26 Jun 2018, 17:45
މަތީ ތައުލީމުގެ ފުރުސަތުތައް ދިވެހި ދަރިވަރުންނަށް ފަހިކޮށްދިނުމުގެ ގޮތުން ޑިޕާޓްމަންޓް އޮފް ހަޔާ އެޑިއުކޭޝަނުން 598 ދަރިވަރަކަަށް ލޯނުދީފިއެވެ.
ލޯނާބެހޭ ގޮތުން މައުލޫމާތު ދެއްވަމުން އެޑިއުކޭޝަން މިނިސްޓްރީގެ ސްޓޭޓް މިނިސްޓަރު ޑރ. އަބްދުﷲ ނަޒީރު ''ސަން'' އަށް ވިދާޅުވީ ލޯނަށް އެދުނު ދަރިވަރުންނަށްގެ ތެރެއިން ވީހާވެސް ގިނަ ދަރިވަރުންނަށް ލޯނުދެވޭތޯ ބެލިކަމަށެވެ.
''މިފަހަރު ހުޅުވާލީ ލޯނުގެ 502 ފުރުސަތު. އެހެންނަަމަވެސް ލޯނަށް ކުރިމަތިލި ދަރިވަރުންގެ ތެރެއިން ޝަރުތުހަމަވާ ކޮންމެ ދަރިވަރަކަށް ލޯނުވަނީ ދެވިފައި،" ނަޒީރު ވިދާޅުވިއެވެ.
މިއީ މާޗް މަހު ހުޅުވާލި ލޯނުގެ ފުރުސަތުތަކެކެވެ.
މިފަހަރު ލޯނު ދިން ދާއިރާތަކުގެ ތެރޭގައި ރާއްޖެއާއި ރާއްޖެއިން ބޭރުގެ އެކި ކޯސްތައް ހިމެނެއެވެ. އޭގެ ތެރޭގައި ޑިޕްލޮމާ އިން ފެށިގެން ޕީއެޗްޑީއާ ހަމައަކަށް ކިޔެވުމުގެ ފުރުސަތުތައް ހިމެނެއެވެ. އެގޮތުން އެމްބީބީއެސް، ޓީޗިންގް، ޕައިލެޓް ލައިސަންސް، ބިޒްނަސް، އިންޖިނިއަރިންގެ އެކި ކޯސްތައް ހިމެެނެއެވެ.
ހަޔާ އެޑިއުކޭޝަން ޑިޕާޓްމަންޓުން ބުނީ އަންނަ ސެޕްޓަމްބަރު މަހުވެސް މަތީ ތައުލީމުގެ 500 ލޯނުގެ ފުރުސަތު ހުޅުވާލުމަށް ނިންމައިފައިވާ ކަމަށެވެ.
ލޯނު ދިންލިސްޓުގައިއެއްވެސް މައްސަލައެއް އުޅޭނަމަ ޝަކުވާ ހުށަހެޅުމަށް ނުވަތަ މައުލޫމާތު ސާފުކުރައްވަން ބޭނުންފުޅުވާނަމަ "ލޯނު ސްކީމާބެހޭ މައުލޫމާތު ސާފުކުރުމަށް އެދޭ ފޯމް'' ފުރިހަމަ ކުރުމަށް ފަހު އަންނަ ބުރާސްފަތި ދުވަހުގެ 13:00 ގެ ކުރިން އެ ޑިޕާޓްމަންޓަށް ހުށަހަޅަން ޖެހޭނެ ކަމަށް ހަޔާ އެޑިއުކޭޝަން ޑިޕާޓްމަންޓުން ބުންޏެވެ.