29 Apr 2018, 16:10
ސޯލް (އެޕްރީލް 29) : އުތުރު ކޮރެޔާއިން ނިއުކްލިއާ ޓެސްޓުތައް ކުރާ ފަރުބަދަމަތީ ސަރަހައްދު، މޭ މަހުގެ ތެރޭގައި ބަންދުކުރާނެ ކަމަށް ދެކުނު ކޮރެއާއިން ބުނެފިއެވެ.
ދެކުނު ކޮރެއާގެ ރިޔާސީ ތަރުޖަމާނު ޔުންގް ޔުންގް ޝަން ވިދާޅުވީ އެ ސައިޓު ބަންދުކުރާނެކަމުގެ ޔަގީންކަން ހުކުރު ދުވަހު ބޭއްވި ދެކޮރެއާގެ ސުލްހައިގެ ބައްދަލުވުމުގައި އުތުރު ކޮރެއާގެ ލީޑަރު ކިމް ޖޮންގް އުން، ދެކުނު ކޮރެއާގެ ރައީސް މޫން ޖައެ އިންއަށް ދެއްވާފައި ވާކަމަށެވެ.
އުތުރު ކޮރެއާއިން ނިއުކްލިއާ ހަތިޔާރު ތަޖްރިބާކުރަނީ "ޕުންގްޔެ ރީ" ނަމަކަށް ކިޔާ އެކަހެރި، ފަރުބަދަ މަތީ ސަރަހައްދެއްގައެވެ. އެއީ މީހުން ދިރިއުޅޭ ހިސާބުތަކާ ދުރުގައިވާ، އަދި ވަށައިގެން ފެންސު ޖަހައި ބަންދުކޮށްފައިވާ ސަރަހައްދެކެވެ.
ކޮރެއަން ޕެނިންސިއުލާއަކީ ނިއުކްލިއާ ހަތިޔާރު ގެންގުޅުން މަނާ ސަރަހައްދަކަށް ހެދުމަށް އުތުރު ކޮރެއާގެ ލީޑަރު ކިމް ޖޮންގް އުންއާއި ދެކުނު ކޮރެޔާގެ ރައީސް މޫން ޖައެ އިން ވަނީ އެ ބައްދަލުވުމުގައި އެއްބަސްވެވަޑައިގެންފައެވެ. މީގެ އިތުރުން ދެގައުމުން ރަސްމީ ސިފައެއްގައި ސުލްހައިގެ މުއާހަދާއެއްގައި ސޮއިކޮށް ދެގައުމުގެ ދެމެދުގައި ޑިޕްލޮމެޓިކް ގުޅުންތައް ގާއިމުކުރުމަށްވެސް ވަނީ އެއްބަސްވެވަޑައިގެންފައެވެ.
ނަވާރަސަތޭކަ ފަންސާހުން 1953 އަށް ހިނގި ކޮރެއާ ހަނގުރާމަ ނިމުމަކަށް އައީ ހަމަލާތައް ހުއްޓާލުމުގެ ވަގުތީ އެއްބަސްވުމަކާ އެކުގައެވެ. އެ ހަނގުރާމަ ނިމުނުތާ 65 އަހަރު ވީއިރު ވެސް ދެކޮރެއާ ދެމެދުގައި ސުލްހައިގެ މުއާހަދާއެއް ކުރެވިފައި ނުވާތީ އެ ދެގައުމު އަދިވެސް އޮތީ އަސްކަރީ ގޮތުން ހަނގުރާމައިގެ ހާލަތުގައެވެ. ދެކޮރެއާއިން ރަސްމީ ސިފައެއްގައި ސުލްހައިގެ މުއާހަދާއެއްގައި ސޮއިކުރުމަށް ދެކޮރެއާގެ ސަމިޓުގައި އެ ދެގައުމުގެ ވެރިން އެއްބަސްވެވަޑައިގަތީ މިހެންވެއެވެ.
ކޮރެއަން ޕެނިންސިއުލާ އަކީ ނިއުކްލިޔަރ ހަތިޔާރު ގެންގުޅުން މަނާސަރަހައްދަކަށް ހެދުމަށް ދެބޭފުޅުން އެއްބަސްވެ ވަޑައިގެންނެވި ނަމަވެސް، ދެކުނު ކޮރެއާގައި ވާ އެމެރިކާ ސިފައިންގެ ގުދަންތަކުގައި ނިއުކްލިއާ ހަތިޔާރު ރައްކާކޮށްފައި ވެއެވެ. އެހެންކަމުން ނިއުކްލިއާ ހަތިޔާރު ނައްތާލަން ދެގައުމުގެ ވެރިން އެއްބަސްވެވަޑައިގަތުމުގެ މާނައަކީ ދެކުނު ކޮރެއާގައި ތިބޭ އެމެރިކާ ސިފައިންވެސް އެގައުމުން ބޭލުމަށް ދެކުނު ކޮރެއާ އެއްބަސްވުންކަމަށް ގިނަ ބަޔަކު ދެކެއެވެ.
އެމެރިކާގެ ދިފާއީ ވަޒީރު ޖިމް މާޓިސް ވެސް ވަނީ އެމެރިކާ ސިފައިން ދެކުނު ކޮރެއާއިން ބޭލުމާ ބެހޭގޮތުން ވާހަކަ ދެކެވިދާނެ ކަމަށް ފުރަތަމަ ފަހަރަށް ވިދާޅުވެފައެވެ. ޔޫރަޕާއި އޭޝިއާގައި ވާ އެމެރިކާގެ ބައިވެރިންނާ މަޝްވަރާކޮށް އެފަރާތްތަކުގެ މަސްލަހަތުތައް ރައްކާތެރި ކުރެވޭ ފަދަ ގޮތަކަށް އެމެރިކާ ސިފައިން ދެކުނު ކޮރެއާއިން ބޭލުމާ ބެހޭގޮތުން ވާހަކަ ދެކެވިދާނެ ކަމަށާއި އެމެރިކާއާއި އުތުރު ކޮރެއާގެ ސަމިޓްގައި އެވާހަކަ ދެކެވޭނެ ކަމަށް މާޓިސް ވިދާޅުވެފައިވެއެވެ.
އެމެރިކާގެ ރައީސް ޑޮނަލްޑް ޓްރަމްޕް ވަނީ ކުރިއަށް އޮތް މަހެއްހާ ދުވަހުގެ ތެރޭގައި އުތުރު ކޮރެއާގެ ޒައީމް ކިމް ޖޮންގް އުންއާ ބައްދަލުކުރައްވާނެ ކަމަށް ވިދާޅުވެފައެވެ. ދެކޮރެއާގެ ސަމިޓްގައި އުތުރު ކޮރެއާގެ ޒައީމް ކިމް ވަނީ އެގައުމަށް ބޭނުންވާ އަމަނާއި ރައްކާތެރިކަމާ އަދި އިގްތިސާދީ އެހީ ލިބޭނެކަމުގެ ޔަގީންކަން ލިބިއްޖެ ހާލަތެއްގައި ނިއުކްލިއާ ހަތިޔާރު ދޫކޮށްލައްވަން ތައްޔާރަށް ހުންނެވި ކަމަށް ވިދާޅުވެފައެވެ.
(ނޫސްއެޖެންސީތައް)