22 Mar 2018, 19:35
ސްޕެއިންގެ ވަރުގަދަ ކްލަބު، ރެއާލް މެޑްރިޑު ދޫކޮށްލަން އެޓީމުގެ ތަރި ކްރިސްޓިއާނޯ ރޮނާލްޑޯ ނޫޅޭ ކަމަށާއި، ޗައިނާ ލީގަށް ރޮނާލްޑޯ ދާން އުޅޭ ކަމަށް ދެކެވޭ ވާހަކަތަކަކީ ހަގީގަތެއް ނެތް ވާހަކަތަކެއް ކަން ރެއާލްގެ ރައީސް ފްލޮރެންޓީނޯ ޕެރޭޒް ވިދާޅުވެއްޖެއެވެ.
ޕެރޭޒް މިހެން ވިދާޅުވެފައި މިވަނީ ޕޯޗުގަލްގެ ކުރީގެ ކޯޗު ލުއިޒް ފިލީޕޭ ސްކޮލާރީ ކައިރިން ރޮނާލްޑޯ، ޗައިނާގެ ވާހަކަތައް އަހާ އޮޅުންފިލުވާ ކަމަށް ސްކޮލާރީ ބުނެފައިވަނިކޮށެވެ.
ބްރެޒިލާއި ޕޯޗުގަލްގެ ގައުމީ ޓީމުގެ ކޯޗެއްގެ މަގާމުގައިވެސް ކުރިން މަސައްކަތްކުރި ސްކޮލާރީ އެންމެފަހުން މަސައްކަތްކޮށްފައިވަނީ ޗައިނީސް ސުޕަ ލީގުގެ ގުއާންޒޯ އެވަގްރާންޑޯގެ ކޯޗެއްގެ ގޮތުގައެވެ. އޭނާ ވަނީ ޗައިނާ ލީގުގައި 2015 ވަނަ އަހަރުން ފެށިގެން މިދިޔަ އަހަރާ ހަމައަށް މަސައްކަތްކޮށްފައެވެ.
ސްކޮލާރީ ބުނެފައިވަނީ ޗައިނާގައި އޭނާ ހުރިއިރު ރޮނާލްޑޯ ވަރަށް ގިނައިން ގުޅާ ކަމަށާއި، ޗައިނާގެ ކަންކަން އަހާ އޮޅުންފިލުވާ ކަމަށެވެ.
އެވާހަކަތަކާ ގުޅިގެން ޕެރޭޒް ވިދާޅުވީ ރެއާލް ދޫކޮށްލަން ޓީމުގެ ފަރާތުން ރޮނާލްޑޯ ނޭދޭ ކަމަށާއި، ރޮނާލްޑޯގެ ކޮންޓްރެކްޓްގައި ބާކީ އަހަރެއް އެބައޮތް ކަމަށެވެ.
މީގެ އިތުރުން ޕެރޭޒް ވިދާޅުވީ ޗައިނާގައި ސްކޮލާރީ ހުރިިއިރު އޭނާއަށް ރޮނާލްޑޯ ގުޅައި، ކަންކަން ހުރި ނެތްގޮތް ބެލުމަކީ ރައްޓެއްސެއްގެ ހައިސިއްޔަތުން ކުރެވިދާނެ ކަމެއް ކަމަށެވެ. އަދި އެއީ މައްސަލައެއް ނޫން ކަމަށާއި، ރެއާލް ދޫކޮށްލަން ރޮނާލްޑޯ އެއްވެސް ގޮތަކަށް ނުވިސްނާނެ ކަމަށްވެސް ޕެރޭޒް ވިދާޅުވިއެވެ.
ރޮނާލްޑޯ އަދި ރެއާލްއަށްވެސް މިސީޒަން ދަށްކޮށް ފެށުނު ނަމަވެސް ރޮނާލްޑޯ މިހާރު ހުރީ ރަނގަޅު ފޯމެއްގައެވެ. އެގޮތުން ރޮނާލްޑޯ ވަނީ މިހާތަނަށް ސީޒަންގައި 22 ގޯލް ޖަހައިފައެވެ. ހާއްސަކޮށް އޭނާ ޗެމްޕިއަންސް ލީގުގައި ހުރި ރަނގަޅު ފޯމް ފާހަގަކޮށްލެވެއެވެ.