މާލެ އޮތީ ތޮއްޖެހިފައެއް ނޫން: ރައީސް

25 Apr 2018, 15:01

ވެރިރަށް މާލެ އޮތީ ތޮއްޖެހިފައި ނޫން ކަމަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.

ރައީސް ޔާމީންގެ ވެރިކަމުގައި ހިންގާފައިވާ އަދި މިހާރު ކުރިއަށްދާ ތަރައްގީގެ މަޝްރޫއުގެ ވާހަކަތައް ހިމެނޭ "ރަށްވެހި ތަރަައްގީ" ފޮތް ނެރެދެއްވުމަށް ފަހު މިއަދު ވާހަކަފުޅު ދައްކަވަމުން ރައީސް ވިދާޅުވީ މާލޭގައި 25 ބުރީގެ އިމާރާތްތައް ބިނާކުރެވޭނެ ކަމަށާއި އެއީ ރައްޔިތުންނަށް ބޭނުންވާ ހިދުމަތްތައް ފޯރުކޮށްދިނުމަށް އަޅާނެ އިމާރާތްތަކެއް ކަމަށެވެ. އަދި އެ އިމާރާތްތައް އަޅާނެ ޖާގަ ވެސް މާލޭގައި އެބައޮތް ކަމަށް ރައީސް ވިދާޅުވިއެވެ.

"މާލޭގައި 25 ބުރީގެ އިމާރާތެއް ހެދިގެން ދިޔައީ. ސަރުކާރަށް އެކަނިތޯ މާލޭގައި 25 ބުރީގެ އިމާރާތެއް އެޅޭނީ؟ އަމިއްލަ ފަރާތްތަކަށް މާލޭގައި 25 ބުރީގެ އިމާރާތްތައް މިއަދުވެސް އެޅޭނެ. އެވަރުގެ ފުޓްޕްރިންޓެއް ހިފައިގެން އައިސްފި ކަމަށް ވަންޏާ އަމިއްލަ ފަރާތްތަކަށް މާލޭގައި 25 ބުރީގެ އިމާރާތްތައް އެޅުމުގެ ހުއްދަ މިއަދު ވެސް އެބައޮތް،" ރައީސް ވިދާޅުވީ 2018ގެ ރިޔާސީ އިންތިޚާބާއެކީ މާލޭގައި 25 ބުރީގެ އިތުރު އިމާރާތްތަކެއް އެޅޭނެ ކަމަށާއި އެކަމަށް ޖާގަ އެބައޮތް ކަމަށެވެ.

މީގެ އިތުރުން ރައީސް ވިދާޅުވީ ވައި ނުސާފުކުރާ ކުނިގޮނޑުތަކާއި ޓްރެފިކުން ތޮއްޖެހިފައިވާ މަގުތަކަކަށް ވިޔަސް މިހާރު އެ މަންޒަރު ބަދަލުވެފައިވާ ކަމަށެވެ.