19 May 2018, 15:56
ސެންޓަ ފޭ (މޭ 19): އެމެރިކާގެ ޓެކްސަސްގެ ސްކޫލެއްގައި ބަޑިން ހަމަލާދީ ނުވަ ދަރިވަރަކާއި ޓީޗަރަކު މަރާލައިފި ކަމަށް އެ ސްޓޭޓުގެ ގަވަރުނަރު ވިދާޅުވެއްޖެއެވެ.
ޓެކްސަސްގެ ސެންޓަ ފޭ ހައި ސްކޫލުގައި އެހަމަލާ ދިނީ އެ ސްކޫލުގެ ދަރިވަރެއް ކަމަށްވާ 17 އަހަރުގެ ޑިމިޓްރިއޯސް ޕަގޯޓްޒިސްއެވެ. އޭނާ އެހަމަލާ ދިނީ އޭނާގެ ބައްޕަ ގަނެފައިވާ ބަޑިތަކެއް ބޭނުންކޮށްގެންނެވެ.
ޓެކްސަސްގެ ގަވަރުނަރު ގްރެގް އެބޮޓް ވިދާޅުވި ގޮތުގައި ފުލުހުން މިހާރު ހައްޔަރުކޮށްފައިވާ ޕަގޯޓްޒިސްގެ ޑައިރީއާއި ކޮމްޕިއުޓަރާއި މޮބައިލް ފޯނުން އޭނާ ހަމަލާ ދޭން ތައްޔާރުވިކަން އެނގިފައި ވެއެވެ. އަދި އޭނާ ރޭވީ ހަމަލާ ދިނުމަށްފަހު އަމިއްލައަށް މަރުވާން ކަމަށާއި ނަމަވެސް އޭނާ ފަހުން ފުލުހުންނާ ހަވާލުވީ ކަމަށް އެބޮޓް ވިދާޅުވިއެވެ.
އެމެރިކާގެ ގަން ވަޔަލެންސް އާކައިވްގައި ވާގޮތުން ބަޑީގެ ހަމަލާތަކުގައި މިއަހަރު ތެރޭ އެމެރިކާއިން މަރުވި މީހުންގެ އަދަދު 5،000 އަށް ވުރެ އިތުރެވެ.
އަދި ޓެކްސަސްގައި އެ ހަމަލާ ދީފައިވަނީ އެގައުމުގެ ފްލޮރިޑާގައި ސްކޫލަކަށް ހަމަލާދީ 14 ދަރިވަރުންނާއި ސްކޫލުގެ ތިން މުވައްޒަފުން މަރާލިތާ ތިން މަސް ފަހުންނެވެ.
(ބީބީސީ)