03 Mar 2018, 00:43
ހދ. ނޮޅިވަރަމްގައި މިއަދު ފަތިހު ދަންޖެހިފައި ހުއްޓާ ފެނުނު އަންހެން މީހާގެ ހަށިގަނޑު އިތުރު ތަހުގީގަށް މާލެ ގެންނަން ނިންމާފައިވާ ކަމަށް ފުލުހުން ބުނެފިއެވެ.
މައުލޫމާތު ލިބިފައިވާ ގޮތުގައި އަންހެންމީހާ ދަންޖެހިފައި ހުއްޓާ ފެނުނީ އޭނާ ދިރިއުޅޭ ގޭގެ ގިފިލީގައެވެ. އަދި އަންހެން މީހާއަކީ ނަފްސާނީ ބައްޔެއް ހުންނަ މީހެއް ކަން ވަނީ އެނގިފައެވެ.
އަންހެން މީހާގެ ހަށިގަނޑު މިއަދު މެންދުރު ފުލުހުންގެ ބެލުމުގެ ދަށުން އެ އަތޮޅު ކުޅުދުއްފުއްޓަށް ވަނީ ގެންގޮސްފައެވެ. އަދިވެސް ހަށިގަނޑު އޮތީ ކުޅުދުއްފުށީގައެވެ.
ފުލުހުން ބުނީ އެ އަންހެން މީހާގެ ހަށިގަނޑު މާލެ ގެންނަން ނިންމީ ޝައްކުކުރެވޭ ކަންތައްތަކެއް ހުރުމުންނެވެ.
ސަންއަށް އެނގިފައިވާ ގޮތުގައި މި މައްްސަލައާ ގުޅިގެން ފުލުހުން ވަނީ އަންހެން މީހާގެ ފިރިމީހާ ފުލުހުންގެ ބެލުމުގެ ދަށަށް ގެންގޮސްފައެވެ. އަންހެން މީހާ ދަންޖެހިފައި ހުއްޓާ ފުރަތަމަ ފެނުނީ އެނާގެ ފިރިމީހާއަށެވެ.
ނޮޅިވަރަމްއިން މައުލޫމާތު ދިން މީހަކު ބުނީ އަންހެން މީހާގެ ހަށިގަނޑު މިއަދު ފުލުހުންގެ ބެލުމުގެ ދަށުން ކުޅުދުއްފުއްޓަށް ގެންދިޔައިރު އޭނާގެ ފިރިމީހާވެސް ފުލުހުން ގެންގޮސްފައިވާ ކަމަށެވެ.
"ފުލުހުންގެ ބެލުމުގެ ދަށުން ފިރިމީހާ ގެންދިޔައީ އެ ގެއަށް. ބެލެވޭ ގޮތުގައި ފިރިހެން މީހާ ލާނެ ހެދުމެއް ނަގަން އެ ގެންދިޔައީ." އެރަށުން ވާހަކަދެއްކި މީހަކު ބުންޏެވެ.
އެ އަންހެން މީހާއަކީ ދާދި ފަހުން އެ ރަށުން ގެއްލިގެން ފުލުހުން ހޯދި އަންހެން މީހާއެވެ. އެފަހަރު އޭނާ ފެނުނީ ގެއްލުނުތާ ދެ ދުވަސް ފަހުންނެވެ. އޭނާގެ ދަރިންވެސް ތިބެއެވެ.
ނޮޅިވަރަމްގައި ތިބެނީ ދެ ފުލުހުންނެވެ. އެ މައްސަލަ ބަލަނީ ކުޅުދުއްފުށީ ޕޮލިސް ސްޓޭޝަނުންނެވެ.