25 Apr 2018, 09:26
ރާއްޖޭގެ ވެރިކަން ކޮށްފައިވާ ކުރީގެ ރައީސް މައުމޫން އަބްދުލްގައްޔޫމާއި މުހައްމަދު ނަޝީދުގެ ވެރިކަމުގައި ނަރުދަމާގެ ނިޒާމު ގާއިމް ކޮށްދީފައި ނުވާ ވަރަށް މި ސަރުކާރުން ނަރުދަމާގެ ނިޒާމް ގާއިމް ކޮށްދީފައިވާ ކަމަށް ތިމާވެއްޓާ ބެހޭ ވަޒީރު ޠާރިޤު އިބްރާހިމް ވިދާޅުވެއްޖެ އެވެ.
މާލޭ ވޯޓާ އެންޑް ސްވަރޭޖް ކޮމްޕެނީ (އެމްޑަބްލިއުއެސްސީ)ގެ 23 ވަނަ އަހަރީ ދުވަހުގެ ޖަލްސާ ޝަރަފުވެރިކޮށް ވާހަކަ ދައްކަވަމުން ޠާރިޤު ރޭ ވިދާޅުވީ، ރައީސް އަބްދުﷲ ޔާމީންގެ ވެރިކަމުގައި މިވީ ހަތަރު އަހަރު ދުވަހުގެ ތެރޭގައި އެމްޑަބްލިއުއެސްއީން 54 ރަށެއްގައި ނަރުދަމާގެ ނިޒާމް ގާއިމް ކޮށްދީފައިވާ ކަމަށެވެ. އަދި މި އަހަރު ނިމެންވާއިރަށް އާބާދީގެ 75 ޕަސެންޓްގައި ނަރުދަމާގެ ނިޒާމް ގާއިމްކޮށް ނިމޭނެ ކަމަށް ވެސް ޠާރިޤު ވިދާޅުވި އެވެ.
ޠާރިޤު ވިދާޅުވީ، މީގެ ކުރިން ވެރިކަންކުރި ރައީސުން ކަމަށްވާ މައުމޫން އަބްދުލްގައްޔޫމާއި މުހައްމަދު ނަޝީދުގެ ވެރިކަމުގައި ނަރުދަމާގެ ނިޒާމް ގާއިމް ކޮށްދީފައި ވަނީ ޖުމްލަ 31 ރަށެއްގައި ކަމަށެވެ. އަދި ފެނުގެ ނިޒާމް ގާއިމް ކޮށްދީފައި ވަނީ ޖުމްލަ ހަ ރަށެއްގައި ކަމަށް ވެސް ޠާރިޤު ވިދާޅުވި އެވެ.
"މާލޭގައި މިހާރު މިއޮތް ސުވަރޭޖް ނެޓްވާކަކީ 35 އަހަރުވެފައިވާ ނެޓްވާކް ސިސްޓަމެއް. މިހާ ގިނަ ދުވަސްވެފައި އޮތް ނެޓްވާކް ސިސްޓަމެއް މިއަދު އަޅުގަނޑުމެންގެ ސަރުކާރުން މިވަނީ މި ސިސްޓަމަކީ އާކުރަން ޖެހޭ ސިސްޓަމެއްކަމަށް ގަބޫލުކޮށް އެމްޑަބްލިއުއެސްސީން އެ ނެޓްވާކް ސިސްޓަމް އަޕްގްރޭޑް ކުރުމުގެ މަސައްކަތް ކުރަމުން މިދަނީ. މާލޭގައި ގިނަ ގެތަކެއް ހަދަމުން ދިޔައިރު މީގެ ކުރީގެ ސަރުކާރުތަކުން މާލޭގައި މި 35 އަހަރުވީ ނެޓްވާކް އާކުރުމަށް މުހިއްމު ކަމެއް ދީފައެއް ނެތް،" އޭނާ ވިދާޅުވި އެވެ.
ޠާރިޤު ވިދާޅުވީ، ނަރުދަމާގެ ނިޒާމް ގާއިމް ކުރުމަކީ ބޮޑެތި ހަރަދުތަކެއް ހިނގާ ކަމެއް ކަމަށެވެ. ނަމަވެސް ވޭތުވެ ދިޔަ ހަތަރު އަހަރު ރަނގަޅު ނަރުދަމާއެއް ގާއިމް ކުރުމަށް ބޮޑެތި ޕްރޮޖެކްޓްތަކެއް ހިންގައި މި ސަރުކާރުގެ ފެށިގެން، މި އަހަރުގެ ނިޔަލަށް 1.5 ބިލިއަން ރުފިޔާ އެމްޑަބްލިޔުއެސްސީއާ ހަވާލުކޮށްގެން ފެނާއި ނަރުދަމާ ގާއިމްކުރުމަށް ހަރަދުކުރާނެ ކަމަށެވެ.
ތާރިޤް ވިދާޅުވީ، ރައްކާތެރިކަމާއެކު ފެން ރައްކާކޮށް، ފެން ލިބޭނެ ގޮތް އޮތުމަކީ މުހިއްމު ކަމެއް ކަމަށެވެ. އަދި ވޯޓާ ސެކިއުރިޓީގެ މަސައްކަތް ކުރުމަށް ސަރުކާރުން ޕްލޭން ކޮށްފައިވާ ގޮތާ އެއްގޮތަށް އެމްޑަބްލިޔުއެސްސީން މަސައްކަތް ކުރަމުންދާ ކަމަށްވެސް އޭނާ ވިދާޅުވިއެވެ.
އެންމެ ފަހުން ދިމާވި ހާދިސާގައި ދިމާވި މައްސަލަ ހައްލުކޮށް ފެން ފޯރުކޮށްދިނުމަށް ނެގި ވަގުތު އިތުރުވެގެން ދިޔުމުން ދޭހަވަނީ، ފެން ލިބުން ދަތިވެގެން ދިޔުމަކީ ޤައުމުގެ މިނިވަން ކަމަށްވެސް އަސަރުކުރާނެ ކަމެއް ކަމަށް ގަބޫލުކުރެވޭތީ، ރައީސް ޔާމީންްގެ ލަފާފުޅާއެކު މިހާރު އެކުލަވާލެވިފައިވާ ވޯޓާ ސެކިއުރިޓީ ޕްލޭނުގެ ދަށުން މިކަންކަން ހައްލުކުރެވިފައިވާ ކަމަށް އޭނާ ވިދާޅުވިއެވެ.
ޠާރިޤު ވިދާޅުވީ، ފެނުގެ ސިސްޓަމް ކުރިއަށް އޮތްތަނުގައި ވަރަށް ރަނގަޅަށް ކުރިއަށް ގެންދެވޭނެ ކަމަށާއި ފެން އުފެއްދުމުގައި ކުންފުނިތަކާ ގުޅިގެން އެންމެ ފަސޭހައިން މަސައްކަތް ކުރެވޭނީ ކޮން ގޮތަކަށްތޯ ބެލުމުގެ މަސައްކަތް ވެސް ކުރަމުން އަންނަ ކަމަށެވެ.
ފެން އުފެއްދުމަކީ ބޮޑު ހަރަދެއް ކުރަން ޖެހޭ ކަމަކަށްވުމުން ފެން ބޭނުންކުރާ އިރު ފެން އިސްރާފު ނުކޮށް ރަނގަޅު ގޮތުގައި ފެން ބޭނުންކުރުމަކީ މުހިއްމު ކަމެއް ކަމަށް ވެސް ޠާރިޤު ވިދާޅުވި އެވެ.