03 Jun 2018, 15:07
މިދިޔަ ބުދަ ދުވަހު ހއ. އިންނަފިނޮޅު ފަރަށް އުރުނު ބޭރު ގައުމެއްގެ ބޯޓުން ރަށްތަކަށް ލެއްގި މަސްތުވާތަކެތީގެ ތެރެއިން މިހާތަނަށް 115 ކިލޯގުރާމްގެ މަސްތުވާތަކެތި ހޯދިފައިވާ ކަމަށް ފުލުހުން ބުނެފިއެވެ.
ފުލުހުން އެކަން ހާމަކުރީ އެ މައްސަލައާ ގުޅިގެން ފުލުހުންނާއި ސިފައިން ގުޅިގެން ކުރިއަށް ގެންދާ އޮޕަރޭޝަނާ ގުޅޭ މައުލޫމާތު ހިއްސާކުރުމަށް މިހާރު އިސްކަންދަރު އޮތް ޕްރެސް ކޮންފަރެންސްއެއްގައެވެ.
ފުލުހުންގެ އިންފޮމޭޝަން އޮފިސަރު ސުޕްރިންޓެންޑެންޓް އޮފް ޕޮލިސް އަހްމަދު ޝިފާން ވިދާޅުވީ، މިހާތަނަށް ފެނުނު މަސްތުވާތަކެއްޗަކީ ފަސް ރަށަކަށް ލެއްގި މަސްތުވާތަކެތި ކަމަށެވެ. ނަމަވެސް ބޯޓް އަންދާލަން މަސައްކަތް ކުރުމުގެ ސަބަބުން ބައެއް ޕެކެޓްތައް އަނދައި ސީދާ ބޯޓުގެ ހުރީ ކިހާ އަދަދެއްގެ މަސްތުވާތަކެތިކަން ޔަގީންކޮށް ބުނަން ނޭންގޭ ކަމަށް ޝިފާން ވިދާޅުވިއެވެ.
ޖުމްލަ 115 ކިލޯގްރާމުގެ މަސްތުވާތަކެތި ފެނިފައިވަނީ އެކި ރަށްރަށް ލައްގާފައި ހުއްޓައެވެ. އެގޮތުން ހއ. މޮޅަދޫއިން މިމަހުގެ އެއްވަނަ ދުވަހު 300 ގްރާމް މަސްތުވާ އެއްޗިއްސާއި ޖެހިގެން އައި ދުވަހު ހއ. އިހަވަންދޫއިން 380 ގްރާމްގެ މަސްތުވާ އެއްޗެހިވެސް ފެނިފައިވާ ކަމަށް ޝިފާން ވިދާޅުވިއެވެ.
ޝިފާން އިތުރަށް ވިދާޅުވީ، އެ ބޯޓުގައި ތިބި އަށް ފަޅުވެރިން މިވަގުތު ތިބީ ފުލުހުންގެ ބެލުމުގައި ދަށުގައި ކަމަށެވެ. އެމީހުންގެ ތެރޭގައި ހިމެނެނީ ޕާކިސްތާންގެ މީހަކާއި އިރާނުގެ ހަތް މީހަކު ކަމަށް ވިދާޅުވިއެވެ. އަދި ވިދާޅުވީ، މިހާތަނަށް ހެދި ޓެސްޓުތަކުން އެ އެންމެންވެސް މަސްތުވާތަކެތީގެ ބާވަތްތަކަށް ޕޮޒިޓިވްވެފައިވާ ކަމަށެވެ.
މީގެ ކުރިން އެ ބޯޓު ދެ ފަހަރެއްގެ މަތިން ރާއްޖެ އައިސްފައިވާ ކަމަށް ބައެއް ފަރާތްތަކުން ދައްކާ ވާހަކައަށް އެމްއެންޑީއެފުން ވަނީ ރައްދު ދީފައެވެ. ކޯސްޓްގާޑުގެ ޕްރިންސިޕަލް ޑައިރެކްޓަރު ކޯސްޓްގާޑު މުހައްމަދު ސަލީމް ވިދާޅުވީ ހުއްދަ ހޯދައިގެން އެ ބޯޓު ރާއްޖެއަށް މީގެ ކުރިން އައިސްފައި ނެތް ކަމަށެވެ. އަދި ގަވައިދާ ހިލާފަށް ވަދެގެން އުޅެނިކޮށް ރާޑަރަށްވެސް އަރާފައި ނުވާކަމަށް ސަލީމް ވިދާޅުވިއެވެ.
ސަލީމް ވިދާޅުވީ އެ ބޯޓު ފަރަށް އަރަފައިވާ ކަމަށް ބުނެ މަސްވެރިން ރިޕޯޓުކުރުމުން އެންމެ ފުރަތަމަ އެތަނަށް ދިޔައީ ހޯރަފުށީގައި އޮތް ސީ އެމްބިއުލާންސް ކަމަށެވެ. އަދި އެތަނަށް ޔުނިފޯމުގައި ތިބި ސިފައިން ފެނުމުން އެމީހުން ބޯޓުގައި ރޯކޮށްލައި، ލައިފް ޖެކެޓާއެކު ކަނޑަށް ފުންމާލީ ކަމަށް އެތަނަށް އެޓެންޑްވި ސިފައިންނާ ހަވާލައިދީ ސަލީމް ވިދާޅުވިއެވެ.
އަދި އެމީހުންގެ ކިބައިގައި ޝައްކު ކުރެވޭ ކަންތައްތަކެއް ހުރުމުން ފުލުހުންނަށް އެކަން ރިޕޯޓު ކުރީ ކަމަށްވެސް ވިދާޅުވިއެވެ.
"އަޅުގަނޑުމެންގެ ޔުނިފޯމުގައި ތިބި މީހުން ފެނުނީމަ އުޅަނދު ރޯކޮށްލުމުގެ މަންޒަރު އަޅުގަނޑުމެންނަސް ފެނިގެން ދިޔައީ. އޭރުވެސް ކަނޑުމަތި ވަރަށް ގަދަ ވަގުތަކަށް ވާތީ ލައިފް ޖެކެޓު އަޅައިގެން އެމީހުން މޫދަށް ފުންމާލީ" ސަލީމް ވިދާޅުވިއެވެ.