14 Jun 2018, 12:12
މުމްބާއީގައި ހުންނަ ބޮލީވުޑް ބަތަލާ ދީޕިކާ ޕަދުކޯން ދިރިއުޅޭ އިމާރާތުގައި ނުރައްކާތެރި އަލިފާނުގެ ހާދިސާއެއް ހިނގައިފިއެވެ.
އަލިފާން ރޯވެފައި ވަނީ އެ އިމާރާތުގެ 33 ވަނަ ފަންގިފިލާގައެވެ. އެ ހާދިސާގައި މީހަކަށް ގެއްލުން ނުވި ނަމަވެސް، އަލިފާން ނިއްވުމުގައި ހަރަކާތްތެރިވި ދެ އޮފިސަރުންނަށް ދުމުގެ އަސަރުކޮށްގެން ހޮސްޕިޓަލުގައި އެނދުމަތިކޮށް ފަރުވާ ދީފައިވެއެވެ.
އަލިފާނުގެ ހާދިސާ އާއި ގުޅިގެން ގިނަ ބަޔަކު ވަނީ ދީޕިކާގެ ޚަބަރެއް ނުވެގެން ކަންބޮޑުވުން ފާޅުކޮށްފައެވެ. ދީޕިކާ ދިރިއުޅޭ ގޭގެ އިތުރުން އޭނާގެ އޮފީސް ވެސް ހުންނަނީ އެ އިމާރާތުގައެވެ.
ނަމަވެސް އަލިފާނުގެ ހާދިސާ ހިނގި އިރު ދީޕިކާ ގެއަކު ނެތެވެ. ދީޕިކާ އޭރު އުޅުނީ އިޝްތިހާރެއް ޝޫޓު ކުރުމަށް ބޭރުގައެވެ.
ދީޕިކާ ވަނީ ޓުވީޓެއް ކޮށް، އޭނާގެ ހާލު ރަނގަޅު ކަމަށް ބުނެފައެވެ. އަދި އޭރު ގޭގައި ތިބި އޭނާގެ މުވައްޒަފުން ވެސް ގެއްލުމެއް ނުލިބި އިމާރާތުން ވަނީ ނުކުމެފައެވެ.
ދީޕިކާ އެ އިމާރާތުން ގެއެއް ގަނެފައި ވަނީ 2010 ވަނަ އަހަރު އޭނާގެ ބައްޕަ ޕަރްކާޝް ޕަދުކޯން އާއެކު އެވެ. ގޭގެ ރަޖިސްޓްރީ ވެސް އޮންނަނީ ދެމީހުންގެ ނަން މަތީގައެވެ.