12 Jul 2018, 20:13
އިދިކޮޅު ދެ ޕާޓީ ކަމުގައިވާ އެމްޑީޕީ އާއި ޖުމްހޫރީ ޕާޓީން ދާދި ފަހުން ބޭއްވި ކޮންގްރެސް އިލެކްޝަން ކޮމިޝަނުން ބަލައިގަނެފައިވާ ކަމަށް އެ ކޮމިޝަނުގެ ރައީސް އަހްމަދު ޝަރީފް ވިދާޅުވެއްޖެއެވެ.
އިލެކްޝަން ކޮމިޝަނުން މިއަދު ބޭއްވި ނޫސްވެރިންގެ ބައްދަލުވުމެއްގައި ޝަރީފް ވިދާޅުވީ އެމްޑީޕީ އާއި ޖޭޕީގެ ކޮންގްރެސް އޮބްޒާވް ކުރުމަށް އެ ދެ ޕާޓީން އެދުނު ކަމަށާއި އެމްޑީޕީގެ ދައުވަތު ލިބުނީ ވަގުތު ވަރަށް ކުޑަތަން ވެފައިވަނިކޮށް ކަމަށެވެ. ނަމަވެސް އެމްޑީޕީގެ ކޮންގްރެސް ވެސް އިލެކްޝަން ކޮމިޝަނުން އޮބްޒާވް ކޮށްފައިވާނެ ކަމަށް އޭނާ ވިދާޅުވިއެވެ.
"އެމްޑީޕީއާ ޖުމްހޫރީ ޕާޓީގެ ކޮންގްރެސް އަކީ އަޅުގަނޑުމެންގެ މަޝްވަރާ ލިބިގެން ބާއްވާފައިވާ ދެ ކޮންގްރެސް،" ޝަރީފް ވިދާޅުވިއެވެ.
ދެ ޕާޓީގެ ކޮންގްރެސްގައި އަސާސީ ގަވާއިދަށް ގެނެސްފައިވާ ބައެއް އިސްލާހުތަކާ ގުޅިގެން ގާނޫނީ ގޮތުން ފުރިހަމަ ކުރަން ޖެހޭ ކަންކަން ދެ ޕާޓީއާ ގުޅިގެން ކުރަމުން އަންނަ ކަމަށް ވެސް ޝަރީފް ވިދާޅުވިއެވެ. ނަމަވެސް އޭގެ ތަފްސީލެއް އޭނާ ނުދެއްވައެވެ.
ބޮޑެތި މުހިއްމު ނިންމުންތަކެއް ނިންމި އެމްޑީޕީގެ ކޮންގަރެސްގައި 800 އަށްވުރެ ގިނަ މަންދޫބުން ބައިވެރިވިއިރު، ރިޔާސީ ކެންޑިޑޭޓް ކަނޑައެޅުމުގެ ބާރު ގައުމީ މަޖިލީހަށާއި ކޮންގުރެސްއަށް ދިނުމަށް އެ ޕާޓީގެ އަސާސީ ގަވާއިދަށް އިސްލާހު ގެނައެވެ.
ޖުމްހޫރީ ޕާޓީގެ ކޮންގްރެސްގައި ވަނީ އެ ޕާޓީން އަލަށް ރައީސްގެ މަގާމް އުފައްދައި އެމަގާމަށް އަލީ ވަހީދު އިންތިޚާބުކޮށްފައެވެ. އަދި ލީޑަރުގެ މަގާމް ހުސްކޮށް ބެއިންދުމަށްފަހު އެ މައްސޫލިއްޔަތު އަދާކުރާނެ ފަރާތެއްގެ ގޮތުގައި އެ ޕާޓީގެ ޑެޕިއުޓީ ލީޑަރު ޑރ. ހުސައިން ރަޝީދު ހަސަން ވަނީ ކޮންގްރެސްއިން ހަމަޖައްސާފައެވެ.