01 Mar 2018, 10:17
އިންޑިއާގެ މަޝްހޫރު ފިލްމީ ތަރި ރާނީ މުކަރްޖީ އަލުން ބޮލީވުޑަށް ނުކުންނަ ފިލްމު "ހިޗްކީ" މި މަހު 23ގައި ރިލީޒްކުރާ ގޮތަށް ނިންމައިފި އެވެ.
"ހިޗްކީ" ކުރިން ރިލީޒްކުރަން ހަމަޖެއްސީ މިދިޔަ މަހު 23 ގަ އެވެ. ނަމަވެސް ސުދިރް މިޝްރާގެ ފިލްމު "ދާސް ދޭވް" މިދިޔަ މަހު 16ގައި ރިލީޒްކޮށްފައިވާތީ ފިލްމު ފަސްކުރަން ޖެހުނީ އެވެ.
ކާމިޔާބު އެކްޓަރު ސިދާތު މަލްހަތުރާ ޑައިރެކްޓް ކުރާ އެ ފިލްމުގެ ޓްރެއިލާ ވަނީ މިހާރު އާންމުކޮށްފަ އެވެ.
ރާނީ މުކަރްޖީ އިސް ރޯލެއް އަދާ ކުރާ ފިލްމްގެ ޓްރެއިލާއިން ދައްކުވައިދެނީ މަދުން ނޫނީ ނުފެންނަ ބައްޔެއް ޖެހިފައިވާ އަންހެނަކު އޭނާގެ ހުވަފެން ފުރިހަމަ ކުރާ މަންޒަރެވެ.
މަނީޝް ޝަރްމާ ޕްރޮޑިއުސްކޮށް އުފައްދާ މި ފިލްމުގައި ރާނީގެ އިތުރުން ހަރަކާތްތެރި ވާނީ ސުޕްރިއާ ޕިލްގްއުންކަރް، އާސިފް ބަސްރާ، ކުނާލް ޝިންޑޭ އަދި ޝިވްކުމާރު ސުބްރަމާނިއަމް އެވެ.
ރާނީ ކުރިން މީޑިއަ އަށް ދިން އިންޓަވިއުއެއްގައި ބުނީ ގިނަ ދުވަހު ފިލްމަކުން ނުފެނު މަޑުކުރަން ޖެހުނީ ހިތްހަމަ ޖެހޭ ކަހަލަ ސްކްރިޕްޓް އެއް ނުލިބޭތީ ކަމަށެވެ. ނަމަވެސް ‘ހިޗްކީ’ އަކީ އޭނާ އުންމީދު ކޮށްގެން ހުރި ކަހަލަ ސްކްރިޕްޓެއް ކަމަށެވެ.
ރާނީ އެންމެ ފަހުން ފެނިގެން ގޮސްފައި ވަނީ 2014 ވަނަ އަހަރު ރިލީޒް ކުރި ފިލްމު 'މަރްދާނީ' އިންނެވެ.
މައުލޫމާތު: ޒޫމް