08 Jul 2018, 15:33
މަރުހޫމް އިބްރާހިމް ޝިހާބުގެ ވާދައިގެ ތައްޓަށް ކޮންމެ އަހަރަކުވެސް ބާއްވަމުން އަންނަ ވާހަކަދެއްކުމުގެ ގައުމީ މުބާރަތުގެ 33 ވަނަ މުބާރާތް ފަށައިފިއެވެ.
މޯލްޑިވްސް ޕޮލިޓެކްނިކްގައި މިއަދު ހެނދުނު ބޭއްވި ރަސްމިއްޔާތުގައި އެ މުބާރާތް އިފްތިތާހް ކޮށްދެއްވީ އެޑިއުކޭޝަން މިނިސްޓަރު ޑރ. އައިޝަތު ޝިހާމްއެވެ.
މިއަދު ފެށި މުބާރާތާ ބެހޭގޮތުން މައުލޫމާތު ދެއްވަަމުން ދިވެހި ބަހުގެ އެކެޑަމީގެ ރައީސް އަޝްރަފް އަލީ ވިދާޅުވީ މިފަހަރުގެ މުބާރާތުގައި 18 ސްކޫލަކުން، ތިން އުމުރު ފުރައަކުން 250 ދަރިވަރުން ބައިވެރިވާ ކަމަށެވެ.
33 ވަަނަ ވާހަކަދެއްކުމުގެ ގައުމީ މުބާރާތް ފެށުމަށް މިއަދު ބޭއްވި ރަސްމިއްޔާތުގެ ތެރެއިން--- ފޮޓޯ: އެޑިއުކޭޝަން މިނިސްޓްރީ
މިފަހަރު މުބާރާތުގައިވެސް މާލެ އާއި އަތޮޅުތަކުގެ ސްކޫލުތަކުގެ ދަރިވަރުން ވަނީ ބައިވެރިވެފައެވެ. އެ މުބާރާތުގައި، ފުވައްމުލަކު ސިޓީގެ ޖަމާލުއްދީން ސްކޫލުން އަލަށް ވަނީ ބައިވެރިވެފައެވެ.
ރާއްޖެތެރޭގެ ސްކޫލުތަކުން މީގެ ކުރިން ނުލިބޭފަދަ ތަރުހީބެއް އެ މުބާރާތަށް ލިބިފައިވާ ކަމަށްވެސް އަޝްރަފް ވިދާޅުވިއެވެ.
ވާހަކަ ދެއްކުމުގެ މުބާރާތް މިމަހުގެ 18 ވަނަ ދުވަހު ނިމޭ އިރު، އޮފީސްތަކަށާއި ޖަމިއްޔާތަކަށާއި ކްލަބްތަކަށް ހުޅުވާލައިގެން ބާއްވާ ގައުމީ ބަހުސް މުބާރާތް ފެށޭނެ ކަމަށްވެސް އަޝްރަފް ވިދާޅުވިއެވެ.
33 ވަަނަ ވާހަކަދެއްކުމުގެ ގައުމީ މުބާރާތް ފެށުމަށް މިއަދު ބޭއްވި ރަސްމިއްޔާތުގެ ތެރެއިން--- ފޮޓޯ: އެޑިއުކޭޝަން މިނިސްޓްރީ
މިއަހަރުގެ ގައުމީ ބަހުސް މުބާރާތުގައި ހަތް ޓީމެއް ބައިވެރިވާ ކަމަށްވެސް އަޝްރަފް ވިދާޅުވިއެވެ. އޭގެ ތެރޭގައި އެމްއެންޑީއެފްގެ ދެ ޓީމްވެސް ހިމެނެއެވެ.