09 Feb 2018, 14:02
ފޭސްބުކްގައި "ލައިކް" ބަޓަންއެއް ހުންނަ ގޮތަށް "ޑިސްލައިކް" ބަޓަންއެއް ހުންނަ ނަމައޭ، ފޭސްބުކްގެ ޔޫޒަރުން މީގެ ކުރިން ހިތަށް އަރާފައި އޮވެދާނެއެވެ.
އަދި މިދިޔަ ބުރާސްފަތި ދުވަހު ފޭސްބުކްގެ ބައެއް ޔޫޒަރުންނަށް "ޑައުންވޯޓް" ބަޓަންއެއް ބޭނުން ކުރެވޭ ގޮތް ވުމުން، ގިނަ ބަޔަކު ހީކުރީ ފޭސްބުކްއިން އެންމެ ފަހުން "ޑިސްލައިކް" ބަޓަންއެއް ތައާރަފް ކުރީ ކަމަށެވެ.
ނަމަވެސް "ދަ ވާޖް"އިން ސުވާލު ކުރުމުން ފޭސްބުކްއިން ވަނީ "ޑައުންވޯޓް" ބަޓަންއަކީ އެއްގޮތަކަށްވެސް މީހުންގެ ޕޯސްޓުތައް "ޑިސްލައިކް" ކުރާ ބަޓަންއެއް ނޫން ކަމަށް ބުނެފައެވެ. އެއާ ހިލާފަށް، އެއީ ޕަބްލިކް ޕޭޖުތަކުގައި ހުންނަ ޕޯސްޓުތަކުގައި މީހުން ކުރާ ކޮމެންޓުތަކާ ބެހޭ ގޮތުން ފޭސްބުކަށް ފީޑްބެކް ދޭން ބޭނުން ކުރާ ބަޓަންއެއް ކަމަށް ފޭސްބުކްގެ ތަރުޖަމާނަކު ވިދާޅުވިއެވެ.
ފޭސްބުކްގެ ފޮޓޯތަކާއި ސްޓޭޓަސްތަކުގެ ދަށުގައި ހުންނަ ކޮމެންޓުތައް ކައިރީ ހުންނަ "ޑައުންވޯޓް" ބަޓަންއަށް ފިއްތުމުން، އެޔޫޒަރަކަށް އެކޮމެންޓު "ގެއްލެ"އެވެ. އަދި އެކޮމެންޓަށް "ޑައުންވޯޓް" ދިނީ ކޮން ސަބަބަކާ ހެދިތޯ ފޭސްބުކްއިން ސުވާލު ކުރާނެއެވެ.
އޭގެ ސަބަބުން ފޭސްބުކްގައި ކޮމެންޓުތައް މޮޑަރޭޓް ކުރެވި، އެޕްލެޓްފޯމުގެ ޔޫޒަރުން މަޝްވަރާ ކުރަން ބޭނުން ވަނީ އަދި ނުވަނީ ކޮން ކަންކަމަކާ ބެހޭގޮތުންކަން އެކުންފުންޏަށް އެނގިގެންދާނެ ކަމަށް ޓެކް ރިޕޯޓަރުން ބުނެއެވެ.
މީގެ ކުރިން، 2016 ވަނަ އަހަރު ފޭސްބުކްއިން ވަނީ އެކުންފުނީގެ "ލައިކް" ބަޓަނަށް ބޮޑު ބަދަލެއް ގެނެސް، ހަމައެކަނި ލައިކްގެ ބަދަލުގައި އިތުރު ފަސް "ރިއެކްޝަނެއް" ތައާރަފްކޮށްފައެވެ.