއާގައި އާންމުވުމާ އެކު އެ ވީޑިއޯގައި އަނިޔާ ލިބުނު ކުއްޖާ ވަނީ ގެއްލިފަ އެވެ.
މި މަހުގެ 19 ވަނަ ދުވަހު އެ ކުއްޖާ ގެއްލުނު ނަމަވެސް، އާއިލާގެ ފަރާތުން އެކަން އޮތީ ޕޮލިހަށް ރިޕޯޓް ނުކޮށެވެ. އެ ކުއްޖާ ގެއްލިފައިވާކަން ޕޮލިހުންނަށް އެނގުނީ، އެ ވީޑިއޯ މައްސަލަ ބަލަން ފެށުމުންނެވެ.
"ކުއްޖަކު ގެއްލިގެން އެހާ ގިނަ ދުވަސްތައް ވާއިރު، އެކަން ރިޕޯޓްނުކޮށް އޮތީމާ އެއީ ބެލެނިވެރިންގެ ވެސް އިހުމާލެއް. މިއީ ހަމައެކަނި ޕޮލިހުންގެ ޒިންމާއެއް ނޫން. ކުދިންގެ ބެލެނިވެރިކަން ހަވާލުވެފަ އޮންނަންވާނީ އެ ޒިންމާ ނެގޭވަރުގެ މީހުންނަށް. ކޮންމެ އިހްމާލަކީ އަނިޔާއެއް،" ރަފިއްޔާ ވިދާޅުވި އެވެ.
މުޖުތަމައުއަށް ހިދުމަތް ކޮށްދިނުމާއި، ލިބިފައިވާ ހުނަރެއް ބޭނުންކޮށްގެން އާއްމުންގެ ދިރިއުޅުމަށް އެދެވޭ ރަނގަޅު ބަދަލުތަކެއް ގެނައުމަށް އިސްނަގައިގެން މަސައްކަތްކުރާ ޒުވާނުންނަށް އިނގިރޭސި ރާނީ ދެއްވާ އެވޯޑް ލިބޭ ޒުވާނުންގެ އެޑްވައިސަރީ މެންޓޯ ޕެނަލް އާއި އެމެރިކާގެ ނިއުޔޯކް އެކަޑަމީ އޮފް ސައިންގެ 1000 ގާލްސް 1000 ފިއުޗާ ޕްރޮގްރާމްގެ މެންޓަރުކަން ކުރައްވާ ރަފިއްޔާ ވިދާޅުވީ، ރާއްޖޭގެ މުޖުތަމައުގައި އަންހެން ކުދިންނާ މެދު ބޮޑެތި ތަފާތުކުރުންތައް ގެންގުޅޭ ކަމަށެވެ.
ރަފިއްޔާގެ ކަންބޮޑުވުންތައް؛
"އަންހެން ކުދިން ބޭރަށް ނުފޮނުވަނީ އެ ކުދިން ބަނޑުބޮޑުވެދާނޭ ކިޔާފައި. އެކަމަކު ނުވިސްނާ، ފިރިހެން ކުދިން ރަނގަޅަށް ތަރުބިއްޔަތު ކުރާނަމަ އެކަންކަން ހައްލުވާނެ ކަމެއް... މިއަދުގެ ހާލަތަކީ ކޮބައިތޯ؟ ކުށްކުރުމާ މިފަދަ ކަންކަންކުރާ ފިރިހެންކުދިންގެ އިންސައްތަ އެލާމް މިންގަނޑަކަށް އަރަމުން އަންނަ ކަން. އަދި މިފެންނަނީ ކިޔެވުމުގަ އާއި ޓޮޕް އެޗީވާސް ލިސްޓުގައި އަންހެން ކުދިން 70 މަތިވާ ތަން،"
"މިއަދު މިގައުމުގައި ރަނގަޅު ފިރިހެން ދަރިއެއް ބޮޑުކުރުން މިވަނީ މާ ބޮޑު ޒިއްމާއަކަށް ވެފައި. އަންހެ ކުދިން ވެސް އަދި ފިރިހެން ކުދިން ވެސް، އެކުދިން ކުޑައިރުއްސުރެ ޒިއްމާދާރުކުރުވާ އުޅޭ ތަންތަނާ އެކު އުޅޭ ރަށްޓެހިން ވެޓް ކުރުމަކީ ވަރަށް މުހިއްމުކަމެއް. އަޅުގަޑުމެންގެ މުޖުތަމައުގައި ލޯތްބާ އަޅާލުމާ އިހްތިރާމްކުރުން ވަރަށް ދައްވެއްޖެ،"
"މުޖުތަމައުގައި ޒުވާނުން ކުށްތަކަށް އަރައިގަންނަ ސަބަބުތައް ހޯދުމަށް ޓަކައި އަޅުގަނޑުމެން ހަދަމުންދާ ރިސާޗުގައި މިހާތަނަށް ދައްކާގޮތުން ދިރިއުޅުމުގައި ތަނަވަސްކަން ކުޑަ އާއިލާތަކުގެ ކުދިންނާމެދު، އަދި ކިޔެވުމަށް ދަށްކުދިންނާމެދު ސްކޫލް ތަކުގެ ތެރެއިންނާއި މުޖުތަމައުގެ ތެރެއިން ބުލީ ކުރުމަކީ ކުދިން ރުޅިގަދަވުމާ ވައިލަންސް އަށް މަގުފަހިވުމުގެ ރޫޓް ކޯސް ކަމަށް ބެލެވޭ،" ރަފިއްޔާ ވިދާޅުވި އެވެ.
އޭނާ ވިދާޅުވީ، ބުލީ ކުރުން ފަދަ ކަންކަން ހުއްޓުވުމަށް ގާނޫނުތައް ހަދައިގެން، ވަރުގަދަ މަސައްކަތްތަކެއް ކުރަން ޖެހޭ ކަމަށެވެ. އަދި ގާނޫނުތަކުން އެ ކަންކަން މަނާކޮށް، ބޮޑެތި އަދަބުތައް ކަނޑައެޅުމަށް އޭނާ ގޮވާލެއްވި އެވެ.
"ވަޅިޔަކުން މީހެއްގެ ޖިސްމަށް އަނިޔާދީ މަރާލެވޭ ގޮތަށް ބުލީ ކުރުމާއި ނަފްސާނީ އަނިޔާއަކީ ކުއްޖެއްގެ ރޫހު މަރާލުން. މިއީ ޖިސްމަށް އަނިޔާ ދިނުމަށް ވުރެ ވެސް ގެއްލުން ބޮޑުކަމެއް. އަދި ގާނޫނުތައް ހެދިނަމަ ވެސް ތަންފީޒީ އިދާރާތަކުން ތަންފީޒުނުކުރާކަމަށް ވާނަމަ އޭގެ އެއްވެސް މާނައެއްނެތް،" ރަފިއްޔާ ވިދާޅުވި އެވެ.