14 Apr 2018, 18:10
އިއްޔެ ހުކުރު ނަމާދަށް ދިޔަފަހުން ގެއަށް ނައިސްގެން ހޯދަމުންދިޔަ ތ. ތިމަރަފުށީ ނައިންފަރު، އުމުރުން 41 އަހަރުގެ އިބްރާހީމް ޚަލީލް ފެނިއްޖެއެވެ.
ޚަލީލް ފެނިފައިވާކަން އޭނާގެ އާއިލާއިން ކަށަވަރުކޮށްދީފައިވާ އިރު، ފުލުހުން ބުނީ އޭނާ ފެނުނުކަން އާއިލާއިން އެ އިދާރާއަށް އަންގާފައިވާ ކަމަށެވެ.
ޚަލީލްގެ އާއިލާއިން ބުނީ މާލެ ކައިރީ ރަށަކަށް މަސައްކަތްކުރަން ގޮސް އުޅޭކަން އޭނާ އެންގި ކަމަށާއި އާއިލާއަށް ވީނުވީއެއް ނޭންގުނީ ފޯން ހަލާކު ވެގެން ކަމަށް ޚަލީލް ބުނެފައިވާ ކަމަށެވެ.
ގެއްލުނު އިރު ޚަލީލްގެ އާއިލާގެ މެމްބަރަކު "ސަން" އަށް ކިޔައިދިންގޮތުގައި އެންމެފަހުން ޚަލީލު ފެނުނީ ވިލިމާލޭ ގޯނބިލި ކެފޭތެރެއިން އޭނާގެ ރައްޓެއްސަކަށެވެ.
ގެއްލުނުއިރު ޚަލީލުގެ ސިއްހީ ހާލަތު ރަނގަޅު ކަމަށް ވެސް އާއިލާ އިން ބުންޏެވެ.
އާއިލާ އިން ބުނިގޮތުގައި އޭނާ އިއްޔެ ލައިގެން ހުރީ ގަދަނޫ ކުލައިގެ ގަމީހަކާއި ގަދަ މުށި ކުލައިގެ ފަޓުލޫނެކެވެ. "ބައްޕަގެ ފޯނާއި ޕަވަބެންކު ފިޔަވައި އެހެން ހުރިހާ އެއްޗެއް ގޭގައި އެބަހުރި،" ޚަލީލްގެ ދަރިއަކު ކުރިން ކިޔައިދިނެވެ.
އަދި ގެއްލުނުއިރު ޚަލީލުގެ ފޯނު ނިއްވާލާފައިވާ ކަމަށް ވެސް އާއިލާއިން އޭރު ބުންޏެވެ.
ޚަލީލްގެ ހަބަރެއް ވުމުގެ ކުރިން އާއިލާއިން މިއަދު ބުނީ ހަލީލް ދުއްވާ ސައިކަލު އާންމު ގޮތެއްގައި ޕާކް ކޮށްފައި ހުންނަނީ މާލޭގައި ހުންނަ ފެރީ ޓާމިނަލްގައި ކަމަށާއި ނަމަވެސް މިހާރު ސައިކަލްވެސް ފެންނަން ނެތް ކަމަށެވެ.