10 Aug 2018, 23:04
ފުވައްމުލަކުގައި އިސްލާމީ މަރުކަޒެއް ގާއިމް ކުރަން ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމް ނިންމަވާފައިވާ ކަމަށް އެމަނިކުފާނުގެ ރަނިން މޭޓް ޑރ. މުހައްމަދު ޝަހީމް އަލީ ސައީދު މިރޭ ވިދާޅުވެއްޖެ އެވެ.
ޑރ. ޝަހީމް މިހެން ވިދާޅުވީ ކެމްޕެއިން ދަތުރުފުޅެއްގައި ފުވައްމުލަކަށް ވަޑައިގެން އެރަށުގެ ރައްޔިތުންނާ މުޚާތަބުކުރައްވައި ވާހަކަފުޅު ދައްކަވަމުންނެވެ.
ފުވައްމުލަކަށް ފުރާ ވަޑައިގަތުމުގެ ކުރިން ނޫސްވެރިންނާ ބައްދަލުކުރައްވައި ޝަހީމް ވިދާޅުވީ އެ ދަތުރުފުޅުގައި ފުވައްމުލަކުގެ ރައްޔިތުނަށް އުފާވެރި ޚަބަރުތަކެއް ދެއްވާނެ ކަމަށެވެ.
ފުވައްމުލަކަށް ވަޑައިގެން މިރޭ ޝަހީމް ވިދާޅުވީ އޭނާ ދެއްވަން ބޭނުންފުޅުވާ އުފާވެރި ޚަބަރަކީ ނަރުދަމާގެ މަސައްކަތާއި މަގު ހެދުމުގެ މަސައްކަތް ފަދަ މަސައްކަތްތަކުގެ ހަބަރެއް ނޫން ކަމަށެވެ.
"އަޅުގަނޑު ދަންނަވަން މިއުޅޭ އުފާވެރި ހަބަރަކީ ރައީސުލްޖުމްހޫރިއްޔާ އަބްދުﷲ ޔާމީންގެ ފަރާތްޕުޅުން މާތްﷲ އިރާދަކުރެއްވިއްޔާ އަޅުގަނޑުމެން މި ރަށުގައި އިސްލާމީ މަރުކަޒެއް ގާއިމް ކުރާނަން،" ޑރ. ޝަހީމް ވިދާޅުވިއެވެ.
ޑރ. ޝަހީމް ވިދާޅުވީ އެ އިސްލާމީ މަރުކަޒުން ގުރުއާން ހިތުދަސް ކޮށްދިނުމާއި އިސްލާމީ ތައުލީމް ފެތުރުމާއި ގުރުއާން އިލްމް ފެތުރުން ފަދަ މަސައްކަތްތައް ކުރެވިގެންދާނެ ކަމަށެވެ. އަދި އިސްލާމީ ދަރުސްތަކާއި ފޯރަމްތަކާއި ދީނީ އިލްމާ ގުޅޭ އެހެން ކަންތައްތައް ވެސް އެ މަރުކަޒުގައި ކުރެވޭނެ ކަމަށް އޭނާ ވިދާޅުވި އެވެ. ޑރ. ޝަހީމް ވިދާޅުވީ އެ މަރުކަޒު ވެގެންދާނީ އެ ސަރަހައްދުގެ މައި "ހަބް" އަކަށް ކަމަށެވެ.
އަދި ފުވައްމުލަކަކީ ހާފިޒުން އިމާމުންނާއި އިސްލާމީ ލިޔުންތެރިންގެ ރަށް ކަމަށާއި އެ ރަށަކީ ޒަމާނުއްސުރެ އިސްލާމް ދީނަށް ނަސްރު ދިން ރަށެއް ކަމަށް މިރޭ ޑރ. ޝަހީމް ވިދާޅުވި އެވެ.
މީގެ އިތުރުން މިރޭ ޑރ. ޝަހީމް ތަކުރާރުކޮށް ވިދާޅުވަމުން ގެންދެވީ ރައީސް ޔާމީން ކުރައްމުންވަމުން ގެންދަވަނީ ގައުމީ މަސައްކަތެއް ކަމަށެވެ. އެހެން ކަމުން އެއްވެސް ތަފާތު ކުރުމަކާ ނުލައި ކެމްޕެއިން ދަތުރުފުޅުގައި ދޮރުން ދޮރަށް ވަޑައިގެން ހުރިހާ ފިކުރުތަކުގެ ރައްޔިތުންނާ ބައްދަލުކުރައްވާނެ ކަމަށް ޑރ. ޝަހީމް ވިދާޅުވިއެވެ.
މީގެ ކުރިން ޑރ. ޝަހީމް ވަނީ ކެންޕެއިން ދަތުރުފުޅެއްގައި ގއ. އަތޮޅުގެ ހުރިހާ ރަށްތަކަށް ވެސް ވަޑައިގެންފައެވެ. އަދި އެއަށްފަހު ކެމްޕެއިންގައި މެލޭޝިއާއަށް ވެސް ވަޑައިގެންނެވިއެވެ.