13 May 2018, 23:34
އެމްޑަބްލިއުއެސްސީން މާލޭގައި ގާއިމުކޮށްފައިވާ ފެނުގެ ވިއުގައިގެ މަރާމާތެއް ކުރުމަށްޓަކައި މިރޭ 11:00 އިން ފެށިގެން މާލޭގެ ބައެއް ސަރަހައްދުތަކުން ފެނުގެ ޚިދުމަތް ކަޑާލައިފިއެވެ.
އެމްޑަބްލިއުއެސްސީގެ މީޑިއާ އޮފިޝަލް ސަންއަށް މިރޭ ވިދާޅުވީ، ޑިސްޓްރިބިއުޝަން ޕަމްޕުތަކުގެ މެއިންޓަނެންސް މަސައްކަތްތަކެއް ކުރަމުން ދާތީ، މިރޭ 11:00 އިން ފެށިގެން މާލޭގެ ބައެއް ސަރަހައްދުތަކުން ފެނުގެ ޚިދުމަތް ކެނޑޭނޭ ކަމަށެވެ.
އެގޮތުން ފެން ކެނޑޭނެ ސަރަހައްދުތަކުގެ ތެރޭގައި މާފަތްތަކުރުފާނުމަގުގައި ހިމެނޭ 383، 384، 385 އަދި 386 ނަމްބަރު ކޮށި ހިމެނޭ ކަމަށް އެ ކުންފުނިން ބުންޏެވެ.
އަދި ބޮޑުތަކުރުފާނުމަގުގައި ހިމެނޭ 382 އަދި 387 ނަމްބަރު ކޮށްޓާއި، ބުރުޒުމަގާއި ވައިދެރި ހިނގުމުގައި ހިމެނޭ 204 އަދި 237 ނަމްބަރު ކޮށްޓާއި، ވައިދެރި ހިނގުމުގައި ހިމެނޭ 205 ނަމްބަރު ކޮށްޓާއި، އަމީނީމަގާއި ވައިދެރި ހިނގުމުގައި ހިމެނޭ 239 ނަމްބަރު ކޮށްޓާއި ބުރުޒު މަގުގައިވާ 238 ނަމްބަރު ކޮށީގެ ފެނުގެ ހިދުމަތް ކެނޑޭނެ ކަމަށް އެމްޑަބްލިއުއެސްސީން ބުނެއެވެ.
އެމްޑަބްލިއުއެސްސީން ބުނީ، ފެން މަރާމާތަށްފަހު މިރޭ ފަތިހު 4:00ގެ ކުރިން މި ސަރަހައްދުތަކަށް އަލުން ފެނުގެ ޚިދުމަތް ދިނުމަށް މަސައްކަތް ކުރަމުންދާ ކަމަށެވެ.
އެމްޑަބްލިއުއެސްސީން ބުނީ ފެނުގެ ޚިދުމަތް މެދުކެނޑުމުގެ ސަބަބުން ދިމާވާ ދަތިތަކަށް އެ ކުންފުނިން ނިހާޔަތަށް މައާފަށް އެދޭ ކަމަށެވެ.