28 Mar 2018, 00:54
ކުޑަކުދިންނަށް ޖިންސީ ހާނިއްކަކޮށްގެން 44 މައްސަލަ މިދިޔަ މަހު ރިޕޯޓްކޮށްފައިވާކަމަށް ޖެންޑާ މިނިސްޓްރީ ބުނެފިއެވެ.
ޖެންޑާ މިނިސްޓްރީން އިއްޔެ ނެރުނު ބަޔާނެއްގައި ބުނެފައި ވަނީ ކުޑަކުދިންނަށް ކުރާ އެކި ބާވަތްތަކުގެ އަނިޔާއާ ގުޅޭ 117 މައްސަލަ މިދިޔަ މަހު އެ މިނިސްޓްރީއަށް ރިޕޯޓްކޮށްފައިވާ ކަމަށެވެ. އަދި އޭގެ ތެރެއިން އެންމެ ގިނައިން ރިޕޯޓްކޮށްފައިވަނީ ޖިންސީ ހާނިއްކައިގެ މައްސަލަކަމަށް ޖެންޑާ މިނިސްޓްރީން ބުންޏެވެ.
ޖިންސީ ހާނިއްކައިގެ މައްސަލައިގެ އިތުރުން ކުޑަކުދިންނަށް ކުރާ އަނިޔާގެ އެހެނިހެން މައްސަލަތައްވެސް މިދިޔަ މަހު ރިޕޯޓްކޮށްފައިވާ ކަމަށް ޖެންޑާ މިނިސްޓްރީން ބުންޏެވެ.
ޖިސްމާނީ ހާނިއްކައިގެ 30 މައްސަލަ
އިހުމާލުވުމުގެ 18 މައްސަލަ
ނަފުސާނީ ހާނިއްކަކުރުމުގެ 9 މައްސަލަ
ސައިބާ ބުލީގެ 5 މައްސަލަ
ހަނގާކުރުމުގެ 5 މައްސަލަ
ކުދިން ދޫކޮށްލައިފައި ދިޔުމުގެ 3 މައްސަލަ
ގެވެށިއަނިޔާ ކުރާތަން ދެއްކުން ނުވަތަ ފެނުމުގެ 3 މައްސަލަ
ކުޑަކުދިން ކުރާ ކުށްތަކުގެ 13 މައްސަލައެއްވެސް މިދިޔަ މަހު ހުށަހަޅާފައިވާ ކަމަށް ޖެންޑާ މިނިސްޓްރީން ބުންޏެވެ. އޭގެ ތެރޭގައި މާރާމާރީގެ ފަސް މައްސަލަ އާއި މަސްތުވާތަކެއްޗާ ގުޅޭ ދެ މައްސަލަވެސް ހިމެނެއެވެ.
މިދިޔަ މަހު އާއިލީ މައްސަލަތަކުގެ 29 މައްސަލައެއް ހުށަހަޅާފައިވާ ކަމަށާއި އަދި އޭގެ ތެރެއިން އެންމެ ގިނައިން ހުށަހަޅާފައިވަނީ ކުދިން ބެލުމުގައި ދިމާވާ މައްސަލަތައް ކަމަށް ޖެންޑާ މިނިސްޓްރީން ބުންޏެވެ.
އެ މިނިސްޓްރީން ބުނިގޮތުގައި ކުދިން ބެލުމުގައި ދިމާވާ 12 މައްސަލަ އެއް މިދިޔަ މަހު ވަނީ ރިޕޯޓް ކޮށްފައެވެ. އޭގެ އިތުރުން ކުދިންނާ ބައްދަލުނުކުރެވުމުގެ 10 މައްސަލައަކާއި އަދި ދަރިންނަށް ޚަރަދުނުދިނުމުގެ ހަ މައްސަލައެއްވެސް ހުށަހަޅާފައިވާ ކަަމަށް ޖެންޑާ މިނިސްޓްރީން ބުންޏެވެ،