02 May 2018, 09:15
ރާއްޖޭގެ އުސޫލުތަކާއި ނިޒާމުތަކަށް ބަދަލު އައިސް ތަހައްމަލު ކުރަމުން އައި އުނދަގޫ ކަންކަމުން ހޭލައި މަގުތައް އަމާންވެ ކުށް ކުރުން މަދުވެއްޖެ ކަމަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމު ވިދާޅުވެއްޖެ އެވެ.
ރޭ 'ރުމާލު 2' ޖަގަހާގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ "މުޅިން އާ އަވޭކްނިން އަކަށް [ހޭލުމަކަށް] ދިވެހިރާއްޖެ އަތުވެއްޖެ" ކަމަށެވެ. އަދި ބޮޑެތި ހައްގުތަކަށް އަރައި ގަންނަ މީހުން މަދުވެއްޖެކަން ފާހަގަކުރައްވައި ރައީސް ޔާމީން ވިދާޅުވީ، މިއަދު ބޮޑެތި ހައްގުތަކަށް އަރައިގަންނަނީ ހައްގުތައް ރައްޔިތުންނަށް ކަށަވަރުކޮށްދޭނެ ކަމަށް ވިދާޅުވާ ލީޑަރުން ކަމަށެވެ.
"އެ ލީޑަރުންނަށް ދެއްކުނީ ކޮން ލެގަސީއެއްތޯ ޑިމޮކްރެސީގެ ނަމުގައި. ދެއްކުނު ލެގަސީއެއް ނެތެއް ނޫންތޯ. އެއިން އެއްވެސް މީހަކަށް ގާނޫނު ތަންފީޒު ކުރާކަށް ނުކެރުނު. އަދި އޭގެން އެއްވެސް މީހަކަށް ކުށް މަދުކުރާކަށް މިކަން ކުރާކަށް ވެސް ނުކެރުނު،" ރައީސް ޔާމީން ވިދާޅުވި އެވެ.
އޭގެ ތެރެ އިން އަބަދު ވެސް "ތަޅާނެ ކުދިން ހޯދާ ވާހަކަ ވެސް އަންނަނީ" ކަމަށް ރައީސް ޔާމީން ވިދާޅުވި އެވެ. އެހެންވީމަ ދޫކޮށްލެވުނު ލެގަސީއެއް ނެތް ކަމަށް ރައީސް ޔާމީން ވިދާޅުވި އެވެ.
އެހެންވީމާ މައްސަލައަކީ ޑިމޮކްރެސީއެއް ނޫން ކަމަށާއި މައްސަލައަކީ މީހުންގެ އަހުލާގާއި ސުލޫކާއި އިހުލާސްތެރިކަން ނެތުން ކަމަށް ރައީސް ޔާމީން ވިދާޅުވި އެވެ.
ރައީސް ޔާމީން ވިދާޅުވީ، އެމަނިކުފާނު ދެކެވަޑައިގަތީ ވަރަށް އުފާވެރި ހުވަފެނެއް ކަމަށެވެ. އަދި ވެސް ދެކެވެޑައިގަންނަވަން ބޭނުންފުޅު ވަނީ ވެސް އެ އުފާވެރި ހުވަފެން ކަމަށް ވިދާޅުވި އެވެ. އޭގެ ތެރޭގައި ރާއްޖެއަކީ ކުށްމަދު ތަނަކަށް ވެގެން ދިޔުމާއި އަންހެނުންގެ ހައްގުތައް ފުރިހަމައަށް ހިމާޔަތް ކުރެވިފައި އޮތް ތަނަކަށް ވުން ހިމެނޭ ކަމަށް ވިދާޅުވި އެވެ.
"އަޅުގަނޑުމެންގެ ހުވަފެނަކީ ދިވެހި ރާއްޖޭގައި އަބަދު ވެސް ބަންގީގެ އަޑު ނުކެނޑި ހުރުން. އަޅުގަނޑުމެންގެ ހުވަފެނަކީ ރާއްޖޭގައި އިސްލާމް ދީން ނޫން ދީނެއް ނެތުން،" ރައީސް ޔާމީން ވިދާޅުވި އެވެ.
ރައީސް ވިދާޅުވީ، އެމަނިކުފާނު ހުވަފެނުން ދެކެވަޑައިގަތީ ބްރިޖް އެޅިފައި ހުރިތަން ކަމަށާއި ބުރިޖް ނޭޅޭނެ ވާހަކައެއް ވިދާޅުނުވާ ކަމަށެވެ. އަދި ރާއްޖެ އަބަދު ސަލާން ޖަހާ ތަނެއްގެ ގޮތުގައި ހުވަފެނުން ނުދެކޭ ކަމަށް ވެސް ވިދާޅުވި އެވެ.