01 Aug 2018, 12:08
ކުރިއަށް އޮތް ރިޔާސީ އިންތިޚާބަށް މިހާތަނަށް 20،000 މީހުން ރީ-ރަޖިސްޓަރީ ކޮށްފައިވާ ކަމަށް އިލެކްޝަންސް ކޮމިޝަނުން ބުނެފިއެވެ.
އިލެކްޝަންސް ކޮމިޝަންގެ މެންބަރު އަދި ތަރުޖަމާނު އަހުމަދު އަކުރަމް މިއަދު "ސަން" އަށް ވިދާޅުވީ، މިހާތަނަށް 20،000 މީހުން ރިޔާސީ އިންތިޚާބަށް ރިރަޖިސްޓްރީ ކޮށްފައިވާ ކަަމަށެވެ.
ރިޔާސީ އިންތިޚާބަށް 70،000 މީހުން ރީ-ރަޖިސްޓްރީ ކުރާނެ ކަމަށް ބެލެވޭ ކަމަށްވެސް އޭނާ ވިދާޅުވިއެވެ.
މި އަހަރުގެ ރިޔާސީ އިންތިޚާބުގައި ވޯޓުލުމުގެ ހައްގު 263،000 މީހުންނަށް ލިބެއެވެ. އަދި އިންތިޚާބުގައި ރާއްޖެ އަދި ބޭރުގެ ބައެއް ގައުމުތަކުގައި 490 އަށް ވުރެ ގިނަ ވޯޓު ފޮށި ބަހައްޓާނެއެވެ.
ސެޕްޓެމްބަރ 23ގައި ބޭއްވުމަށް ހަމަޖެހިފައިވާ ރިޔާސީ އިންތިހާބުގައި ވާދަކުރުމަށް ދޫކުރާ ފޯމް ނުވަ ފަރާތަކުން ނަގާފައިވާ ކަމަށް އިލެކްޝަންސް ކޮމިޝަނުން ވަނީ ބުނެފައެވެ.
ނަމަވެސް މިހާތަނަށް ރިޔާސީ އިންތިޚާބުގައި ވާދަކުރައްވާނެކަން އިއުލާން ކޮށްފައިވަނީ އެމްޑިޕީގެ ރިޔާސީ ކެންޑިޑޭޓް އިބްރާހީމް މުހަންމަދު ޞާލިހާއި ޕީޕީއެމްގެ ރިޔާސީ ކެންޑިޑޭޓު ރައީސް އަބްދުﷲ ޔާމީން އަބްދުލްގައްޔޫމާއި ކުރީގެ ހޯމް މިނިސްޓަރު އުމަރު ނަސީރުގެ އިތުރުން ލޯކަލް ގަވަމެންޓް އޮތޯރިޓީ (އެލްޖީއޭ)ގެ ކުރީގެ ނައިބު ރައީސް ޝުޖާއު ހުސެއިންނެވެ.