14 Mar 2018, 16:18
މެނީލާ (މާޗް 14): އިންޓަނޭޝަނަލް ކްރިމިނަލް ކޯޓު (އައިސީސީ)ގެ މެމްބަރުކަމުން ފިލިޕީންސް ވަކިކުރަން ނިންމާފައިވާކަމަށް އެގައުމުގެ ރައީސް ރޮޑްރީގޯ ޑުޓާޓޭ ވިދާޅުވެއްޖެއެވެ.
ޑުޓާޓޭ އެފަދައިން ވިދާޅުވީ ފިލިޕީންސްގައި މަސްތުވާތަކެއްޗާ ދެކޮޅަށް ކުރަމުންދާ ހަނގުރާމައިގައި އޭނާ އިންސާނިއްޔަތާ ހިލާފު ޖަރީމާތައް ހިންގާފައިވާކަމަށް ބުނާ މައްސަލަ އައިސީސީން ތަހުގީގު ކުރަން ފަށާފައި ވަނިކޮށެވެ.
އިއްޔެ ފިލިޕީންސްގެ ސަރުކާރުން ނެރުނު ބަޔާނެއްގައި ވާގޮތުން އައިސީސީން ޑުޓާޓޭއާ ދެކޮޅަށް ކޮށްފައިވަނީ އެއްވެސް ބަރުދަނެއް ނެތް ތުހުމަތުތަކެވެ. އަދި އެތަހުގީގު ފެށުމުން އެނގިގެންދަނީ އައިސީސީއަކީ ސިޔާސީ ހަތިޔާރެއްކަން ކަމަށްވެސް ބަޔާނުގައި ވެއެވެ.
"އަޅުގަނޑު ކުރިކަމަށް ބުނާ ކަންތައްތަކަކީ ނަސްލެއް ނައްތާލުމެއް ނޫން އަދި ހަނގުރާމައިގެ ޖަރީމާއެއްވެސް ނޫން. ގާނޫނީ ހަމަތަކުގެ މަތިން ކުރިއަށްގެންދާ ފުލުހުންގެ އޮޕަރޭޝަނެއްގައި މަރުވާ މީހުންނަކީ ގަސްތުގައި މަރަލާ މީހުންނެއް ނޫން،" ފިލިޕީންސްގެ ބަޔާނުގައިވެއެވެ.
ނަމަވެސް މީގެ ކުރިން ޑުޓާޓޭ ވަނީ މަސްތުވާތަކެތީގެ ވިޔަފާރި ކުރާ މީހުންނާއި އެއަށް ދެވި ހިފާފައިވާ މީހުންނަށް މަރުގެ އަދަބު ދޭން ތައްޔާރަށް ހުންނެވިކަމަށް ވިދާޅުވެފައެވެ.
ދެހާސްސޯޅަ ވަނަ އަހަރު ފިލިޕީންސްގެ ވެރިކަމަށް ޑުޓާޓޭ ވަޑައިގެންނެވި ފަހުން އެގައުމުން މަސްތުވާތަކެތި ނައްތާލުމަށް ފެށި ހަނގުރާމައިގައި މަރާލި މީހުންގެ އަދަދު 4،000 އަށް އަރާކަމަށް ފުލުހުން ބުނެއެވެ. ނަމަވެސް އިންސާނީ ހައްގުތަކަށް މަސައްކަތްކުރާ ގުރޫޕުތަކުން ބުނާ ގޮތުގައި އެހަނގުރާމައިގައި މަރުވި މީހުންގެ އަދަދު އެއަށް ވުރެ އިތުރުވާނެއެވެ.
(ބީބީސީ)