05 Jul 2018, 16:44
ދިއްލީ (ޖުލައި 5): އިންޑިއާގެ ވެރިރަށް ދިއްލީގެ ގެޔެއްގައި މަރުވެފައި ވަނިކޮށް ފެނުނު އެއް އާއިލާއެއްގެ 11 މީހުން މަރުވެފައި ވަނީ އަމިއްލައަށް ކަމަށް ސީސީޓީވީ ފުޓެޖުން ދޭހަވާ ކަމަށް އެގައުމުގެ ފުލުހުން ބުނެފި އެވެ.
އިންޑިއާގެ މީޑިއާތަކުން އާއްމުކޮށްފައިވާ އެފުޓެޖުން ފެންނަނީ އެއާއިލާއަށް ނިސްބަތްވާ ދެ އަންހެނަކު ގޮނޑިތަކެއް ހިފައިގެން ގެޔަށް ވަންނަ މަންޒަރެވެ. އެގޮނޑިއަކީ އެމީހުން ދަންޖެހެން ބޭނުން ކުރި ގޮނޑިތައް ކަމަށް ރިޕޯޓުތަކުގައިވެ އެވެ.
ފުލުހުން ވަނީ އެފުޓެޖު ފެނުނު ނަމަވެސް، އެމީހުން މަރުވީ އަމިއްލައަށް ކަމަށް އަދި ނިންމާފައި ނުވާ ކަމަށާއި އެމައްސަލަ އަދި ވެސް ތަހުގީގު ކުރަމުންދާ ކަމަށް ބުނެފަ އެވެ.
"ކަން ހިނގި ގޮތް ރަނގަޅަށް ދެނެގަތުމަށް ޓަކައި ފާއިތުވި ތިން މަސް ދުވަހުގެ ސީސީޓީވީ ފުޓެޖު ބަލަން ޖެހޭނެ،" ޕޮލިސް އޮފިސަރަކު ވިދާޅުވި އެވެ.
ދިއްލީގައި މަރުވެފައި ތިއްބާ ފެނުނު އާއިލާ -- ފޮޓޯ: އެންޑީޓީވީ
އެ އާއިލާގައި ހިމެނޭ މީހުންގެ ތެރޭގައި 75 އަހަރުގެ ނަރާޔަން ދޭވީ، އޭނާގެ އަންހެން ދަރިފުޅާއި ދެ ފިރިހެން ދަރިން، އެ ދެ ފިރިހެނުންގެ އަނބިންނާއި އެމީހުންގެ ފަސް ކުދިން ހިމެނެ އެވެ.
މިދިޔަ ހޮނިހިރު ދުވަހު އެމީހުން މަރުވެފައި ތިއްބާ ފެނުނު އިރު، އޭގެ ތެރެއިން 10 މީހުން ވަނީ އަތް ފުރަގަހަށް ބަނދެ، ކަނުބަނދެފައި ކަމަށް ފުލުހުން ބުންޏެވެ. އަދި ފުލުހުން ވަނީ ދޭވީގެ ހަގު ފިރިހެން ދަރިފުޅު، ލަލިތު ބާތިއާއަށް ނިސްބަތްވާ 11 ޑައިރީއެއް ހޯދައިފަ އެވެ.
އެޑައިރީތަކުގައިވާ ގޮތުން، 2008 ވަނަ އަހަރު މަރުވި ބާތިއާގެ ބައްޕަ ވަނީ އޭނައަށް "އަވަލާފައި" އެވެ. އަދި އެމީހުން މަރުވީ، "ބައްޕަގެ ރޫހު" އައިސް އެމީހުން ސަލާމަތް ކުރާނެ ކަމަށް ގަބޫލު ކުރެވޭތީ ކަމަށް ޑައިރީން ދޭހަވާ ކަމަށް ފުލުހުން ބުންޏެވެ.
އެއާއިލާގެ އަވަށްޓެރިން ވަނީ އެއީ މުޖުތަމައުގައި ވަރަށް ހަރަކާތްތެރި ބައެއް ކަމަށް ބުނެފަ އެވެ. އަދި އެއީ "ދީނީ، އުފާވެރި، މާލީ ގޮތުން ތަނަވަސް" ބަޔެއް ކަމަށް ބުނެފަ އެވެ.
އެއާއިލާގެ އެންމެ ދޮށީ މާމަ ދަރިފުޅު، ޕްރިޔަންކާ، 33، ވަނީ މީގެ ދެ ހަފްތާ ކުރިން އެންގޭޖް ވެފަ އެވެ. އަދި އެކަން ފާހަގަ ކުރުމަށް އެއާއިލާ އިން ވަނީ ވަރަށް ބޮޑު ޕާޓީއެއް ވެސް ބާއްވައިފަ އެވެ. (ބީބީސީ)