06 Apr 2018, 14:57
ކެންބެރާ (އޭޕްރިލް 6): އޮސްޓްރޭލިއާއިން ކަނޑުބޯޓެއް މެދުވެރިކޮށް މެދުއިރުމައްޗަށް އެކްސްޕޯޓުކުރި ކަންބަޅިތަކެއް ބޯޓުގައި މަރުވި މައްސަލަ ތަހުގީގުކުރަން އެގައުމުން ނިންމައިފިއެވެ.
އޮސްޓްރޭލިއާގެ ސަރުކާރުން ބުނި ގޮތުގައި އެގައުމުގެ ކުންފުންޏެއް ކަމަށްވާ އެމަނުއެލް އެކްސްޕޯޓްސްގެ ބޯޓެއްގައި 2،400 ކަންބަޅި މަރުވީ 63,800 ކަންބަޅިއާއެކު މިދިޔަ އޮގަސްޓު މަހު ގަތަރާއި، ކުވޭތާއި ޔުނައިޓެޑް އަރަބް އެމިރޭޓްސްއަށް ކުރި ދަތުރެއްގައެވެ. އަދި އެކަންބަޅިތައް މަރުވީ ހޫނުގަދަވުމުގެ ސަބަބުން ކަމަށްވެސް އެގައުމުގެ ސަރުކާރުން ބުންޏެވެ.
އޖަނަވާރު ހިމާޔަތް ކުރުމަށް މަސައަކަތް ކުރާ ޖަމިއްޔާއެއް ކަމަށްވާ އެނިމަލް އޮސްޓްރޭލިއާއިން ވަނީ އެބޯޓުގައި ކަންބަޅިތައް ގެންގުޅުނު ހާލަތު ދައްކުވައިދޭ ވީޑިއޯއެއް ސަރުކާރުގެ އިސް ފަރާތްތަކާ ހިއްސާކޮށްފައެވެ.
އޮސްޓްރޭލިއާގެ އެގްރިކަލްޗާ މިނިސްޓަރު ޑޭވިޑް ލިޓުލްޕްރައުޑު ވަނީ އެވީޑިއޯއިން ފެނިގެން ދިޔައީ "ބަލަން އުނދަގޫ މަންޒަރުތަކެއް" ކަމަށާއި އެބޯޓުގައި މަރުވެ، ކުނިވެފައިވާ ކަންބަޅިތަކެއްވެސް ފެނުނުކަމަށް އޭނާ ވިދާޅުވިއެވެ.
އެމައްސަލަ ތަހުގީގުކުރުމުގެ އިތުރުން އޮސްޓްރޭލިއާއިން ވަނީ ޖަނަވާރު އެއް ތަނުން އަނެއް ތަނަށް ގެންދާ އިރު އަމަލުކުރަން ޖެހޭ މިންގަނޑުތަކަށް އަމަލު ނުކުރާ ބޯޓުތަކުން ޖަނަވާރު އެކްސްޕޯޓު ކުރުން ހުއްޓުވާނެ ކަމަށް ބުނެފައިއެވެ.
(ބީބީސީ)