27 Jul 2018, 17:53
އިސްލާމިކް ޔުނިވާސިޓީ (އައިޔޫއެމް)ގެ މަޖިލީހުގެ މެމްބަރުކަމަށް ހުސެއިން މުހައްމަދު ހަނީފް އައްޔަނުކުރައްވައިފިއެވެ.
ޔުނިވާސިޓީގެ މަޖިލީހަކީ ޔުނިވާސިޓީ ހިންގުމުގެ މަސްއޫލިއްޔަތު އަދާކުރާ ފަރާތެވެ. އެ މަޖިލީސް އެކުލެވިގެންވަނީ 13 މެމްބަރެއްގެ މައްޗަށެވެ. އޭގެ ތެރޭގައި، މަގާމުގެ ހައިސިއްޔަތުން ހިމެނޭ ފަސް މެމްބަރަކާއި، ރައީސުލްޖުމްހޫރިއްޔާ އައްޔަނުކުރައްވާ ފަސް މެމްބަރަކާއި ޔުނިވާސިޓީން އިންތިޚާބުކުރާ ތިން މެމްބަރެކެވެ.
އިސްލާމިކް ޔުނިވާސިޓީގެ މަޖިލީހަށް ހުސައިން މުހައްމަދު ހަނީފު އައްޔަނުކުރެއްވީ ރައީސުލްޖުމްހޫރިއްޔާއެވެ. ރައީސް އޭނާ އައްޔަނުކުރެއްވީ ބުދަ ދުވަހުއެވެ. ހުސައިން މުހައްމަދު ހަނީފު އެ މަޖިލީހުގައި ހުންނަވާނީ ގާނޫނީ ދާއިރާއިންނެވެ.
އޭނާއަކީ މީގެ ކުރިން ސްކައުޓް އެސޯސިއޭޝަންގެ ރައީސްގެ މަގާމު އަދާކުރެއްވި ބޭފުޅެކެވެ.
އިސްލާމިކް ޔުނިވާސިޓީގެ މަޖިލީހުގައި ގާނޫނީ ދާއިރާ މީގެ ކުރިން ތަމްސީލުކުރެއްވީ ހައިކޯޓުގެ ފަނޑިޔާރުކަމަށް ދާދި ފަހުން އައްޔަނުކުރި މުހައްމަދު ފައިސަލްއެވެ.
ޔުނިވާސިޓީގެ މަޖިލީސް އެކުލެވިގެންވާ ގޮތަކީ:
މަގާމުގެ ހައިސިއްޔަތުން ހިމެނޭ މެމްބަރުން:
- ޔުނިވާސިޓީގެ ޗާންސެލަރ: ޑރ. މުހައްމަދު ޝަހީމް އަލީ ސައީދު
- ވައިސް ޗާންސެލަރ: އާއިޝާ ޚަލީލާ އަބްދުލްސައްތާރު
- ޑެޕިއުޓީ ވައިސް ޗާންސެލަރ (އެޑްމިން އެންޑް ފައިނޭންސް): އަލީ ރަޝީދު
- ޑެޕިއުޓީ ވައިސް ޗާންސެލަރ (އެކެޑެމިކް އެފެއާޒް): ހައްވާ ލަތީފު
- ޑެޕިއުޓީ ވައިސް ޗާންސެލަރ (ރިސާޗް އެންޑް އިނޮވޭޝަން): ޑރ. މަރިޔަމް ޝަހުނީޒާ ނަސީރު
ރައީސުލްޖުމްހޫރިއްޔާ އައްޔަނުކުރައްވާ މެމްބަރުން:
- ވިޔަފާރި، މާލީ ނުވަތަ އިގްތިސާދީ ދާއިރާ: އަހްމަދު ސިރާޖު
- ތައިލީމީ ދާއިރާ: ޝުހުދާ ރިޒްވާން
- ގާނޫނީ ދާއިރާ: ހުސައިން މުހައްމަދު ހަނީފް
- ޑޮކްޓަރީ ބޭހުގެ ދާއިރާ: ޑރ. މުހައްމަދު ހަނީފު
- ޔުނިވަރސިޓީ ކުރިއަރުވައި ތަރައްގީކުރުމުގެ ގޮތުން އެހީތެރިވެދީފައިވާ ބޭފުޅުންގެ ތެރެއިން: ޑރ. މުހައްމަދު އަލީ
އިންތިޚާބުކުރެވޭ މެމްބަރުން:
- ޔުނިވާސިޓީގެ އެކެޑެމިކް ބޯޑުން: ޑރ. އާއިޝަތު ރީޝާ
- އެކެޑެމިކް މުވައްޒަފުންގެ ތެރެއިން: މުހައްމަދު ވަހީދު
- ޔުނިވާސިޓީގެ ދަރިވަރުންގެ ތެރެއިން: ސަވާދު އާދަމް