06 Feb 2018, 22:33
ދުނިޔޭގެ އެންމެ ބުރަ ބޮޑު ލީގުގެ ގޮތުގައި ގިނަބަޔަކު ސިފަކުރާ އިނގިރޭސި ޕްރިމިއާ ލީގުންވެސް ފިނި މޫސުމުގެ ބްރޭކާއެކު ކުރިއަށް އޮތް ސީޒަންތަކުގެ ޝެޑިއުލް އިއުލާން ކުރަން ތައްޔާރުވާކަމަށް ޕްރިމިއާ ލީގުން ބުނެފިއެވެ.
ޕްރިމިއާ ލީގުން ނެރުނު ސްޓޭޓްމަންޓެއްގައި ބުނެފައިވަނީ، ތޮށްޖެހިފައިވާ ޝެޑިއުލެއްގައި ލީގު އަދި ކަޕުގެ މެޗުތައް ކުޅެން ޖެހޭ ގޮތަށް އޮތުމަކީ އެ ލީގަށް ދިމާވާ ވަރަށް ބޮޑު ޗެލެންޖެއް ކަމަށާއި އެކަން ހައްލު ކުރުމަށްޓަކައި ކްލަބުތަކަށް މިޑް ސީޒަން ބްރޭކެއް ދިނުމަށް މަޝްވަރާ ކުރެވެމުންދާ ކަމަށެވެ. ލީގުގެ ހިއްސާދާރުންނާއެކު މިހާތަނަށް ކުރެވުނު މަޝްވަރާތައް ކާމިޔާބުކަމަށާއި، އިނގިރޭސި އެފްއޭ އަދި އީއެފްއެލް އާއެކުވެސް މަޝްވަރާ ކުރަމުންދާކަމަށްވެސް ޕްރިމިއާ ލީގުގެ ސްޓޭޓްމަންޓުގައި ވެއެވެ.
ބީބީސީން ބުނެފައިވަނީ 2019 ވަނަ އަހަރުން 2022 ވަނަ އަހަރާ ހަމައަށް ޕްރިމިއާ ލީގުގެ ޓީވީ ރައިޓްސްގެ ޓެންޑާ ޑޮކިއުމަންޓްސްތަކުގައި ފިނި މޫސުމުގެ ބްރޭކް ހިމެނިފައިވާ ކަމަށެވެ. އަދި ޕްރިމިއާ ލީގުގެ ކުރިއަށް އޮތް ތިން ސީޒަނަށް ޓީވީ ރައިޓްސް ދޭނެ ކުންފުންޏެއް އަންނަ ހާފްތާގައި އިއުލާން ކުރާނެ ކަމަށްވެސް ބީބީސީން ބުނެފައިވެއެވެ.
ޕްރިމިއާ ލީގުގެ ޓީވީ ރައިޓްސް މިހާރު ވިއްކާފައިވަނީ ސްކައި އަދި ބީޓީ އަށެވެ. ސްކައި އިން ފަސް ޕެކޭޖެއް ނަގާފައިވާއިރު ބީޓީއަށް ދީފައިވަނީ ދެ ޕެކޭޖެކެވެ. މިހާރުގެ ޕެކޭޖްގައި 168 ލައިވް މެޗު ހިމެނިފައިވާއިރު އަގަކީ 5.14 ބިލިއަން ޕައުންޑެވެ.
ދުނިޔޭގެ ބައެއް ބޮޑެތި ލީގުތައް ކަމަށްވާ ފްރާންސް ލީގާއި، ސްޕެއިން ލީގުގެ އިތުރުން އިޓަލީ ލީގު އަދި ޖަރުމަންގެ ލީގުގައިވެސް ފިނި މޫސުމުގެ ބްރޭކް ނަގައެވެ.