15 Apr 2018, 14:19
ކުދި އަދި މެދުފަންތީގެ ވިޔަފާރިތައް ފެށުމަށް ނުވަތަ މިހާރު ފަށާފައިވާ ވިޔަފާރި ފުޅާކުރުމަށް މާލީ އެހީތެރިކަން ފޯރުކޮށްދިނުމަށް ސަރުކާރުން ފޮރުކޮށްދޭ އެސްއެމްއީ ލޯނަށް 700 އަށްވުރެ ގިނަ މީހުން ކުރިމަތި ލައިފަވާކަމަށް އިކޮނަމިކް މިނިސްޓްރީން ބުނެފިއެވެ.
އިކޮނޮމިކް މިނިސްޓްރީގެ ޑެޕިއުޓީ މިނިސްޓަރު އާދަމް ތައުފީގު މިއަދު "ސަން" އަށް ވިދާޅުވީ، މި މަހުގެ އަށްވަނަ ދުވަހުން 12 ވަނަ ދުވަހުގެ ނިޔަލަށް ހުޅުވާލި އެ ފުރުސަތުގައި ލޯނަށް ރަނގަޅު ތަރުހީބެއް ލިބިފައިވާ ކަމަށެވެ. އެގޮތުން ޖުމްލަ 759 ފަރާތަކުން އެސްއެމްއީ ލޯނަށް އެދި ހުށަހަޅާފައިވަ ކަމަށް ތައުފީގު ވިދާޅުވިއެވެ.
އޭނާ ވިދާޅުވީ، ލޯނަށް ކުރިމަތިލައިފަވާ ފަރާތްތަކަަށް ލޯނަށްވާ ފައިސާ ޖޫންމަހުގެ ނިޔަލަށް ދޫކޮށް ނިންމާލުމަށް މަސައްކަތް ކުރަމުން އަންނަ ކަމަށެވެ. އަދި އެސްއެމްއީ ލޯނަށް ކަނޑައަޅާފައިވާ 50 މިލިއަން ރުފިޔާ ހަމަވަންދެން އެދިފައިވާ ފަރާތްތަކަށް ލޯނު ދޫކުރާނެ ކަމަށްވެސް ތައުފީގު ވިދާޅުވިއެވެ.
ލޯނު ލިބޭ ފަރާތްތަކަށް ލޯނު އަނބުރާ ދެއްކުމަށް ލިބޭ މުއްދަތަކީ އެންމެ ގިނަވެގެން ނުވަ އަހަރެވެ. އަދި އެ މުއްދަތުގެ ތެރޭގައި އެއް އަހަރުގެ ގްރޭސް ޕީރިއަޑެއް ވެސް ހިމެނިދާނެ ކަމަށް އިކޮނޮމިކް މިނިސްޓްރީން ބުނެ އެވެ. ލޯނު އަނބުރާ ދައްކަން ދޭ މުއްދަތު ކަނޑައަޅާނީ އެ ވިޔަފާރިއެއްގެ މާލީ ހިސާބަށް ރިއާޔަތްކުރުމަށްފަހުގަ އެވެ. އިންޓަރެސްޓަކީ ހަތް ޕަސެންޓެވެ.
އެސްއެމްއީ ލޯން ސުކީމުގެ ދަށުން ވިޔަފާރިއަކަށް އެންމެ މަތިން ދޫކުރާނެ އަދަކީ 500،000 ރުފިޔާ، އަދި ކުންފުނި، ޕާޓްނަޝިޕް ނުވަތަ ކޯޕަރޭޓިވް ސޮސައިޓީއަކަށް ނަމަ 1.5 މިލިޔަން ރުފިޔާ ކަމަށް އެ މިނިސްޓްރީން ބުންޏެވެ.
ވޭތުވެދިޔަ ހަތަރު އަހަރުގެ ތެރޭގައި އެސްއެމްއީ ލޯނުގެ އިތުރުން "ގެޓްސެޓް" އާއި "ފަސޭހަ މަދަދު" ގެ އިތުރުން "ކަންބަލުންގެ ލޯނު" ގެ ނަމުގައިވެސް ސަރުކާރުން އަންނަނީ ގިނަ އަދަދަކަށް ލޯނު ދޫކުރަމުންނެވެ.