18 Mar 2018, 17:27
އުއްތަމަ ފަނޑިޔާރު އަބްދުﷲ ސައީދުގެ މައްޗަށް ތުހުމަތު ކުރާ މައްސަލައިގައި ޖަވާބުދާރީ ވުމަށް ފަސްދުވަސް ދީފިއެވެ.
ކުއްލިނުރައްކަލުގެ ހާލަތުގެ މުއްދަތުގައި، ޖިނާއީ އިޖްރާތުގެ ގާނޫނު ސަސްޕެންޑު ކޮށްފައިވާތީ، އުއްތަމަ ފަނޑިޔާރުގެ މައްޗަށް ދައުވާކުރަނީ ޖިނާއީ އިޖްރާތުގެ ގާނޫނު އައުމުގެ ކުރިން އަމަލު ކުރަމުންދާ ގޮތަށެވެ. މިއީ އާބިޓްރެރީ ޝަރީއަތެއް ކަމަށްވެސް މިއަޑުގެ އަޑުއެހުމުގައި ގާޒީ ވަނީ ވިދާޅުވެފައެވެ.
އުއްތަމަ ފަނޑިޔާރުގެ މައްޗަށް ދެ ދައުވާއެއް ވަނީ އުފުލައިފައެވެ. މިއަދު އޮތީ އެ ދެ މައްސަލައިގެ ތެރެއިން އެމަނިކުފާނުގެ މައްޗަށް އުފުލާފައިވާ ދައުލަތުގެ މަސައްކަތަށް ހުރަސްއެޅުމުގެ ދައުވާގެ އަޑުއެހުމެވެ.
އެނގިފައިވާ ގޮތުގައި ދެވަނަ ދައުވާއެއް އުއްތަމަ ފަނޑިޔާރުގެ މައްޗަށް އުފުލާފައި ވަނީ ހެކި ނައްތާލި ކަމުގެ ތުހުމަތުގައެވެ.
ހެކި ނައްތާލި ކަމުގެ ތުހުމަތުގައި އަބްދުﷲ ސައީދުގެ އިތުރުން ކުރީގެ ރައީސް މައުމޫން އަބްދުލް ގައްޔޫމާއި ސުޕްރީމް ކޯޓުގެ ފަނޑިޔާރު އަލީ ހަމީދު މުހައްމަދުގެ މައްޗަށް ވެސް ވަނީ ދައުވާ އުފުލައިފައެވެ.
މިދިޔަ ފެބްރުއަރީ މަހުގެ ފަސް ވަނަ ދުވަހުގެ ރޭގެ ވަގުތެއްގައި އެ ތިން ބޭފުޅުން ހައްޔަރުކުރީ ރައީސް ޔާމީންގެ ސަރުކާރު ގާނޫނާ ޚިލާފަށް ވައްޓާލަން އުޅުނު ކަމުގެ ތުހުމަތުގައެވެ. އެ މައްސަލައިގެ ތަހުގީގު އަދިވެސް ދަނީ ކުރިއަށެވެ.