20 Mar 2018, 09:58
ޑާކްރެއިން އެންޓަޓެއިންމަންޓުން، އަންނަ އޭޕްރިލް މަހުގެ ފަސް ވަނަ ދުވަހު ރިލީޒްކުރަން ހަމަޖެއްސި ފިލްމު "ގޮށްރާޅު" އަންނަ ޑިސެމްބަރު މަހު ޕްރިމިއާ ކުރާ ގޮތަށް ފަސްކޮށްފި އެވެ.
ޕްރޮޑިއުސަރު މުހައްމަދު އަލީ (މޮގާ) ބުނީ ފިލްމު އަޅުވާނެ ތާރީހެއް އަދި ނުނިންމާ ކަމަށާއި ނަމަވެސް ފިލްމު ޑިސެމްބަރު މަހު އަޅުވާނެ ކަމަށެވެ.
ފިލްމު ފަސްކޮށްލަން ޖެހުނު މައިގަނޑު ސަބަބަކީ ރާއްޖޭގެ ސިޔާސީ މަސްރަހް މިހާރު އޮތް ގޮތުން ކަމަށް ވެސް އޭނާ ވަނީ ސަން އަށް ބުނެފަ އެވެ.
"އިލެކްޝަންތައް އޮންނާނެ. ރިޔާސީ އިންތިހާބު ވެސް އޭރަށް ވާއިރަށް ނިމި ހަމައަކަށް އެޅޭނެކަމަށް މި ބަލަނީ،" އޭނާ ބުންޏެވެ.
"ގޮށްރާޅަކީ މަސައްކަތުގެ ތެރެއިން މީހަކު އުފައްދާ ހަމަނުޖެހުމަކަށް ކިޔާ ނަމެއް،"
ދިވެހި ފިލްމު "ގޮށްރާޅު"ގެ ފުރަތަމަ ޕޯސްޓަރު---
އެ ފިލްމަކީ ކްރައިމް ތްރިލާ ފިލްމެކެވެ. ގޮށްރާޅު ޑައިރެކްޓް ކުރަނީ އަހުމަދު ޝިނާން އެވެ.
ޑައިރެކްޓަރު މޫމިން ފުއާދުގެ ސްކްރީން ޕްލޭއަކަށް ހަދާ އެ ފިލްމުގެ ތަރިންގެ ގޮތުގައި ފެނިގެންދާނީ ޖުމައްޔިލް ނިމާލް، ހަސަން އިރުފާން (ޒަކިއްޓެ)، އަލަށް ތައާރަފްވާ ދެ ބަތަލުން ކަމަށްވާ ތަސްނީމާ، ޔަޝްފާ، އަޒާން އެވެ. އޭގެ އިތުރުން ފިލްމުގައި ދެން ހަރަކާތްތެރިވާނެ ބައެއް ތަރިންނަކީ ނާޝިދު، ހަމްދާން ފާރޫގު، ނުޒުހަތު ޝުއައިބު (ނުޒޫ) އެވެ.
ފިލްމުގެ ޕޯސްޓަރު މިހާރު އާންމުކޮށްފައިވާއިރު ޑާކްރެއިން އެންޓަޓެއިންމަންޓް އިން ބުނީ ފިލްމުގައި ބޮޑު ޓީމެއް ހަރަކާތްތެރިވާނެ ކަމަށާއި އާ މޫނު ތަކެއް ވެސް ފިލްމުން ފެނިގެންދާނެ ކަމަށެވެ.