01 Jul 2018, 22:20
އދ. ފެންފުށިން ޒުވާނަކު ގެއްލިގެން އެމްއެންޑީއެފުން ހޯދަމުން އެބަދެއެވެ.
އެމްއެންޑީއެފުން ބުނީ، އދ. ފެންފުށިން އުމުރުން 29 އަހަރުގެ ފިރިހެނެއް ގެއްލިގެން ރިޕޯޓްކޮށްފައިވަނީ މިއަދު ހަވީރު 17:15 ގައި ކަމަށާއި އޭނާ ހޯދުމުގެ މަސައްކަތް މާލޭ އޭރިއާ ކޯސްޓްގާޑް ސްކޮޑަރުން ކުރަމުން އަންނަ ކަމަށެވެ.
ފެންފުށިން ގެއްލިގެން ހޯދަމުން އަންނަނީ އެ ރަށު ޕޭންޒީގޭ އަދުނާން އަހްމަދު، 29 އެވެ.
އަދުނާނުގެ އާއިލާއިން 'ސަން' އާ ވާހަކަ ދެއްކި މީހަކު ބުނީ އަދުނާނު ވަނީ ރޭ ދަންވަރު 12:00 އެހައިކަންހާއިރު، ޑިންގީއެއްގައި ފުރައިގެން ގޮސްފައި ކަމަށެވެ. ނަމަވެސް އޭނާ ދިޔައީ ކޮންތާކަށް ކަމެއް އާއިލާއަކަށް ނޭނގެއެވެ. އަދި އަދުނާނަނީ މީގެ ކުރިން އާންމު ގޮތެއްގައި ޑިންގީގައި ދަތުރުކޮށް ހަދާ ޒުވާނެއް ނޫން ކަމަށް ވެސް އާއިލާއިން ވާހަކަ ދެއްކި މީހާ ބުންޏެވެ.
އަދުނާނަކީ ސިއްހަތު ސަލާމަތުން ހުރި ނަފްސާނީ ގޮތުން އެއްވެސް ކަހަލަ ބަލި ކަމެއް ނެތް ޒުވާނެއް ކަމަށް އާއިލާއިން ބުންޏެވެ.
އެމްއެންޑީއެފް އިން ބުނީ އަދުނާނު އެންމެ ފަހުން ފެނުނުއިރު ލައިގެން ހުރީ މަޑު ނޫކުލައިގެ އަތްދިގު ގަމީހަކާއި ޖިންސެއް ކަމަށެވެ.