25 Apr 2018, 11:11
"ރަށްވެހި ތަރައްގީ"ގެ ނަމުގައި، ރައީސް ޔާމީނުގެ ޒައާމަތުގައި ރާއްޖޭގެ ރަށްރަށަށް އައިސްފައިވާ ތަރައްގީގެ ވާހަކަ ހިމެނޭ ފޮތެއް ނެރެފިއެވެ.
ރައީސް އޮފީހުގައި މިއަދު ބޭއްވި ކުޑަ ހަފްލާއެއްގައި މި ފޮތް ނެރެދެއްވީ ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމެވެ. މި ފޮތުގެ ފުރަތަމަ ކޮޕީ މިއަދު ވަނީ ރައީސް ޔާމީނަށް އަރުވައިފައެވެ.
"ރަށްވެހި ތަރައްގީ" އަކީ ރައީސް އޮފީހުގެ ކޮމިއުނިކޭޝަން ޑިޕާޓްމެންޓާއި ސަރުކާރުގެ މުއައްސަސާތަކާއި ރަށުކައުންސިލްތަކާއި އަތޮޅު ކައުންސިލްތައް ގުޅިގެން އެކުލަވާލާފައިވާ ފޮތެކެވެ.
މި ފޮތުގައި 2014 ވަނަ އަހަރުގެ ނޮވެމްބަރު މަހުން ފެށިގެން މި އަހަރުގެ މާޗް މަހުގެ ނިޔަލަށް ސަރުކާރުން ކޮށްފައިވާ އަދި ކުރަމުންދާ އުމްރާނީ އަދި އިގްތިސާދީ ތަރައްގީގެ ކުދި ބޮޑު ހުރިހާ މަޝްރޫއަކާ ގުޅޭ މައުލޫމާތު ވަނީ ހިމަނައިފައެވެ.
ރަށްވެހި ތަރައްގީގެ ނަމުގައި ތަރައްގީގެ ވާހަކަތައް ހިމެނޭ ފޮތެއް ނެރުން --- ފޮޓޯ: ރައީސް އޮފީސް
އެގޮތުން ހާއްސަ 21 މަޝްރޫއެއްގެ ވާހަކަ މި ފޮތުގައި ވަނީ ހިމަނައިފައެވެ. މާލެއަށް އައިސްފައިވާ އަދި އަންނަމުންދާ ތަރައްގީ އާއި، ރަށްރަށުގައި ހިންގާފައިވާ އަދި ހިންގަމުންދާ އުމްރާނީ ތަރައްގީގެ މަޝްރޫއުތަކުގެ ވާހަކައިގެ އިތުރުން ކުރިމަގުގެ ތަރައްގީގެ ތަސައްވަރުގެ ވާހަކަތައްވެސް މި ފޮތުގައި ވަނީ ހިމަނައިފައެވެ.
ރައީސް އޮފީހުން ބުނީ މި ފޮތް އަމާޒުކޮށްފައިވަނީ ރިސާޗަރުންނަށާއި ޔުނިވާސިޓީ ދަރިވަރުންނަށް ކަމަށެވެ. އެގޮތުން މި ސަރުކާރުގެ ތަރައްގީގެ މަޝްރޫއުތަކާ ގުޅޭ ތަފްސީލީ މައުލޫމާތު ކިޔަވާކުދިންނަށާއި ރިސާޗަރުންނަށް ލިބޭނެ ކަމަށް ރައީސް އޮފީހުން ބުނެއެވެ.
ރައީސް ޔާމީނުގެ ދައުރުގެ މަޝްރޫއުތަކުގެ ވާހަކަތަކުގެ އިތުރުން 2009 އިން 2013 ގެ ނިޔަލަށް ރާއްޖޭގައި ކުރިއަށް ގެންގޮސްފައިވާ ޕްރޮޖެކްޓްތަކާ ގުޅޭ މައުލޫމާތުވެސް މި ފޮތުގައި ހިމަނާފައިވެއެވެ.