03 Jul 2018, 14:02
ކުއަލަލަމްޕޫރު(ޖުލައި 3): މެލޭޝިއާގެ އެންޓި ކޮރަޕްޝަން ކޮމިޝަން (އެމްއޭސީސީ)ގެ އޮފިސަރުން އެގައުމުގެ ކުރީގެ ބޮޑުވަޒީރު ނަޖީބު ރައްޒާގު ހައްޔަރުކޮށްފިއެވެ.
ނަޖީބު ރައްޒާގުގެ އާއިލާގެ ވަކީލާ ހަވާލާދީ ޗެނަލް ނިއުސް އޭޝިއާގައިވާ ގޮތުން އޭނާ ހައްޔަރު ކުރީ ގެކޮޅުގައި ހުންނަވަނިކޮށެވެ. އަދި ނަޖީބުގެ މައްޗަށް މާދަމާ ދައުވާ ކުރުމަކީ އެކަށީގެންވާ ކަމެކެވެ.
މެލޭޝިއާގެ އިންވެސްޓްމެންޓު ފަންޑު، ވަންއެމްޑީބީގެ ހިޔާނާތުގެ މައްސަލައާ ގުޅިގެން އެމްއޭސީސީން ވަނީ ދެފަހަރެއްގެ މަތިން ނަޖީބާ ސުވާލުކޮށްފައެވެ.
އެމްއޭސީސީގައި އިސްކޮށް ހުންނަވާ މުހައްމަދު ޝުކުރީ އަބްދުﷲ ވިދާޅުވި ގޮތުގައި ނަޖީބު އެކޮމިޝަނަށް ހާޒިރު ކުރީ ވަންއެމްޑީބީގެ ސަބްސިޑަރީ ކުންފުންޏެއް ކަމަށްވާ އެސްއާރުސީ އިންޓަނޭޝަނަލްއާ ބެހޭ ގޮތުން ސުވާލު ކުރުމަށްޓަކައެވެ.
ރޮއިޓާސްގައިވާ ގޮތުން އެމްއޭސީސީއިން ތަހުގީގު ކުރަމުންދަނީ އެސްއާރުސީން ނަޖީބުގެ އެކައުންޓަށް 10.6 މިލިއަން ޑޮލަރު ޖަމާކުރި މައްސަލައެކެވެ.
އެމައްސަލައާ ގުޅިގެން މެލޭޝިއާގެ ފުލުހުން ވަނީ ނަޖީބާ ގުޅުން ހުރި ހަ އެޕާޓްމެންޓެއް މެއި މަހު ފާސްކޮށްފައެވެ. އަދި އެއެޕާޓްމެންޓުތަކުން ފެނުނު ގަހަނާ އާއި އަތްދަބަހާއި ގަޑިތަކުގެ އަގު އަރާ ކަމަށް ފުލުހުން ވަނީ މިދިޔަ ހަފްތާގައި ބުނެފައެވެ. އަދި އެތަކެއްޗާ ބެހޭ ގޮތުން ނަޖީބާއި އަނބިކަނބަލުން ރޮސްމާ މަންސޫރާ ސުވާލު ކުރާނެ ކަމަށް ބުނެފައެވެ.
އެމެރިކާގެ ޖަސްޓިސް ޑިޕާޓްމެންޓުން ތުހުމަތުކުރާ ގޮތުގައި 1އެމްޑީބީ ފަންޑުން ވަނީ 4.5 ބިލިއަން ޑޮލަރު ޑައިވާޓުކޮށް، ލޯންޑާކޮށްފައެވެ. އަދި އެފަންޑުން ވަނީ 700 މިލިއަން ޑޮލަރާ ގާތް ކުރާ ވަރަށް ފައިސާ ނަޖީބުގެ އަމިއްލަ އެކައުންޓަށް ޖަމާކޮށްފައި ކަމަށް ވޯލް ސްޓްރީޓް ޖާނަލްއިން 2015 ވަނަ އަހަރު ތުހުމަތުކުރިއެވެ.
ނަމަވެސް މެލޭޝިއާގެ ކޯޓަކުން ވަނީ އެ 700 މިލިއަން ޑޮލަރަކީ ސައުދީ ޝާހީ އާއިލާއިން، ނަޖީބަށް އެރުވި ހަދިޔާއެއް ކަމަށް ނިންމާފައެވެ.