17 Jul 2018, 20:18
ރައީސުލްގުމްހޫރިއްޔާ އަބްދުﷲ ޔާމީން އަބްދުލް ގައްޔޫމް ދެވަނަ ދައުރަކަށް ނުހޮވިއްޖެނަމަ ގައުމު އަރައިނުގަނެވޭވަރުގެ ފުން އަދަވަޅަކަށް ވެއްޓިގެންދާނެ ކަމަށް ޕީޕީއެމްގެ ނައިބު ރައީސް އަދި ރައްޔިތުންގެ މަޖިލީހުގެ ފޮނަދޫ ދާއިރާގެ މެންބަރު އަބްދުއްރަހީމް އަބްދުﷲ (އަދުރޭ) ވިދާޅުވެއްޖެ އެވެ.
ހއ. އިހަވަންދޫ ނަރުދަމާގެ މަޝްރޫއުގެ ނިންމުން ފާހަގަކުރުމަށް އެ ރަށުގައި މިއަދު ބޭއްވި ރަސްމިއްޔާތުގައި ވާހަކަފުޅު ދައްކަވަމުން އަދުރޭ ވިދާޅުވީ މާދަމާގެ މުސްތަގުބަލް ދިވެހީންނަށް އާރާސްތު ކުރެވެން އޮތީ ކުރިއަށް މިއޮތް ރިޔާސީ އިންތިޚާބުގައި ރައީސް ޔާމީން ދެވަނަ ދައުރަކަށް އިންތިޚާބުކޮށްގެން ކަމަށެވެ.
"މާދަމާގެ މުސްތަގުބަލް އަޅުގަނޑުމެންނަށް އާރާސްތު ކުރެވެން އޮތީ ރައީސް ޔާމީން އަށް ދެވަނަ ދައުރެއްދީގެން. ރައީސް ޔާމީން ވެރިކަމަށް ދެވަނަ ދައުރަކަށް ނުގެނެވިއްޖެނަމަ އަޅުގަނޑުމެން ވަރަށް ބޮޑު ހިތާމައެއް ކުރަން ޖެހޭނެ. މި ގައުމު ފުންމިން ނޭނގޭ އަނދަވަޅަކަށް ވެއްޓިގެންދާނެ،" އަދުރޭ ވިދާޅުވިއެވެ.
އަދުރޭ ވިދާޅުވީ ވޭތުވެދިޔަތާގައި ރައްޔިތުންނަށް އަނިޔާވެރިވީ ކޮންބައެއްކަން ރައްޔިތުންނަށް އެނގޭ ކަމަށާއި ވެރިކަމުގެ ދަހިވެތި ކަމުގައި ރައީސް ޔާމީނަށް ގިނަ ގުނަ އަނިޔާތަކެއްދޭން އިދިކޮޅު ފަރާތް ތަކުން މަސައްކަތް ކުރި ކަމަށެވެ.
އެގޮތުން ގާނޫނު އަސާސީގެ ހިމާޔަތުގައި ކަމަށް ބުނެ އިދިކޮޅު ފަރާތްތަކުން މަގުތަކަށް ނިކުމެ ގައުމުގެ ހަމަޖެހުން ގެއްލުވާލައި ގާނޫނީ ގޮތުން އުފެދިފައޮތް ސަރުކާރެއް ގާނޫނާ ޚިލާފަށް ވައްޓާލަން މަސައްކަތް ކުރިކަމަށް އޭނާ ވަނީ ވިދާޅުވެފައެވެ.
"ރައީސް ޔާމީން މިއަދާ ހަމައަށް ވަޑައިގެންނެވީ ވަރަށް ގިނަ ގުނަ ހުރަސްތަކެއް ގިރާކޮށްފައި. އެމަނިކުފާނު ދަތުރު ކުރެއްވި ލޯންޗުގައި ބޮންގޮއްވާލާފައި ވަނީ ވެރިކަމުގެ ދަހިވެތި ކަމުގައި. އެކަން ކާމިޔާބު ނުވުމުން ސުނެއިޕަރެއް ގެނެސްގެން ވެސް ރައީސްގެ ފުރާނަފުޅު ދުއްވާލަން މަސައްކަތްކުރި. މިކަމެއްވެސް ކާމިޔާބެއް ނުވި. ދެން މަސައްކަތް ކުރީ ކާރު ދުއްވާފައިދާ މަގުގައި ބޮން ހަރުކޮއްގެން ގޮއްވާލަން. މިކަންވެސް ކާމިޔާބެއްނުވި،" އަދުރޭ ވިދާޅުވިއެވެ.
އޭގެ އިތުރުން ރައްޔިތުންގެ މަޖިލީހުގެ މެންބަރުންތަކެއް "ގަނެގެން" ރައީސް ޔާމީން އަޒުލުކުރަންވެސް އިދިކޮޅު ފަރާތްތަކުން މަސައްކަތް ކޮށްފައިވާ ކަމަށް އަދުރޭ ވިދާޅުވިއެވެ.
ބޭރުގެ ފަރާތްތަކާ ގުޅިގެން ރާއްޖެ އަޅުވެތިކޮށް މާތްވެގެންވާ އިސްލާމްދީން ނޫން އެހެން ދީންތައް ރާއްޖެ ގެނައުމަށް މަސައްކަތް ކުރާ ބަޔަކު މިއަދު ނިކުމެ ތިމަންނަމެން މިއައީ ދިވެހި ރައްޔިތުންނަށް ހެޔޮއެދިގެންނޭ ބުންޏަސް ދިވެހި ރައްޔިތުން އެކަން ގަބޫލު ނުކުރާނެ ކަމަށްވެސް އޭނާ ވިދާޅުވިއެވެ.
"ކޮންބައެއްތޯ ބުނީ މިދިޔަ ފެބުރުއަރީ މަހު އިންޑިއާ ސިފައިންކައިރީ މިތަނަށް އަރާ މިތަން ހިފާށޭ؟. މިކަހަލަ ބަޔަކު އައިސް ރައްޔިތުން ކައިރީ ތިމަންނަމެން މިއައީ ގައުމަށް ހެޔޮއެދިގެންނޭ ބުންޏަސް ރައްޔިތުން އެކަން ގަބޫލެއް ނުކުރާނެ،" އަދުރޭ ވިދާޅުވިއެވެ.