17 Apr 2018, 13:30
ސުޕްރީމް ކޯޓުގެ ފަނޑިޔާރު އަލީ ހަމީދު މުހައްމަދާ ގުޅުންހުރި ގެއަކުން 38 މިލިއަން ރުފިޔާ ހޯދާފައިވާ ކަމަށް ބުނެވުނީ އޮޅުމަކުން ކަމަށް ފުލުހުން ބުނެފި އެވެ.
ފުލުހުން މިދިޔަ އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި އެ ސާވިސްގެ ތަރުޖަމާނު ސުޕްރިންޓެންޑެންޓް އަހްމަދު ޝިފާން ވިދާޅުވީ ސުޕްރީމް ކޯޓުގެ ފަނޑިޔާރު އަލީ ހަމީދު މުހައްމަދާ ގުޅުން ހުރި ގެއަކުން 38 މިލިއަން ރުފިޔާ ހޯދާފައިވާ ކަމަށެވެ.
އެ ސްޓޭޓްމަންޓް ދެމުން ދިޔަ ވަގުތު ފަހަތުން ފެންނަން ހުރި ޕްރެޒެންޓޭޝަންގައި އަލީ ހަމީދާ ގުޅުން ހުރި ގެއިން ފެނުނީ 3.4 މިލިއަން ރުފިޔާ ކަމަށް ފެންނަން އޮވެ އެވެ. ނަމަވެސް ސުޕްރިންޑެންޓް ޝިފާން އަށް 38 މިލިއަން ކަމަށް ބުނެވުނީ އޮޅުމަކުން ކަމަށް ފުލުހުން ވަނީ ބުނެފަ އެވެ.
"ޕްރެޒެންޓޭޝަންގައި ފެންނަން އޮންނަ އަދަދަށް ވުރެ އިތުރަށް ބުނެވިފައިވާ ނަމަ އެއީ އޮޅުމެއް،" ފުލުހުންގެ މީޑިއާ އޮފިޝަލް ވިދާޅުވި އެވެ.
އަލީ ހަމީދާ ގުޅުން ހުރި ގެއަކުން 38 މިލިއަން ރުފިޔާ ފެނުނުކަމަށް ފުލުހުން ބުނުމާ އެކު ގިނަ ބަޔަކު ވަނީ ފުލުހުންނަށް ފާޑު ކިޔައިފަ އެވެ.
ޝިފާން ވިދާޅުވީ އަލީ ހަމީދަށް ނިސްބަތްވާ ދަބަހެއްގެ ތެރެއިން 215،000 ޑޮލަރާއި 150،000 ރުފިޔާ ފެނިފައިވާ ކަމަށެވެ.
"އަލީ ހަމީދަށް ނިސްބަތްވާ ދަބަހަކުން ދެ ލައްކަ ފަނަރަ ހާސް ޑޮލަރާއި އެއްލައްކަ ފަންސާސްހާސް ރުފިޔާ ފެނިފައި. މީގެ އިތުރުން އަލީ ހަމީދުގެ އާއިލާ އަށް ކުރީގެ ރައީސް މައުމޫން ތަފާތު އެކި ގޮތްގޮތުން އެހީވަމުން އަންނަ ކަމަށް ތަހުގީގަށް ވަނީ ޔަގީން ކުރެވިފައި." ޝިފާން ވިދާޅުވި އެވެ.
މީގެ އިތުރުން ޝިފާން ވިދާޅުވީ އަލީ ހަމީދު ރިޝްވަތުގެ ފައިސާ ބޭނުން ކޮށްގެން ފްލެޓެއް ގަނެފައިވާ ކަމުގެ ކިތާބީ ހެކި ޔަގީން ކުރެވޭ ވަރަށް ވަނީ ލިބިފައިވާ ކަމަށާއި ރާއްޖޭގައި ވިޔަފާރިކުރަމުން އަންނަ ބިޔަ ކުންފުންޔަކުން 2.4 މިލިއަން ޑޮލަރުގެ ލޯނު އެހީ އަލީ ހަމީދަށް ދީފައިވާ ކަމުގެ ކިތާބީ ހެކި ވެސް ޔަގީންވާ ވަރަށް ލިބިފައިވާ ކަމަށެވެ.
"އަލީ ހަމީދު ރިޝްވަތުގެ ފައިސާ ބޭނުން ކޮށްގެން ފްލެޓެއް ގަނެފައިވާ ކަމުގެ ކިތާބީ ހެކި ޔަގީން ކުރެވޭ ވަރަށް ވަނީ ލިބިފައި. ރާއްޖޭގައި ވިޔަފާރިކުރަމުން އަންނަ ބިޔަ ކުންފުންޔަކުން 2.4 މިލިއަން ޑޮލަރުގެ ލޯނު އެހީ އަލީ ހަމީދަށް ދީފައިވާކަމުގެ ކިތާބީ ހެކި ވަނީ ޔަގީންވާ ވަރަށް ލިބިފަ." ޝިފާން ވިދާޅުވިއެވެ.
ޝިފާން ވިދާޅުވީ އިތުރަށް ވިދާޅުވީ އަލީ ހަމީދުގެ އާއިލާއަށް ތަފާތު އެކި ގޮތްގޮތުން ކުރީގެ ރައީސް، މައުމޫން އަބްދުލްގައްޔޫމް އެހީތެރިވަމުން އަންނަ ކަމަށް ތަހުޤީޤަށް ޔަގީންވެފައިވާކަމަށެވެ.
އަލީ ހަމީދަށް ކުރެވޭ ތުހުމަތުތަކަކީ ރިޝްވަތުގެ ފައިސާ ހިފައި ގާނޫނީ ސަރުކާރު ގާނޫނާ ހިލާފަށް ވައްޓާލަން މަސައްކަތް ކުރިކަމުގެ ތުހުމަތެވެ. މި މައްސަލައާ ގުޅިގެން ޖޭއެސްސީ އިން ވަނީ އޭނާ ސަސްޕެންޑުވެސް ކޮށްފަ އެވެ.
އަލީ ހަމީދު ހައްޔަރު ކޮށްފައި ވަނީ ކުއްލި ނުރައްކަލުގެ ހާލަތު އިއުލާނު ކޮށްފައިވަނިކޮށް މިދިޔަ ހަފްތާގެ ހޯމަ ދުވަހުގެ ރޭގެ ވަގުތެއްގައި ސުޕްރީމް ކޯޓު ތެރޭގައި ހުންނަވަނިކޮށެވެ. އަލީ ޙަމީދާ އެކު އުއްތަމަ ފަނޑިޔާރު އަބްދުﷲ ސައީދު ވެސް ވަނީ ހައްޔަރު ކޮށްފަ އެވެ.