10 Apr 2018, 09:36
ކުޑަކުދިންނަށް ސްމާޓު ފޯނާއި ޓެބްލެޓު ދިނުމަކީ އެކުދިންގެ ހެދިބޮޑުވުމަށް ރައްކާތެރިކަމެއް ނޫނެވެ. ކުޑަކުދިންގެ ޑޮކްޓަރުންނާއި ސައިކޮލަޖިސްޓުންވެސް އަބަދު ދައްކަވާ ވާހަކައަކީ މިއީއެވެ.
އިނގިރޭސިވިލާތުގައި ދާދިފަހުން ކުރި ދިރާސާއެއްގެ ނަތީޖާ ދައްކާގޮތުން އުމުރުން ހައަހަރުން ދަށުގެ ކުދިންގެ ފަންސަވީސް ޕަސެންޓު ކުދިންނަކީ ހަފްތާއެއްގެ ތެރޭގައި 21 ގަޑިއިރު ނޫނީ އެއަށްވުރެ ގިނަ ވަގުތު ފޯނުގެ ސްކްރީނަށް ބެލުމުގައި ހޭދަކުރާ ކުދިންނެވެ.
މި ދިރާސާ ދައްކަގޮތުން އެގައުމުގައި ބައެއް ބެލެނިވެރިން ކުދިންގެ އުމުރުން ހަ އަހަރު ނުވަނީސް ކުދިންނަށް އަމިއްލަ ފޯނު ގަނެދެއެވެ. އޭގެ ތެރޭގައި ސެމްސަންގާއި އެޕަލް ފަދަ ބްރޭންޑުތަކުގެ ފޯނު ހިމެނެއެވެ.
މިދިރާސާ ގައި ބުނާގޮތުން ކޮންމެ 10 ބެލެނިވެރިންގެ ތެރެއިން ކުދިންގެ ސްކްރީން ޓައިމް ލިމިޓު ކުރަނީ އެންމެ ދެ ބެލެނިވެރިންނެވެ. އަދި 75 ޕަސެންޓު ބެލެނިވެރިންނަކީ ކުދިންނަށް އިންޓަނެޓު ބޭނުންކުރުމުގައި އެއްވެސް ކަމެއް މަނާ ނުކުރާ މީހުންނެވެ.
މިކުދިންގެ ތެރޭގައި ފޯނުން ގޭމު ކުޅޭ ކުދިންނާއި މިއުޒިކް އަޑުއަހައި ވީޑިއޯ ބަލަން ފޯނު ބޭނުންކުރާ ކުދިންގެ އިތުރުން ސްނެޕްޗެޓު ފަދަ އެޕްލިކޭޝަންތައް ބޭނުންކުރާ ކުދިންވެސް ހިމެނެއެވެ.
މިއީ ކުދިންގެ އުޅުމާ ގުޅުމަށް ބޮޑު ބަދަލެއް އަންނާނެ ކަމެއް ކަމަށާއި ކުދިންގެ ހެދިބޮޑުވުމަށްވެސް އަސަރު ކުރާނެ ކަމެއްކަން ދިރާސާގައި ވަނީ ފާހަގަކޮށްފައެވެ.
ކުޑަކުދިންނަށް ބަލާއިރު ސްމާޓު ފޯނު ދިނުމަށް އެންމެ އެކަށީގެންވާ އުމުރަކީ 11 އަހަރު ކަމަށާއި އެ އުމުރުގައި ވެސް ފޯނު ދޭންވާނީ ލިމިޓުކޮށްގެން ކަމަށް ތަޖުރިބަކާރުން ވިދާޅުވެއެވެ.
"ކުދިން ފޯނު ބޭނުންކުރާއިރު އެއިން އެ ކުރާ ކަމެއް މޮނީޓާ ކުރުމަކީ މުހިއްމު ކަމެއް. ޑައުންލޯޑު ކުރަނީ ކޮން އެއްޗެއްތޯ އާއި ބްރައުޒްކޮށް ހަދަނީ ކޮންއެއްޗެއްކަން ވާހަކަދައްކަނީ ކޮންބަޔަކާ ކަން ބަލަން ޖެހޭނެ،" އެ ދިރާސާގައި ބުނެފައިވެއެވެ.