10 Jul 2018, 00:09
ދިރާގު ދިވެހި ޕްރިމިއާ ލީގުގައި މާޒިޔާ ސްޕޯޓްސް އެންޑް ރެކްރިއޭޝަން ކްލަބު އަތުން އެންމެ ފަހުގެ ޗެމްޕިއަން ނިއު ރޭޑިއަންޓް ސްޕޯޓްސް ކްލަބުން މޮޅެއް ހޯދައިފިއެވެ.
ގައުމީ ފުޓްބޯޅަ ދަނޑުގައި މިރޭ ކުޅުނު މެޗުގައި މާޒިޔާ އަތުން ނިއު މޮޅުވީ 1-0ގެ ނަތީޖާއަކުންނެވެ.
ދިރާގު ދިވެހި ޕްރިމިއާ ލީގުގައި ނިއުއާއި މާޒިޔާ ބައްދަލުކުރި މެޗުގެ ތެރެއިން: އެ މެޗުން ނިއު މޮޅުވީ 1-0ގެ ނަތީޖާއަކުން --- ފޮޓޯ/ އެފްއޭއެމް
އެ ނަތީޖާއާއެކު ނިއު ވަނީ ކުޅުނު ތިން މެޗުން ލިބުނު ހަތް ޕޮއިންޓާއެކު ތާވަލުގެ އެއްވަނައަށް ޖެހިލައިފައެވެ. ދެވަނައިގައި އޮތް ކްލަބު ގްރީން ސްޓްރީޓްސްއަށް ވެސް ހަތް ޕޮއިންޓް ލިބިފައިވާ އިރު، ނިއު ކުރީގައި އޮތީ ގޯލުގެ ތަފާތުންނެވެ. މިރޭގެ މެޗުން ބަލިވި މާޒިޔާ އޮތީ ހަތަރު ޕޮއިންޓާއެކު ތާވަލުގެ ހަތަރުވަނައިގައެވެ.
މިރޭ ކުޅުނު މެޗުގެ ކުރީކޮޅުގައި ނިއުގެ ފަރާތުން ގޯސްތަކެއް ފެނުނު އިރު، މާޒިޔާއިން ވަނީ އޭގެ ފައިދާ ނެގުމަށް މަސައްކަތްކޮށްފައެވެ. މެޗުގެ ކުރީކޮޅުގައި މާޒިޔާގެ ކޯނެލިއަސް ސްޓެވާޓާއި ނާއިޒް ހަސަން (ދާދު) އަދި ކެޕްޓަން އަސަދުﷲ އަބްދުﷲ (އަސައްކޮ) ފޮނުވާލި ހަމަލާ ވެސް ނިއުގެ ގޯލާ އަމާޒުވެފައެއް ނުވެއެވެ.
މެޗުގެ 26 ވަނަ މިނެޓުގައި ނިއުއިން ވަނީ ލަނޑެއް ޖަހައި ލީޑު ހޯދައިފައެވެ. ކިޕްސަން އަޓުހޭރޭ ދިން ބޯޅައަކުން ނިއުއަށް އެ ލަނޑު ކާމިޔާބުކޮށްދިނީ އެޓީމުގެ ތަޖުރިބާކާރު ޑިފެންޑަރު އަހްމަދު އަބްދުﷲ (ލިލީ) އެވެ. މާޒިޔާގެ ޕެނަލްޓީ އޭރިއާ ތެރެއިން ލިލީއަށް ބޯޅަ ލިބުނު އިރު، އޭނާ ހުރީ ވަރަށް ހުސްކޮށެވެ.
ދިރާގު ދިވެހި ޕްރިމިއާ ލީގުގައި ނިއުއާއި މާޒިޔާ ބައްދަލުކުރި މެޗުގެ ތެރެއިން: އެ މެޗުން ނިއު މޮޅުވީ 1-0ގެ ނަތީޖާއަކުން --- ފޮޓޯ/ އެފްއޭއެމް
ނިއުއިން ލީޑު ހޯދިތާ ހަތަރު މިނެޓު ފަހުން މާޒިޔާއަށް ނަތީޖާ ހަމަހަމަކުރުމަށް ރަނގަޅު ފުރުސަތެއް ލިބިގެންދިޔައެވެ. ހަސަން ޝިފާޒް ދިން ބޯޅައެއް ހިފައިގެން ޕެނަލްޓީ އޭރިއާ ތެރެއަށް ވަނުމަށްފަހު ކޯނެލިއަސް ފޮނުވާލި ހަމަލާ ދިޔައީ ނިއު ގޯލުގެ ހުރަސް ދަނޑިމަތިން ބޭރަށެވެ.
މެޗުގެ 31 ވަނަ މިނެޓުގައި ނިއުއަށް އިތުރު ލަނޑެއް ކާމިޔާބުކުރުމަށް ވަރަށް ހުސް ފުރުސަތެއް ލިބިގެންދިޔައެވެ. ދިވެހި ޕްރިމިއާ ލީގަށް ނިއުއަށް ގެނައި ތުރުކުމެނިސްތާން ކުޅުންތެރިޔާ އާމިރު ގުރުބާނީ ނަގައިދިން ހުރަހަކުން މާޒިޔާގެ ޕެނަލްޓީ އޭރިއާ ތެރޭ ހުސްކޮށް ހުރެ، ހަސަން އަދުހަމް ފޮނުވާލި ހަމަލާ ދިޔައީ ގޯލާ އަމާޒުނުވެ ބޭރަށެވެ.
މެޗުގެ ދެވަނަ ހާފުގެ ފުރަތަމަ ފަސް މިނެޓުތެރޭ ލަނޑުޖަހާނެ އެންމެ ރަނގަޅު ފުރުސަތެއް ލިބިގެންދިޔައީ ނިއުއަށެވެ. ލިލީ ދިން ބޯޅައަކުން ޕެނަލްޓީ އޭރިއާ ތެރެއިން ކިޕްސަން ފޮނުވާލި ހަމަލާގައި ބާރެއް ނެތުމުން މާޒިޔާގެ ކީޕަރު ހުސައިން ޝަރީފް ވަނީ ފަސޭހަކަމާއެކު އެ ބޯޅަ ހޯދައިފައެވެ.
ދިރާގު ދިވެހި ޕްރިމިއާ ލީގުގައި ނިއުއާއި މާޒިޔާ ބައްދަލުކުރި މެޗުގެ ތެރެއިން: އެ މެޗުން ނިއު މޮޅުވީ 1-0ގެ ނަތީޖާއަކުން --- ފޮޓޯ/ އެފްއޭއެމް
މެޗުގެ 71 ވަނަ މިނެޓުގައި ނިއުއަށް ލަނޑުޖަހާނެ އިތުރު ފުރުސަތެއް ލިބިގެންދިޔައެވެ. އާމިރު ގުރުބާނީ ދިން ބޯޅައަކުން ޕެނަލްޓީ އޭރިއާ ބޭރުން ހަމްޒާ މުހައްމަދު (ހަމްޕު) ފޮނުވާލި ހަމަލާ، މާޒިޔާގެ ކީޕަރު ހުސައިން ވަނީ ހުޝިޔާރުކަމާއެކު ދިފާއުކޮށްފައެވެ.
މެޗު ނިމެނިކޮށް މާޒިޔާގެ ކެޕްޓަން އަސައްކޮއަށް ނަތީޖާ ހަމަހަމަކޮށްލުމަށް ދެ ފުރުސަތެއް ލިބިގެންދިޔައެވެ. އާދަމް ނާސިހު ނަގައިދިން ހުރަހަކުން ލިބުނު ފުރުސަތާއި ކޯނެލިއަސް ނަގައިދިން ހުރަހަކުން ލިބުނު ފުރުސަތުން އަސައްކޮ ފޮނުވާލި ހަމަލާ ވެސް ގޯލާ އަމާޒުވެފައެއް ނުވެއެވެ.
ލީގުގައި މާދަމާ ވެސް ދެ މެޗު ކުޅުމަށް ހަމަޖެހިފައިވެއެވެ. މާދަމާ ހަވީރު 4:00ގައި ކުޅޭ މެޗުގައި ކްލަބު އީގަލްސްއާއި ޓީސީ ސްޕޯޓްސް ކްލަބު ބައްދަލުކުރާ އިރު، މާދަމާ ރޭ 9:00ގައި ކުޅޭ މެޗުގައި ބައްދަލުކުރާނީ ވިކްޓަރީ ސްޕޯޓްސް ކްލަބާއި ފ. ނިލަންދޫއެވެ.