15 Aug 2018, 16:00
ކުށެއްގެ ތުހުމަތު ކުރެވިފައިވާ މީހެއްގެ ބަންދާ މެދު ގޮތެއް ނިންމާއިރު، ގޭގައި ބަންދުކުރަން އަމުރު ކުރުމަކީ ޖިނާއީ އިޖްރާއާތުގެ ގާނޫނުގެ ދަށުން ކުރެވޭނެ ކަމެއް ނޫން ކަމަށް ތިން ފަނޑިޔާރުންގެ އިއްތިފާގުން ހައި ކޯޓުން ކުރި ހުކުމެއްގައި ކަނޑައަޅައިފި އެވެ.
ހައިކޯޓުން އެގޮތަށް ކަނޑައެޅީ ޕޯސްޓް މެދުވެރިކޮށް މަސްތުވާތަކެތި ރާއްޖެ އެތެރެކުރި ކަމަށް ތުހުމަތު ކުރެވޭ މީހަކު ހެއްކަށް ނުފޫޒު ފޯރުވުމުގެ ފުރުސަތު އޮތް ކަމަށް ނިންމައި، އެމީހާ 15 ދުވަހަށް ގޭގައި ބަންދު ކުރުމަށް ކްރިމިނަލް ކޯޓުން ކުރި އަމުރެއް އިސްތިއުނާފު ކުރުމުން، އެކަމާ މެދު ގޮތެއް ނިންމައި ކުރި ހުކުމުގަ އެވެ.
ކްރިމިނަލް ކޯޓުގެ އެ ނިންމުން ދައުލަތުން ހައި ކޯޓުގައި އިސްތިއުނާފު ކުރުމުން އެ މައްސަލައާ ގުޅިގެން އިއްވި ހުކުމުގައި ވަނީ ކްރިމިނަލް ކޯޓުގެ އަމުރު ބާތިލުކޮށްފަ އެވެ.
މައްސަލަ ބެއްލެވީ ފަނޑިޔާރު މުހައްމަދު ނިޔާޒާއި ފަނޑިޔާރު އަބްދުއްރައޫފް އިބްރާހިމްގެ އަދި ފަނޑިޔާރު ޝުޖާއު އުސްމާން މި ދިން ފަނޑިޔާރުންގެ އިއްތިފާގުން ހައި ކޯޓުން ކުރި ހުކުމުގައި ވަނީ ޖިނާއީ އިޖްރާއާތުގެ ގާނޫނުގެ 60 ވަނަ މާއްދާގެ (ހ) ގެ އެއް ވަނަ ނަމްބަރުގައި ބުނާ "ބަންދުގައި ބެހެއްޓުން"ގެ މާނައަކީ ކަސްޓޯޑިއަލް ޖަލެއްގައި ބަންދުކުރުން ކަމަށެވެ.
ސަބަބެއްގެ ގޮތުގައި އެ ހުކުމުގައި ފާހަގަކޮށްފައި ވަނީ ޖިނާއީ އިޖުރާއަތުުގެ ގާނޫނުގެ 52 ވަނަ މާއްދާގެ (ހ)ގައި، ބަންދުކުރަން ޖެހޭ މީހުން ބަންދުކުރަން ޖެހޭނީ ކަސްޓޯޑިއަލް ޖަލެއްގައި ކަމަށް ބުނެފައިވާ ކަމެވެ.
ޖިނާއީ އިޖުރާއަތުގެ ގާނޫނުގެ 52 ވަނ މާއްދާގެ (ހ) ގައި ބުނެފައި ވަނީ "އެހެން ޤާނޫނެއްގައި ކަނޑައެޅިގެން އިސްތިސްނާކޮށްފައިވާ ޙާލަތެއްގައި މެނުވީ، ޖިނާއީ ކުށެއްގެ ތުހުމަތުގައި ހައްޔަރު ކުރެވޭ މީހުން ބަންދުކޮށްފައި ބައިތިއްބަން ވާނީ [ގާނުނު ނަމްބަރު 14/2013] ޖަލުތަކާއި ޕެރޯލުގެ ގާނޫނުގައި ކަނޑައަޅާފައިވާ ފަދަ ކަސްޓޯޑިއަލް ޖަލެއްގައި،" ކަމަށެވެ.
ހުކުމުގައި ބުނެފައި ވަނީ ލުއި ދިނުމުގެ ގޮތުން ނުވަތަ އެ ނޫން ގޮތަކަށް ވެސް، ކުށުގެ ތުހުމަތުގައި ބަންދުކުރަން ޖެހޭ މީހާ ގޭގައި ބަންދުކުރުމަކީ ޖިނާއީ އިޖްރާއާތުގެ ގާނޫނުގެ ދަށުން ކުރެވޭނެ ކަމެއް ނޫން ކަމަށެވެ.
ޖިނާއީ އިޖުރާއަތުގެ ގާނޫނަށް އަމަލުކުރުމުގެ ކުރިން، ކުށުގެ ތުހުމަތު ކުރެވޭ މީހުން ގޭބަންދު ކުރަމުން އައީ އޭރު އަމަލު ކުރި "ކުށުގެ ތުހުމަތު ކުރެވޭ މީހުން ފަނޑިޔާރެއްގެ ކުރިމައްޗަށް ހާޒިރުކޮށް، ބަންދާ މެދު ގޮތެއް ނިންމުމުގެ ގަވާއިދުގެ" ދަށުން ކަމަށް ހައިކޯޓުގެ ހުކުމުގައިވެ އެވެ. އެހެން ނަމަވެސް ޖިނާއީ އިޖުރާއަތުގެ ގާނޫނަށް އަމަލު ކުރަން ފެށުމާއެކު އެ އުސޫލު ބާތިލުވެފައިވާ ކަމަށް ވެސް ހުކުމުގައި ބުނެފައިވެ އެވެ.
އެ މައްސަލާގައި ދައުވާ ލިބޭ މީހާ އެއްކޮށް ބަންދުން ދޫކޮށްލަން ފަހުން ކްރިމިނަލް ކޯޓުން ކުރި އަމުރަކަށް ހައި ކޯޓުން ވަނީ ތާއީދު ކޮށްފައިވާތީ އެ މީހާ ބަންދު ކުރަން ހައިކޯޓުގެ އަމުރުގައި ބުނެފައި ނުވެ އެވެ.