17 Apr 2018, 15:12
ބާސެލޯނާގެ ތަރި ލިއޮނަލް މެސީއާއި ރެއާލް މެޑްރިޑްގެ ކްރިސްޓިއާނޯ ރޮނާލްޑޯއާ އެއް ލެވެލަކަށް ދިއުމަށް އެތުލެޓިކޯ މެޑްރިޑްގެ އެންޓޮއިން ގްރީޒްމަންއަށް ޓްރޮފީތަކެއް ބޭނުންވާ ކަމަށް ފެނާންޑޯ ޓޯރެސް ބުނެފި އެވެ.
ފްރާންސްގެ ގްރީޒްމަން އަކީ 2016 ވަނަ އަހަރުގެ ބެލޮންޑިއޯ އަދި ފީފާ ދަ ބެސްޓްގެ ތިންވަނަ މަގާމު ހޯދި ކުޅުންތެރިއާ އެވެ. އެ ދެ އެވޯޑުވެސް އެއަހަރު ހޯދީ ރޮނާލްޑޯ އެވެ. ދެވަނައަށް ދިޔައީ މެސީއެވެ.
ގްރީޒްމަންއާ އެކު އެތުލެޓިކޯއަށް ކުޅެމުންދާ، ލެޖެންޑަރީ ފޯވަޑް ޓޯރެސް ބުނީ ގްރީޒްމަންއަކީ ހުނަރުގެ ގޮތުން ވަރަށް މޮޅު ކުޅުންތެރިއެއް ނަމަވެސް ކެރިއަރުގައި ހޯދި ޓްރޮފީތައް މަދުވުމުން މެސީއާއި ރޮނާލްޑޯގެ ލެވެލްގައި އޭނާ ނުގުނޭނެ ކަމަށެވެ.
މި ސީޒަން ނިންމާލުމަށް ފަހު އެތުލެޓިކޯ ދޫކޮށްލާނެ ކަމަށް ބުނެފައިވާ ޓޯރެސް އިތުރަށް ބުނެފައި ވަނީ އޭނާގެ އުންމީދަކީ ގްރީޒްމަންއަށް އެތުލެޓިކޯގައި ގިނަ ޓްރޮފީތަކެއް ލިބުން ކަމަށެވެ.
ގްރީޒްމަންއަށް ވަރަށް ބޮޑަށް ތައުރީފް ކުރަމުން ޓޯރެސް ބުނީ އޭނާ އެންމެ ބޮޑަށް ބޭނުން ވަނީ ކީޕަރު އޮބްލަކް އަދި ގްރީޒްމަންގެ އިތުރުން ކޯޗު ޑިއޭގޯ ސިމިއޯނީ ވެސް އަންނަ ސީޒަންގައި ކްލަބުގައި މަޑުކުރުމަށް ކަމަށެވެ.
ޓޯރެސް ބުނީ އޮބްލަކަކީ ކެރިއަރުގައި ފެނުނު އެންމެ މޮޅު ކީޕަރު ކަމަށާއި އޭނާ ޓީމުގައި މަޑުކުރުން ވެގެންދާނީ ލިބޭނެ ވަރަށް ބޮޑު ކާމިޔާބީއަކަށް ކަމަށެވެ.
ގްރީޒްމަން މި ސީޒަންގައި 26 ގޯލް ޖަހައިފައިވާ އިރު، މިދިޔަ ސީޒަންގައި ވެސް އޭނާ ވަނީ ޖުމްލަ 26 ގޯލް ޖަހައިފަ އެވެ.