26 May 2018, 15:20
ރެއާލް މެޑްރިޑަކީ ޔޫރަޕްގެ އެންމެ ކާމިޔާބު ޓީމެވެ. މިހާތަނަށް 12 ފަހަރު ޔޫރަޕްގެ ޗެމްޕިއަންކަން ހޯދައިފައިވާ ރެއާލްއަކީ އެންމެފަހުން ދެ އަހަރުވެސް ޔޫރަޕްގެ ޗެމްޕިއަނުންނެވެ. ރެއާލްގެ ސްކޮޑުގައި ހިމެނޭ މުހިއްމު ކުޅުންތެރިންގެ ތެރެއިން ޗެމްޕިއަންސް ލީގުގެ ރަން މެޑަލް އަޅާނުލާ ކުޅުންތެރިއަކު ނެތެވެ.
މިދިޔަ ދެ އަހަރުވެސް ޗެމްޕިއަންސް ލީގުގެ ފައިނަލްގައި ރެއާލްގެ ކޯޗަކީ ކުރިން ކްލަބަށް ކުޅެ، ކުޅުންތެރިއެއްގެ ގޮތުގައިވެސް ޗެމްޕިއަންސް ލީގު ކާމިޔާބުކުރި ޒައިނުއްދީން ޒިދާނެވެ. މެނޭޖަރެއްގެ ގޮތުގައި ޒުވާން ނަމަވެސް ޒިދާންގެ ތަޖުރިބާ ބޮޑެވެ. ހާއްސަކޮށް ޗެމްޕިއަންސް ލީގަކީ ޒިދާންއާ ގާތް މުބާރާތެކެވެ.
ރެއާލްގެ ފަރިތަކުރުންތަކުގައި އެޓީމުގެ ތަރި ރޮނާލްޑޯ --- ފޮޓޯ/ އޭޕީ
މި ސީޒަނަކީ ރެއާލްއަށް ލޯކަލް މުބާރާތްތަކުގައި ކާމިޔާބު ސީޒަނެއް ނޫން ނަމަވެސް ޗެމްޕިއަންސް ލީގުގައި ރެއާލް އަބަދުވެސް "ޖާދޫ" ދައްކަމުން ދެއެވެ. ހާއްސަކޮށް މެޗުތަކުގެ ފަހު ވަގުތުވެސް ނަތީޖާ ބަދަލުކޮށް، ރެއާލް ފައިނަލާ ހަމައަށް އައީ ވަރުގަދަ މެޗުތަކަކަށް ފަހުގައެވެ.
"ފައިނަލަކީ ފިފްޓީ ފިފްޓީ މެޗެއް،" ކަމަށް މެޗުގެ ކުރިން ޒިދާން ބުނި ނަމަވެސް ތަޖުރިބާއަށް ބަލައި ރެއާލްއަށް ކުރިލިބެއެވެ. މިދިޔަ 10 އަހަރަކީ ޔޫރަޕްގެ ފުޓުބޯޅައިގައި ލިވަޕޫލަށް އެންމެ ކާމިޔާބު އަހަރުތަކަކަށް ނުވި ނަމަވެސް، ލިވަޕޫލްގެ ޗެމްޕިއަންސް ލީގުގެ ތާރީހުގައިވެސް "ތަފާތު" ދައްކާފައިވެއެވެ.
ލިވަޕޫލުން ފަސް ފަހަރު ޗެމްޕިއަންސް ލީގު ކާމިޔާބުކޮށްފައިވާ އިރު، އެޓީމަކީ ޔޫރަޕްގައި އެންމެ ކާމިޔާބު އިނގިރޭސި ޓީމެވެ. އެންމެފަހުން ލިވަޕޫލަށް ޗެމްޕިއަންސް ލީގު ތަށި އުފުލާލެވުނީ 2005 ވަނަ އަހަރު އިސްތާންބޫލްގައި ކުޅުނު ފައިނަލްގައެވެ. އެ މެޗަށް އެކަނި ބަލާލިޔަސް ޗެމްޕިއަންސް ލީގު ފައިނަލެއްގައި ލިވަޕޫލްގެ ފަރާތުން އާދަޔާޚިލާފު ކަންކަން ފެނިދާނެ ކަން ޔަގީން ކުރެވޭނެއެވެ.
އޭސީ މިލާންއިން ފުރަތަމަ ހާފް 3-0ގެ ނަތީޖާއަކުން ކުރީގައި އޮވެ ނިންމާލި އިރު، ލިވަޕޫލުން ދެވަނަ ހާފްގައި ނަތީޖާ ހަމަހަމަ ކުރިއެވެ. އަދި ޕެނެލްޓީގައި މިލާން ބަލިކޮށް ލިވަޕޫލުން ތަށި އުފުލާލި އިރު، ކްލަބުގެ ސަޕޯޓަރުންގެ ހިތްވަރަކީ މިއަދުވެސް "އިސްތާންބޫލް ފައިނަލް"އެވެ.
ލިވަޕޫލް ޓީމުގެ އެންމެފަހުގެ ފަރިތަކުރުންތަކުގެ ތެރެއިން --- ފޮޓޯ/ އޭޕީ
ޖެހިގެން އައި 2006-07 ވަނަ އަހަރުގެ ސީޒަންގެ ޗެމްޕިއަންސް ލީގުގެ ފައިނަލަށްވެސް ލިވަޕޫލް ދަތުރުކުރި އިރު، މިދިޔަ 10 ވަރަކަށް އަހަރަކީ ލިވަޕޫލަށް ޔޫރަޕްގައި ދަށް އަހަރުތަކެކެވެ. މިރޭގެ ފައިނަލަށް ލިވަޕޫލާއި ރެއާލް ނުކުންނަ އިރު، އެދެޓީމު މީގެ ކުރިން ޔޫރަޕްގެ މުބާރާތެއްގެ ފައިނަލްގައި ކުޅެފައި ވަނީ 1981 ވަނަ އަހަރުގައެވެ. އެ ފައިނަލް ކާމިޔާބުކުރީ ލިވަޕޫލެވެ.
"ގިނަ ބަޔަކު ހީނުކުރާނެ ލިވަޕޫލް ފައިނަލަށް ދާނެ ކަމަކަށް، އެކަމަކު 'މިއީ ލިވަޕޫލް،' " މެޗުގެ ކުރިން ވާހަކަ ދައްކަމުން ކޯޗު ޔާގަން ކްލޮޕް ބުންޏެވެ. ލިވަޕޫލްގެ ސްކޮޑަކީ ޗެމްޕިއަންސް ލީގުގެ ފައިނަލަށް އާ ސްކޮޑެއް ނަމަވެސް، މި ސީޒަންގައި ޓީމުގެ ކުޅުމުން އެކަން ނުފެނެއެވެ.
ކްލޮޕް ބުނީ މެޗު ފެށުމުގެ ކުރިން މޮޅުވާނެ ކަމުގެ އުންމީދު ބޮޑީ ރެއާލްއަށް ނަމަވެސް މެޗު ފެށުމާއެކު ދެން ދައްކަން ޖެހޭނީ އެހެން ވާހަކައެއް ކަމަށެވެ.
ލިވަޕޫލްގެ "ޔޫރަޕިއަން ލެގަސީ"އަކީ އެޓީމަށް ލިބޭނެ ހިތްވަރެވެ. ސަޕޯޓަރުންނަށް ލިވަޕޫލްއާ ދޭތެރޭ އޮންނަ އިތުބާރު، މިހާރުން ފެށިގެން ސަޕޯޓަރުން ނަގަމުންދާ ފޯރިން އެނގެއެވެ. ޔުކުރެއިންގެ ކިއޭވްއަށް ޖަމާވެފައިވާ ސަޕޯޓަރުންގެ އަޑު އިންތިހާއަށް ގަދެވެފައިވާ އިރު، މިރޭގެ ފައިނަލަކީ އެތަކެއް ކުޅުންތެރިންގެ ދިރިއުޅުން ބަދަލުކޮށްލާނެ ފައިނަލެކެވެ.
ލިވަޕޫލްގެ ކުރިއަށް ކުޅޭ މުހައްމަދު ސަލާހާއި ސަޑިއޯ މަނޭ އަދި ރޮބާޓޯ ފިރްމީނޯގެ އެޓޭކް ހުއްޓުވުމަށް ރެއާލްއަށް މަޖުބޫރުވާ އިރު، އޭގެ ތެރެއިން ސަލާހާއި ފިރްމީނޯ ވަނީ ކޮންމެ ކުޅުންތެރިއަކު ޗެމްޕިއަންސް ލީގުގައި 10 ގޯލް ޖަހައިފައެވެ. މަނޭ ވަނީ ނުވަ ގޯލް ޖަހައިފައެވެ.
ލިވަޕޫލް ސަޕޯޓަރުން މިރޭގެ ފައިނަލަށް ފޯރި ނަގަމުންދަނީ --- ފޮޓޯ/ އޭޕީ
ރެއާލްގެ އެންމެ މުހިއްމު ހަތިޔާރަކީ ރޮނާލްޑޯއެވެ. މިހާތަނަށް ޗެމްޕިއަންސް ލީގުގައި 15 ގޯލް ޖަހައިފައިވާ ރޮނާލްޑޯ ނުކުންނާނީ ލިވަޕޫލް ފައިނަލަށް ގެންދަން 10 ގޯލްޖަހައި، ލީގާއި ޗެމްޕިއަންސް ލީގުގައި މި ސީޒަންގައި ތަފާތު މޮޅު ކުޅުމެއް ދައްކަމުން އަންނަ މިސްރުގެ ސަލާހާ ވާދައަށެވެ. މިރޭގެ ފައިނަލް ވެގެންދާނީ ސަލާހާއި ރޮނާލްޑޯއަށްވެސް މި ސީޒަންގެ ބެލޮންޑިއޯއަށް އެޅޭނެ މުހިއްމު ފިޔަވަޅަކަށެވެ.
ތަރިންގެ ޓީމަކާއެކު ވަރުގަދަކޮށް އޮތް ރެއާލް ހުއްޓުވަން ލިވަޕޫލުން ބޭނުން ކުރާނެ އުކުޅަކީ ކްލޮޕްގެ "ހެވީ މެޓަލް" ފުޓުބޯޅަ ކަމަށް ގިނަ ބަޔަކު ބުނެއެވެ. އެހެން ނަމަވެސް، ރެއާލްއަކީ ޗެމްޕިއަންސް ލީގުގައި ދެވަނައެއް ނެތް ކާމިޔާބު ޓީމެއްކަން ހަނދާން ބަހައްޓަންވެސް ޖެހެއެވެ.
ރެއާލްއާއި ލިވަޕޫލް ވާދަކުރާ ތާރީހީ ފައިނަލް އޮންނާނީ މިރޭ ރާއްޖެ ގަޑިން 11:45 ގައެވެ.