20 Feb 2018, 15:05
ބޯޓުދެލި ނެގުން (ކޯލް މައިނިން) އަކީ 1973 ވަނަ އަހަރުން ފެށިގެން އިންޑިއާގެ ސަރުކާރުން ކުރަމުން އަންނަ މަސައްކަތެއް ނަމަވެސް ބޯޓުދެލި ނެގުމުގެ ފުރުސަތު އަމިއްލަ ފަރާތްތަކަށް ދޭން އެގައުމުގެ ސަރުކާރުން ނިންމައިފި އެވެ.
އެ ގައުމުގެ ކެބިނެޓުގެ އިކޮނޮމިކް އެފެއާޒް ކޮމެޓީ އިން މިފަދަ ނިންމުމެއް ނިންމާފައި މިވަނީ ބޯޓުދެލި ނެގުމުގެ އިންޑަސްޓްރީ އަށް ވާދަވެރިކަން ގެނައުމުގެ މަގްސަދުގަ އެވެ.
މިއާ އެކު ޓެކްނޮލަޖީގެ އެހީގައި މި ދާއިރާ އިތުރަށް ކުރިއަރާނެ ކަމަށް އިންޑިއާގެ ސަރުކާރުން ބުނެ އެވެ.
"ވަޒީފާގެ ފުރުސަތުތައް އުފެދި ގައުމުގެ އިގްތިސާދަށް ވެސް ބޮޑު ކުރިއެރުމެއް އަންނާނެ،" ނިންމުމާ ގުޅޭ ގޮތުން ކޯލް އެންޑް ރެއިލްވޭސް މިނިސްޓަރު ޕިޔުޝް ގޯޔާލް ވިދާޅުވެފައިވެ އެވެ.
މިހާރު އިންޑިއާގައި ހުރި ކޯލް މައިންތައް އިންޓަނެޓު މެދުވެރިކޮށް ބިޑަށް ހުޅުވާލަން ވަނީ ނިންމައިފަ އެވެ. މި ބިޑުގައި ސަރުކާރު ކުންފުނިތަކަށާއި އަމިއްލަ ކުންފުނިތަކަށް ވެސް ބައިވެރިވެވޭނެ އެވެ. މީގެ އިތުރުން ބައިނަލްއަގްވާމީ ފަރާތްތަކަށް ވެސް މި ބިޑުގައި ބައިވެރިވެވޭނެ އެވެ.
އިންޑިއާގައި 300 ބިލިއަން ޓަނުގެ ކޯލް ރިޒާވެއް އޮންނަ ކަމަށް ބެލެވެ އެވެ.