27 Jul 2018, 15:35
އިސްލާމްއާބާދު (ޖުލައި 27): ޕާކިސްތާނުގެ އާންމު އިންތިހާބުގެ 95 ޕަސެންޓު ވޯޓު ގުނާފައިވާ އިރު، އެއްވެސް ޕާޓީއަކަށް 137 ގޮނޑި ލިބިފައި ނުވާތީ، އެގައުމުގައި ދެން ހަދަން ޖެހޭނީ ކޯލިޝަން ސަރުކާރެއް ކަމަށް ކަމާ ބެހޭ ފަރާތްތަކުން ވިދާޅުވެއްޖެއެވެ.
ޕާކިސްތާނުގައި ބުދަ ދުވަހު ބޭއްވި އިންތިހާބުގެ ނަތީޖާ އެގައުމުގެ އިލެކްޝަންސް ކޮމިޝަނުން އިއުލާން ކުރަން ފަށާފައިވާ އިރު މިހާތަނަށް އެންމެ ގިނަ ގޮނޑި ލިބިފައި ވަނީ އިމްރާންގެ ޚާންގެ ޕާކިސްތާން ތަހްރީކް އީ އިންސާފް (ޕީޓީއައި)އަށެވެ.
އެޕާޓީއަށް 114 ގޮނޑި ލިބިފައިވާ އިރު ކުރީގެ ބޮޑުވަޒީރު ނަވާޒް ޝަރީފްގެ ޕާކިސްތާން މުސްލިމް ލީގް (ޕީއެމްއެލް-އެން)އަށް ލިބިފައި ވަނީ 63 ގޮނޑިއެވެ. އަދި ތިން ވަނައަށް އެންމެ ގިނަ ގޮނޑި ކާމިޔާބުކޮށްފައި ވަނީ ކުރީގެ ބޮޑުވަޒީރު ބޭނަޒީރު ބުއްޓޫގެ ދަރިކަލުން ބިލާވަލް ބުއްޓޫ ޒަރުދާރީ އިސްކޮށް ހުންނަވާ ޕާކިސްތާން ޕީޕަލްސް ޕާޓީ (ޕީޕީޕީ)އަށެވެ. އެއީ 43 ގޮނޑިއެވެ.
އެހެންކަމުން އިމްރާން ޚާން ބޮޑުވަޒީރުކަމަށް ގެނައުމަށްޓަކައި ޕީޓީއައިއަށް ޖެހޭނީ އެހެން ޕާޓީއަކާއެކު ކޯލިޝަން ސަރުކާރެއް ހަދާށެވެ.
އެ އިންތިހާބުގެ ނަތީޖާ އިއުލާންކުރުން ލަސްވާތީ، ޕީއެމްއެލް-އެންއިން ވަނީ ނަތީޖާ ގަބޫލު ނުކުރާނެ ކަމަށް ބުނެފައި އެވެ. އަދި ވޯޓު ގުނުމުގެ ކުރިން ބައެއް މަރުކަޒުތަކުން އެޕާޓީގެ މަންދޫބުން ބޭރުކޮށްފައިވާ ކަމަށާއި ވޯޓު އޮޅުވާލަން މަސައްކަތްކުރާކަމުގެ ތުހުމަތުކޮށްފައެވެ.
ނަމަވެސް އިލެކްޝަން ކޮމިޝަނުން ވަނީ ނަތީޖާ އިއުލާނުކުރުން ލަސްވީ އެގައުމުގައި އަލަށް ބޭނުން ކުރާ ވޯޓު ގުނާ ސޮފްޓްވެއާއަށް ދިމާވި މައްސަލައެއްގެ ސަބަބުން ކަމަށް ބުނެފައެވެ.
އަދި އިމްރާން ޚާން ވަނީ ބުދަ ދުވަހުގެ އިންތިހާބަކީ ޕާކިސްތާނުގައިވާ ބޭއްވި އެންމެ އިންސާފުވެރި އިންތިހާބު ކަމަށް ވިދާޅުވެފައެވެ. ނަމަވެސް އޭނާ ވެރިކަމަށް ވަޑައިގެންނެވުމުން ޕީއެމްއެލް-އެންގެ ތުހުމަތުތައް ތަހުގީގުކުރައްވާނެ ކަމަށްވެސް ވިދާޅުވެފައެވެ.
މީގެ އިތުރުން އިމްރާން ޚާން ވަނީ އޭނާގެ ވެރިކަމުގައި ގައުމުގެ އެންޓި ކޮރަޕްޝަން އިދާރާތައް ވަރުގަދަކޮށް، ޓެކްސް ފައިސާ ރައްކާތެރިކޮށް، ޒުވާނުންނަށް ވަޒީފާގެ ފުރުސަތުތައް އިތުރުކުރާނެ ކަމަށް ވިދާޅުވެފައި އެވެ.
އަދި އިންޑިއާއިން ޕާކިސްތާނާއެކު ގުޅުން ބަދަހިކުރަން ބޭނުން ނަމަ އެގައުމުން ވެސް އޮންނާނީ އެކަމަށް ތައްޔާރަށް ކަމަށް ވިދާޅުވެފައެވެ.