17 Mar 2018, 14:36
ޗައިނާގެ ރައީސް ޝީ ޖިންޕިންގ ރައީސް ކަމުގެ ދެވަނަ ދައުރަކަށް ހޮވި ވަޑައިގަތުމާ ގުޅިގެން އެމަނިކުފާނަށް މަރުހަބާ ވިދާޅުވެ ރާއްޖޭގެ ރައިސުލްޖުމްހުރިއްޔާ އަބްދުﷲ ޔާމީން އަބްދުލްގައްޔޫމް ތަހުނިޔާގެ މެސެޖެއް ފޮނުއްވައިފި އެވެ.
އެ މެސެޖުގައި ރައީސް ވިދާޅުވީ، ދެވަނަ ދައުރަކަށް އެމަނިކުފާނު އިންތިހާބު ވުމަކީ ވޭތުވެދިޔަ ފަސް އަހަރު އެމަނިކުފާނުގެ ޒައާމަތުގައި ޗައިނާއަށް އަގުހުރި މަސައްކަތްތަކެއް ކޮށްދެއްވާފައިވާ ކަމުގެ ވަރުގަދަ ހެއްކެއް ކަމަށެވެ.
ރައީސް ވިދާޅުވީ ޝީ ޖިންޕިންގ ގެ ޒައާމަތުގައި އެމަނިކުފާނުގެ އިރުޝާދާއެކު ގައުމީ އަދި ބައިނަލްއަގުވާމީ ގޮތުން، އާ ހަރުފަތަކަށް ގައުމު ގެންގޮސް ދެއްވައި، ބައިނަލްއަގުވާމީ މައިދާނުގައި އެގައުމުގެ ތަރައްގީ ހިއްސާވާ މިންވަރު އިތުރު ވެގެންދާނެ ކަމުގައި ޔަގީންކަން އޮތް ކަމަށެވެ.
ޗައިނާގެ ރައީސް ދެވަނަ ދައުރަކަށް އިންތިހާބު ވެވަޑައިގެންނެވީ ރާއްޖެ އާއި ޗައިނާ އާ ދެމެދުގައި އޮތް ގުޅުން ވަރުގަދަ ވެފައިވާ ދަނޑިވަޅެއްގައި ކަމަށް ވެސް ތަހުނިޔާގެ މެސެޖުގައި ރައީސް ވަނީ ވިދާޅުވެފައެވެ.
ރައީސް ވިދާޅުވީ ދެ ގައުމުގައި އޮތް 45 އަހަރުވީ ދޭދޭ ގުޅުމާ އެއްބާރުލުން އިތުރަށް ވަރުގަދަވެގެން ގޮސްފައިވާ ކަމަށާއި ކުރިއަށް އޮތް ދައުރުގައި ވެސް ދެގައުމުގެ ރައްޔިތުންގެ ފައިދާއަށް ޗައިނާގެ ރައީސް އާ އެކުގައި މަސައްކަތް ކުރައްވައި، މިހާރަށް ވުރެ ވެސް ގާތް ގުޅުމެއް ބޭއްވުމަށް އުއްމީދު ކުރައްވާ ކަމަށެވެ.