29 Apr 2018, 08:33
ރާއްޖޭގައި ބާއްވާ އެންމެ އަގުބޮޑު އަދި އެންމެ ބޮޑު ފުޓްސަލް މުބާރާތް، ޔޫތު ސިޓީ ފުޓްސަލް ކަޕްގެ ފިރިހެން ޑިވިޝަންގެ ފުރަތަމަ ބުރުގައި ވާދަވެރި ކުޅުމަކަށްފަހު އިންވިކްޓާ ސްޕޯޓްސް ކްލަބާއި އެފްސީ އިންތަ އިންތަ އިން ދެވަނަ ބުރުގެ ޖާގަ ކަށަވަރުކޮށްފިއެވެ.
ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އިން އިންތިޒާމްކޮށްގެން ހުޅުމާލޭގައި ކުރިއަށްގެންދާ އެ މުބާރާތުގައި ރޭ އެފްސީ ސޫޕްއާ ވާދަކޮށް، އިންވިކްޓާއިން މެޗު ކާމިޔާބުކުރީ 3-2ގެ ނަތީޖާއަކުންނެވެ.
އެ މެޗުގައި އިންވިކްޓާގެ ލަނޑުތައް ކާމިޔާބުކޮށްދިނީ މެޗުގެ މޮޅު ކުޅުންތެރިޔާގެ މަގާމަށް ހޮވުނު އަހްމަދު ސަބީނާއި އަލީ ހަމްދޫން އަދި އަހްމަދު އާލިމް މުހައްމަދެވެ. އެފްސީ ސޫޕްގެ ލަނޑުތައް ކާމިޔާބުކޮށްދިނީ މުހައްމަދު އަލީއާއި އަހްމަދު ޝާހިދެވެ.
ރޭ އެފްސީ އިންތަ އިންތަ އިން ވަނީ ވާދަވެރި ކުޅުމަކަށްފަހު ޓީމް އެފްސީއޯއީ އަތުން 3-2ގެ ނަތީޖާއަކުން މޮޅުވެފައެވެ. އެ މެޗުގައި އިންތަ އިންތަގެ ލަނޑުތައް ކާމިޔާބުކޮށްދިނީ މެޗުގެ މޮޅު ކުޅުންތެރިޔާގެ މަގާމަށް ހޮވުނު މުހައްމަދު ޝަފީއުއާއި އަބްދުﷲ މައުރޫފް އަދި އިބްރާހިމް ސައިފެވެ. އެފްސީއޯއީ އިން ޖެހި ދެ ލަނޑު، އެޓީމަށް ކާމިޔާބުކޮށްދިނީ ވިޝާހު ރަޝީދާއި ފުހައިދު އަހްމަދެވެ.
ރޭ ކުޅުނު އެހެން މެޗުތަކަށް ބަލައިލާ އިރު، ޔުނައިޓެޑް ޗިޅިޔާ އަތުން 6-1ގެ ނަތީޖާއަކުން ޓީމް ކޮޅުފުށި ވަނީ މޮޅުވެފައެވެ. އަދި ކްލެސިކޯ އިން އެފްސީ ޓަވަރ ބަލިކުރީ 4-6ގެ ނަތީޖާއަކުންނެވެ.
އެ މުބާރާތުގެ ފިރިހެން ޑިވިޝަންގައި މިރޭ ހަތް މެޗު ކުޅޭނެއެވެ. އެ މެޗުތައް ކުރިއަށްދާނީ މިރޭ 8:00 އިން ފެށިގެން 11:00 އަށެވެ.
ޖުމްލަ 136 ޓީމާއެކު މުބާރާތް ކުރިއަށްދާ އިރު، ފިރިހެން 120 ޓީމު، އަންހެން 16 ޓީމު މުބާރާތުގައި ވާދަކުރާނެއެވެ. މުބާރާތުގެ ފިރިހެން ޑިވިޝަން މެޗުތައް ދާނީ ނޮކްއައުޓް އުސޫލުންނެވެ. އަދި އަންހެން ޑިވިޝަން ކުރިއަށްދާނީ ހަތަރު ގްރޫޕަކަށް ބަހާލައިގެން، ގްރޫޕް ސްޓޭޖް މެޗުތައް ނިމުމުން އެންމެ ކުރީގައި އޮންނަ ދެ ޓީމު ކުއާޓާ ފައިނަލަށް ދަތުރުކުރާ ގޮތަށެވެ.
މިއަހަރުގެ މުބާރާތުގެ ފިރިހެން އަދި އަންހެން ޑިވިޝަންގައި ވެސް ފައިސާގެ އިނާމުތައް އެއްވަރެވެ. މިއަހަރު ޗެމްޕިއަން ޓީމަށް 100,000 ރުފިޔާ، ރަނަރަޕް ޓީމަށް 50,000 ރުފިޔާ އަދި ފެއާޕްލޭ ޓީމަށް 25,000 ރުފިޔާ ހުށަހަޅާފައިވެއެވެ. ފިރިހެން އަދި އަންހެން ޑިވިޝަންގައި އެ އަދަދު ހުށަހެޅުމުން، މިއަހަރު ފައިސާގެ އިނާމެއްގެ ގޮތުގައި ޖުމްލަ 350,000 ރުފިޔާ ދޭނެއެވެ.