26 Feb 2018, 09:33
މާލޭ ލީގުގައި ނިއުރޭޑިއަންޓް ސްޕޯޓްސް ކްލަބުން މިއަދު ޓީސީ ސްޕޯޓްސް ކްލަބާ ދެކޮޅަށް ނުކުންނަ މެޗަކީ ޓީމުގެ ކޮންފިޑެންސަށް ވަރަށް މުހިއްމު މެޗެއް ކަމަށް ނިއުގެ ސްޕެއިން ކޯޗު، އޮސްކާ ބްރުޒޮން ބުނެފިއެވެ.
"ޓީމުގެ ފަރިތަކުރުންތައް ދިޔައީ ވަރަށް ރަނގަޅަށް. ޓްރެއިނިންތައް ވަރަށް ރަނގަޅަށް ގޮސް މާދަމާގެ މެޗަކީ ވަރަށް މުހިއްމު މެޗެއް. މިއަދުގެ މެޗުން ޓީމުގެ ކޮންފިޑެންސަށް ބޮޑު އަސަރެއް ކުރާނެ،" މިއަދުގެ މެޗާ ގުޅިގެން އިއްޔެ ބޭއްވި ޕްރެސްގައި އޮސްކާ ބުންޏެވެ.
ނިއުގެ ކުޅުންތެރިންނާއި ބައެއް އޮފިޝަލުން ޕްރި ސީޒަންގެ ތެރެއިން --- ސަން ފޮޓޯ/ ފަޔާޒް މޫސާ
އޮސްކާ ބުނީ މިހާރު ޓީސީ އޮތް ލެވެލް ބުނަން އެނގޭނީ މިއަދުގެ މެޗުން ކަމަށާއި، ހަމަ ޔަގީނުންވެސް މިދިޔަ ސީޒަންގައި ނިއުއަށް އެންމެ ބޮޑަށް ޗެލެންޖުކުރީ ޓީސީ ކަމަށެވެ.
"ޓީސީއަކީ މިދިޔަ ސީޒަންގައި ނިއުއަށް އެންމެ ބޮޑު ޗެލެންޖެއް ދިން ޓީމު. ޓީސީ އޭއެފްސީ ގައިވެސް ވާދަކޮށްފި. ހަމަ ގައިމުވެސް ނިއު ފްރެޝްވާނެ. އެކަމަކު މިހާރު ޓީސީ އޮތް ލެވެލް އިނގޭނެ ދެން މި މެޗަށްފަހު،" އޮސްކާ ބުންޏެވެ.
މިދިޔަ ސީޒަންގައި ދިވެހި ޕްރިމިއާ ލީގާއި އެފްއޭ ކަޕް އަދި ޕްރެސިޑެންޓްސް ކަޕުވެސް ހޯދި ނިއުއަކީ މި ސީޒަންގައި ހުރިހާ މުބާރާތެއްގެވެސް ފެވަރިޓުންތޯ ސުވާލުކުރުމުން އޮސްކާވަނީ އެކަމަށް އިންކާރުކޮށްފައެވެ.
"ނިއުރޭޑިއަންޓަކީ މާލޭ ލީގު ޗެމްޕިއަނުންނެއްވެސް ނޫން. އަހަރެން އަޑުއަހަން ނިއުއަކީ ހުރިހާ މުބާރާތެއްގެވެސް ފެވަރިޓް ޓީމޭ މީހުން ކިޔާއަޑު. އެކަމަކު އެއީ ނިމިފައި އޮތް ސީޒަނެއް. އެއީ މިހާރު ތާރީހު. މިދިޔަ ސީޒަން ވަރަށް ރަނގަޅަށް ދިޔައީ. އެކަމަކު މި ސީޒަން އެނގޭނީ މާދަމާގެ މެޗުވެސް ކުޅުމުން. މާލޭ ލީގަށް ވާދަކުރާނަން. އެކަމަކު ހަނދާން ކުރަންވާނެ އެންމެފަހުގެ މާލޭ ލީގު ޗެމްޕިއަނުންނަކީ މާޒިޔާ،" އޮސްކާ ބުންޏެވެ.
މިދިޔަ އަހަރުގެ ޕްރެޒިޑެންޓްސް ކަޕް ފައިނަލްގައި ނިއު ރޭޑިއަންޓާއި ޓީސީ ސްޕޯޓްސް ކްލަބު ބައްދަލުކުރިމެޗުގެ ތެރެއިން --- ސަން ފައިލް ފޮޓޯ/ މުހައްމަދު އަފްރާހް
ނިއުގެ ކޯޗު، އޮސްކާ ބުނީ މިހާރު ނިއުގައި އޮތް ސްކޮޑަކީ ބެލެންސް ސްކޮޑެއް ކަމަށާއި، އެއްވެސް ކުޅުންތެރިއަކަށް ފުރަތަމަ 11 އަށް އެރުމަށް 'ވީއައިޕީ' ޓިކެޓެއް ނުދޭނެ ކަމަށެވެ.
"ވަރަށް ބެލެންސް ސްކޮޑެއް އޮތީ. ކޮންމެ ކުޅުންތެރިއަކުވެސް 11 އަށް މަސައްކަތްކުރޭ. އަހަންނަކީ ފުރަތަމަ 11 އަށް ވީއައިޕީ ޓިކެޓްވެސް ދޭނެ ކޯޗެއް ނޫން. މާ މުސްކުޅި، މާ ޒުވާން، ބިދޭސީ ކުޅުންތެރިން، މިއީ އަހަރެން ތަފާތުތަކެއް ގެންގުޅޭނެ ސަބަބުތަކެއް ނޫން. ހުރިހާ ކުޅުންތެރިންނަށްވެސް އެނގެނޭ ކުރަން ޖެހޭނެ ކަމަކީ މަސައްކަތްކަން،" އޮސްކާ ބުންޏެވެ.