23 Feb 2018, 10:24
"ބިގް ލިޓްލް ލައިޒް"ގެ ފުރަތަމަ ސީޒަން ކާމިޔާބު ކަމާއެކު ނިންމާލައި، އޭގެ ދެވަނަ ސީޒަން ނުކުންނާނެ ދުވަހެއް އިއުލާން ކޮށްފިއެވެ.
އަންނަ އަހަރުގެ ކުރީކޮޅު "ބިގް ލިޓްލް ލައިސް"ގެ ދެވަނަ ސީޒަން ރިލީޒްކުރުމަށް ނިންމާފައިވާ އިރު، މިހާރު ކުރަމުން އަންނަ މަސައްކަތަކީ ސީރީޒްގެ ކާސްޓުން އިތުރަށް ވަރުގަދަ ކުރުމެވެ.
"ބިގް ލިޓްލް ލައިޒް"ގެ ލީޑުން ފެނިގެންދަނީ ރީސް ވިދަސްޕޫން އަދި ނިކޯލް ކިޑްމަންއެވެ. އޮސްކާ އަދި އެމީ އެވޯޑް ހޯދާފައިވާ ކުޅަދާނާ އެކްޓްރެސް މެރިލް ސްޓްރީޕް ވަނީ ސީރީޒްގެ ދެވަނަ ސީޒަންގެ ކާސްޓުގައި ހިމަނާފައެވެ.
ޖޭންގެ ރޯލު ކުޅުނު ޝޭލީން ވުޑްލީ، ބޮނީ ކާލްސަންގެ ރޯލުން ފެނިގެންދިޔަ ޒޯއީ ކްރަވިޓްޒް އަދި ރެނާޓާ ކްލައިންގެ ރޯލުން ފެނިގެންދިޔަ ލޯރާ ޑާންވެސް ދެވަނަ ސީޒަނުން ފެނިގެންދާނެކަމަށް ބޭރުގެ ރިޕޯޓުތައް ބުނެއެވެ.
"ކުޑަ ދުވަސްކޮޅެއްގެ ތެރޭގައި މަގްބޫލުވެގެން ދިޔަ ސީރީޒެއް މިއީ. ހުރިހާ ރަހަތަކެއް މި ސީޒަންގައި އެކުލެވޭނެ. ފުރަތަމަ ސީޒަނާ އަޅާ މި ސީޒަން މާ ފުރިހަމަ ވާނެ،" ކާސްޓުން ބުނެއެވެ.
މަރު، އާއިލާ އަދި އާންމު ދިރިއުޅުމުގައި ޖެހޭ ތަފާތު މައްސަލަތަކުގެ މައްޗަށް ބިނާކޮށް ގެނެސްދޭ "ބިގް ލިޓްލް ލައިޒް" އަކީ ބެލުންތެރިންގެ މަގްބޫލުކަން ހޯދާފައިވާ ސީރީސް އެކެވެ.