26 Feb 2018, 09:24
ދައުލަތަށް ލިބެން ޖެހޭ ފައިސާގެ މައްސަލަތައް ގިނަ ދުވަސް ނުކޮށް އަވަހަށް ނިންމައިދިނުމަށް ޕީޕީއެމްގެ ނައިބު ރައީސް އަބްދުއްރަހީމް އަބްދުﷲ (އަދުރޭ) އާއި އެ ޕާޓީގެ ޕާލެމެންޓްރީ ގްރޫޕުގެ ލީޑަރު އަހުމަދު ނިހާން ހުސައިން މަނިކު ކޯޓުތަކަށް ގޮވާލައްވައިފިއެވެ.
ރުމާލު 2ގައި ޕީޕީއެމުން ބޭއްވި ޖަލްސާގައި ރޭ ވާހަކަފުޅު ދައްކަވަމުން އަދުރޭ ވިދާޅުވީ މި ސަރުކާރަކީ ރައްޔިތުންނަށް ޚިދުމަތް ކުރުމަށް ވަރަށް ފޯރި ހުންނަ ސަރުކާރެއް ކަމަށެވެ. އަދި އެ ޚިދުމަތްތައް ފޯރުކޮށްދިނުމަށް ބޭނުންވާ ގިނަ އަދަދެއްގެ ފައިސާ ހުރީ ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ އަތުގައި ކަމަށް އޭނާ ވިދާޅުވިއެވެ.
"މިފަދަ ސަރުކާރެއްގައި ރައްޔިތުންނަށް ބޭނުންވާ ޚިދުމަތް ކޮށްދިނުމަށް ބޭނުންވާ ފައިސާގެ ގިނަ އަދަދެއް އެ ހުރީ ގާސިމް އިބްރާހިމްގެ އަތުގައި. މި ފައިސާގެ މައްސަލަތައް ބައެއް ކޯޓުތަކުގައި އަށް މަސް އަނެއް ބައި ކޯޓުތަކުގައި އަހަރަކަށް ވުުރެ ގިނަ ދުވަސް ވެއްޖެ،" އަދުރޭ ވިދާޅުވިއެވެ.
މިރޭގެ ޖަލްސާގައި ވާހަކަފުޅު ދައްކަވަމުން ނިހާން ވެސް ވަނީ ރައްޔިތުންނަށް ލިބެން ޖެހޭ ފައިސާގެ މައްސަލަތައް ވީހާ ވެސް އަވަހަށް ކޯޓުތަކުން ނިންމައި ދިނުމަށް އާދޭސް ދަންނަވާފައެވެ.
"އަޅުގަނޑު އާދޭހާއެކު ދެފައިގަ ހިފާފަ ދަންނަވަން ދިވެހި ރައްޔިތުންނަށް މި ލިބެންޖެހޭ ލާރި ހޯއްދަވައިދެއްވުމަށް. މި ފައިސާ ކޮޅު އަޅުގަނޑުމެނަށް ލިބޭނެ ރިވެތި އަވަސް މަގެއް ހޯދަވައިދެއްވާ. ތިބޭފުޅުން މި މަސައްކަތް ކުރެއްވުމުގައި އިތުރު ފަނޑިޔާރުން ބޭނުންވާ ނަމަ އެކަމަށް ވެސް އަޅުގަނޑުމެން މި ތިބީ ގާނޫނު ހަދާ މަޖިލީހުގެ ތެރެއިން ދެވެން އޮތް އެހީތެރިކަން ފޯރުކޮށްދެއްވުމަށް ތައްޔާރަށް،" ނިހާން ވިދާޅުވިއެވެ.
ގާސިމް އިބްރާހީމް، 191 މިލިއަން ޑޮލަރު ދައުލަތަށް ދައްކަވަންޖެހޭ ކަމަށް ވިދާޅުވެ އެ ފައިސާ އަވަހަށް ދެއްކެވުމަށް ނިހާން ރޭ ވެސް ގޮވާލެއްވިއެވެ. އަދި ގާސިމް ނޫނަސް ދައުލަތަށް ދަރާފައިވާ ބޭފުޅެއް ނަމަ އެ ފައިސާ މިހާރުން މިހާރަށް ދެއްކުމަށް އޭނާ ގޮވާލެއްވިއެވެ.
ރޭގެ ޖަލްސާގައި ވާހަކަފުޅު ދައްކަވަމުން އަދުރޭ ވިދާޅުވީ އެކެއް ފެބްރުއަރީގައި ރާއްޖެއަށް ގެންނަން އުޅުނު ބަޣާވާތުގެ އެންމެ އަޑީގައި ހުންނެވި ބޭފުޅަކީގާސިމް ކަމަށާއި ޖަރުމަނު ވިލާތުގައި ހުންނަވައިގެން ގާނޫނީ ގޮތުން އުފެދިފައިވާ ސަރުކާރެއް ވައްޓާލަން އުޅުނު ކަމަށް އަމިއްލަފުޅަށް އޭނާ އިއުތިރާފްވެފައިވާ ކަމަށެވެ.
"ހަރުކަަށި އިބާރާތުން ސަރުކާރަށް ޕީޕީއެމްގެ ނަމުގައި ގޮވާލަން، ގެނެވުނު ގޮތަކަށް ގާސިމާއި ކުރީގެ ނައިބް ރައީސް ޑރ. މުހައްމަދު ޖަމީލް އަހުމަދު ގެނެސް ހައްޔަރު ކުރުމަށް. ގާސިމަކީ ބަޣާވާތުގައި އިސްކޮށް ހަރަކާތްތެރިވި ފަރާތްކަން މިއަދު އޭނާ އަމިއްލައަށް ވެސް އެވަނީ އިއުތިރާފުވެފައި،" އަދުރޭ ވިދާޅުވިއެވެ.