24 Jul 2018, 12:36
ސޯލް (ޖުލައި 24): އުތުރު ކޮރެއާގެ ރޮކެޓު ލޯންޗު ކުރާ ސައިޓެއް ނައްތާލުމުގެ މަސައްކަތް އެގައުމުން ފަށައިފި އެވެ.
އުތުރު ކޮރެއާގެ ހަރަކާތްތައް މޮނިޓާ ކުރާ އެމެރިކާގެ ގުރޫޕެއް ކަމަށްވާ 38 ނޯތްއިން ބުނާ ގޮތުގައި، އެގައުމުގެ ހުޅަނގު އުތުރުގައި ހުންނަ ސޮހޭ ސްޓޭޝަން ނައްތާލާ މަންޒަރު ސެޓެލައިޓް ފޮޓޯތަކުން ވަނީ ފެނިފަ އެވެ.
އުތުރު ކޮރެއާ އިން ބުނާ ގޮތުގައި އެއީ ސެޓެލައިޓު ލޯންޗު ކުރާ ސައިޓެކެވެ. ނަމަވެސް އެމެރިކާގެ އޮފިޝަލުން ވަނީ އެތަނުގައި ބެލިސްޓިކް މިސައިލް ޓެސްޓުކޮށްފައިވާ ކަމަށް ތުހުމަތުކޮށްފަ އެވެ.
މިދިޔަ މަހު އެމެރިކާގެ ރައީސް ޑޮނަލްޑް ޓްރަމްޕާއި އުތުރު ކޮރެއާގެ ލީޑަރު ކިމް ޖޮންގް އުން ވަނީ ސިންގަޕޫރުގައި ބައްދަލުކުރައްވައިފަ އެވެ. އަދި އުތުރު ކޮރެއާ އިން ވަނީ އެގައުމުން ނިއުކްލިއާ ހަތިޔާރު ނައްތާލުމަށް އެއްބަސްވެފަ އެވެ.
އުތުރު ކޮރެއާ އިން ވަނީ މީގެ ކުރިން ހަ ފަހަރަކު ނިއުކްލިއާ ޓެސްޓުތައް ކުރިއަށްގެންގޮސްފަ އެވެ. އެންމެ ފަހުން އެފަދަ ޓެސްޓެއް ކުރީ މިދިޔަ އަހަރުގެ ސެޕްޓެމްބަރު މަހުގަ އެވެ.
އިއްޔެ ރައީސް ޓްރަމްޕް ވަނީ އުތުރު ކޮރެއާއާ އެކު އޮތް ގުޅުންތައް ވަރުގަދަވަމުންދާތީ އުފާ ކުރައްވާ ކަމަށް ވިދާޅުވެފަ އެވެ. އަދި ފާއިތުވި ނުވަ މަސް ތެރޭގައި އެގައުމުން އެއްވެސް މިސައިލެއް ލޯންޗުކޮށް، ނިއުކްލިއާ ޓެސްޓެއް ކުރިއަށްގެންގޮސްފައި ވެސް ނުވާ ކަމަށް ވިދާޅުވެފަ އެވެ. (ބީބީސީ)