31 Jul 2018, 18:02
ސަރުކާރުން ބޮޑެތި މަޝްރޫއުތައް ކުރިއަށް ގެންދަނީ ރިޔާސީ އިންތިހާބާ ދިމާކޮށް ނޫންކަމަށް އެންވަޔަރަންމަންޓް މިނިސްޓަރު ޠާރުޤު އިބްރާހިމް ވިދާޅުވެއްޖެއެވެ.
ވިހި ރަށެއްގައި ނަރުދަމާ ގާއިމްކުރުމަށް ފެނަކައިން ފެށި ބިޔަ މަޝްރޫއު އިފްތިތާހް ކުރުމަށް މިއަދު ހެނދުނު އިސްލާމީ މަރުކަޒުގެ ހޯލުގައި ބޭއްވި ރަސްމިއްޔާތުގައި ވާހަކަ ދައްކަވަމުން މިނިސްޓަރު ޠާރިޤު ވިދާޅުވީ ސަރުކާރުން ބޮޑެތި މަޝްރޫއުތައް އިންތިހާބާ ދިމާކޮށް ކުރިއަށް ގެންދާ ކަމަށް ބުނެ ދައްކާ ވާހަކަތަކުގައި ހަގީގަތެއް ނެތް ކަމަށެވެ. އަދި ބޮޑެތި މަޝްރޫއުތައް ފަށަނީ ފައިސާ ހޯދައިގެން ދުރާލައި ތައްޔާރުވެގެން ކަމަށްވެސް ޠާރިޤު ވިދާޅުވިއެވެ.
މިިނިސްޓަރު ވިދާޅުވީ މި ސަރުކާރުގައި މަސައްކަތްތައް ކުރިއަށް ގެންދަނީ ހަމަ ތަނެއްގައި ބިންގާ އަޅާލާފަދަ އުސޫލަކުން ނޫން ކަމަށާއި އަދި ސަރުކާރުން މަސައްކަތްތައް ކުރަނީ ކުރަން ޖެހޭ ގޮތަށް ވަސީލަތްތައް ހޯދައިގެން ކަަމަށެވެ.
" މިސަރުކާރުން މަސައްކަތް ކުރާނީ މަސައްކަތަށް ބޭނުންވާ ފައިސާ ހޯދައިގެން. ދެންވެސް ކުރަން ޖެހޭ ކަންތައްތައް ހޯދައި އަޅުގަނޑުމެން ރައްޔިތުން ކައިރިއަށް ދާނީ އެ މަސައްކަތް ކުރަން. އެ މަސައްކަތުގެ ވާހަކަ ދައްކާކަށް ނޫން،" ޠާރިޤު ވިދާޅުވިއެވެ.
ޠާރިޤު ވިދާޅުވީ މިއަދު ސޮއިކުރި ބިޔަަ މަޝްރޫއުއަކީވެސް ހަމައެކަނި ސޮއެއް ކޮށްލުމަށް އިފްތީތާހް ކުރި މަޝްރޫއެއް ނޫން ކަމަށާއި އަދި މިއަދުން ފެށިގެން އެ ސޮއި ކުރެވުނު 20 ރަށުގައި ނަރުދަމާގެ މަސައްކަތް ކުރިއަށް ދާނެ ކަމަށެވެ.
މިނިސްޓަރު ވިދާޅުވީ އެ ވިހި ރަށުގެ މަސައްކަތަށް ބޭނުންވާ ވަސީލަތްތަކާއި ފައިސާ މިހާރު ހަަމަޖެހިފައިވާ ކަމަށާއި އަދި އެ މަޝްރޫއު ފެނަކައާއި ހަވާލުކުރި ނަމަވެސް މިނިސްޓްރީން އެކަން ވަރަށް ގާތުން ބަލަމުންގެންދާނެ ކަމަށެވެ.
ފެނަކައިން، ނަރުދަމާގެ އެ ބިޔަ މަޝްރޫއު ހަވާލުކޮށްފައި ވަނީ ސްރީލަންކާގެ ހޭކާބް ޕަބްލިކް ލިމިޓެޑާއެވެ. އެ ކުންފުންޏަކީ އެފަދަ މަސައްކަތްތަކުގައި ރާއްޖެއާއި ސްރީލަންކާގައިވެސް ތަޖުރިބާހުރި ކުންފުންޏެއް ކަމަށް މިނިސްޓަރު ވިދާޅުވިއެވެ.
"އަޅުގަނޑުމެން ތަނަކުން ބަޔަކު ހޯދައިގެން ކުރާ މަސައްކަތެއް ނޫން. އަދި ރިޔާސީ އިންތިހާބު އަންނާތީ ކުރާ މަސައްކަތެއް ނޫން، އަޅުގަނޑުމެން މިކަން ކުރަނީ ވަރަށް އިހުލާސްތެރިކަމާއެކު ރައްޔިތުންނަށް އަސާސީ ހިދުމަތް ފޯރުކޮށްދިނުމަށް މުހިންމު މަގްސަދުގައި ރައީސުލްޖުމްހޫރިއްޔާ ކޮށްދެއްވާ ކަމެއް،" މިނިސްޓަރު ވިދާޅުވިއެވެ.